Numero 27 - Ti Biblia (1973)

Dagiti annac a babai ni Salfaad. Maipacdaar ken Moises ti ipapatayna. Ni Josue a sonona.

¹ Immadanida ngarud dagiti annac a babbai ni Salfaad, nga anac a lalaki ni Hefer, nga anac a lalaki ni Galaad, nga anac a lalaki ni Maquir, nga anac a lalaki ni Manases, iti familia ni Manases nga anac a lalaki ni Jose; ket dagitoy ti nagnagan dagiti annacna a babbai; da Maala, Noa, ken Hogla ken Milca, ken Tirsa.

² Ket nagyanda iti sango ni Moises, ken sango ni Eleazar a padi, ken sango dagiti pangpangolo ken amin a gimong, iti ruangan ti tolda ti gimong, a kinunada,

³ Ni amami natay iti let-ang, ket isu awan idi cadagiti buyot a naguummong a maicaniwas ken Jehova a kinatipon ti buyot ni Core: ngem isu natay iti basolna met laeng; ket isu awan annacna a lallaki.

⁴ Apayapay a maiccat coma ti nagan ni amami cadagiti familiana, gapu ta isu awan ti annacna a lallaki? Iccannacami iti pakipagtagicuaanmi cadagiti cacabsat ni amami.

⁵ Ket ni Moises impanna ti panggepda iti sango ni Jehova.

⁶ Ket ni Jehova nagsao ken Moises, a kinunana,

⁷ Dagiti annac a babbai ni Salfaad nalinteg ti saoenda: itedmonto a di bumurong cadacuada iti pakipagtagicuaanda a tawid cadagiti cacabsat ni amada, ket ipaallawatmo cadacuada ti tawiden ni amada.

⁸ Ket ibagam cadagiti annac ti Israel, a cunam, No ti maysa a lalaki matay ket awan anacna a lalaki, ipaallawatmo ngarud ti tawidna iti anacna a babai.

⁹ Ket no awan ti anacna a babai, itedyonto ngarud ti tawidna cadagiti cacabsatna.

¹⁰ Ket no awan ti cacabsatna, itedyonto ngarud ti tawidna cadagiti cacabsat ni amana.

¹¹ Ket no ti amana awan cacabsatna, itedyonto ngarud ti tawidna iti cabagianna a caasitgan kencuana iti familiana, ket isu ti agtagicuanto: ket daytoyto ti pagalagadan ken bilin cadagiti annac ti Israel, cas imbilin ni Jehova ken Moises.

¹² Ket ni Jehova kinunana ken Moises, Sumang-atca iti daytoy a bantay ti Abarim, ket kitaem ti daga nga intedco cadagiti annac ti Israel.

¹³ Ket no makitamon, sica makitiponcanto iti ilim, cas ken Aaron a cabsatmo a nakitipon idi:

¹⁴ Ta dacayo nagsungitcayo iti saoc idiay let-ang ti Zin, iti pannakisusic ti gimong, tapno santificarendac coma cadagidiay dandanum iti sango dagiti matada. (Dagitoy isuda dagiti dandanum ti Meriba ti Cades iti let-ang ti Zin.)

¹⁵ Ket ni Moises nakisao ken Jehova, a kinunana,

¹⁶ Ni Jehova a Dios dagiti espiritu ti amin a lasag mangdutoc coma iti maysa a lalaki nga agpangolo iti gimong,

¹⁷ A rumuar iti sangoda ken sumrec iti sangoda, ken mangiruar cadacuada ken mangiserrec cadacuada, tapno ti gimong ni Jehova saan coma a cas cadagiti carcarnero nga awan pastorda.

¹⁸ Ket ni Jehova nagsao ken Moises, Alaem kenca ni Josue, nga anac a lalaki ni Nun, a maysa a lalaki nga addaan ti Espiritu, ket ipataymo ta imam kencuana;

¹⁹ Ket idatagmo iti sango ni Eleazar a padi, ken iti sango ti dagup ti gimong; ket itedmo kencuana ti maysa nga annongen iti sangoda.

²⁰ Ket isaadmo ti tan-ocmo kencuana, tapno ti dagup ti gimong dagiti annac ti Israel agtulnogda.

²¹ Ket isu agyanto iti sango ni Eleazar a padi, isu nga agintuudto maipuon kencuana iti panangipato ti Urim iti sango ni Jehova: iti panagsaona rumuardanto, ket iti panagsaona sumrecdanto, isu man ken amin nga annac ti Israel agraman kencuana, nga amin met laeng ti gimong.

²² Ket adtoy, inaramidna cas ti imbilin ni Jehova, kencuana: ket isu innalana ni Josue ket impanna iti sango ni Eleazar a padi, ken iti sango ti dagup ti gimong:

²³ Ket impatayna kencuana dagiti im-imana, ket intedna kencuana ti maysa a panagannong, cas panaibaga ni Jehova iti pannacaaramat ni Moises.