Numero 25 - Ti Biblia (1973)

Ti basol sadiay Fogor ket ti regta ni Finees.

¹ Ket ti Israel nagtaeng iti Sittim; ket ti ili nangrugi a nakiabig cadagiti annac a babai ti Moab:

² Ta inayabanda ti ili iti yan dagiti datdaton dagiti didiosda; ket ti ili nangan ket nagrucnoyda cadagiti didiosda.

³ Ket ti Israel nakitipon ken Baal-peor: ket ti unget ni Jehova simged a maibusor iti Israel.

⁴ Ket ni Jehova kinunana ken Moises, Alaem amin a pangpangolo ti ili, ket ibitaymo ida a maipaay ken Jehova iti sango ti init, tapno ti narungsot nga unget ni Jehova lumiclic iti Israel.

⁵ Ket ni Moises kinunana cadagiti oc-ocom ti Israel, Patayenyo tumunggal maysa cadagiti tattaona a nakitipon ken Baal-peor.

⁶ Ket, adtoy, maysa cadagiti annac ti Israel immay ken mangyeg cadagiti cacabsatna iti maysa a babai a taga Madian iti imatang ni Moises, ken iti imatang ti dagup ti gimong dagiti annac ti Israel, bayat ti caaddada nga agsangsangit iti ruangan ti tolda ti gimong.

⁷ Ket idi ni Finees nga anac a lalaki ni Eleazar, nga anac a lalaki ni Aaron a padi, nakitana, isu timmacder iti tengnga ti gimong, ket iniggamanna, ti maysa a gayang;

⁸ Ket isu napan simmurot iti lalaki ti Israel agingga iti bengbeng ket sinalputna ida a dua, ti lalaki ti Israel ken nagtarus iti bagi ti babai. Casta ti nagsardengan ti didigra cadagiti annac ti Israel.

⁹ Ket dagidiay a natay iti didigra duapulo ket uppat a ribuda.

¹⁰ Ket ni Jehova nakisao ken Moises, a kinunana,

¹¹ Ni Finees nga anac ni Eleazar, nga anac ni Aaron a padi, pinagbawingna ti pungtotco cadagiti annac ti Israel a cadacuada naimun cas ti panagimunco, a nacaigapuanan ti diac panangibus cadagiti annac ti Israel iti panagimunco.

¹² Isu ti gapuna a cunam, Adtoy, itedco kencuana ti tulagco a cappia:

¹³ Ket isunto kencuana ken iti putotna a sumono kencuana ti tulag ti agnanayon a kinapadi; ta isu nagannad iti maipaay iti Diosna, ken nangaramid iti pacaabbongan dagiti annac ti Israel.

¹⁴ Ket ti nagan ti lalaki ti Israel, a napatay, isu a napatay agraman ti babai a Madianita, isu idi ni Zimri, nga anac ni Salu, a maysa a pangolo ti balay dagiti amma cadagiti Simeonitas.

¹⁵ Ket ti nagan ti babai a Madianita a napapatay isu idi ni Cozbi, nga anac a babai ni Zur; isu ti olo ti ili ti maysa a balay dagiti amma iti Madian.

¹⁶ Ket ni Jehova nakisao ken Moises, a kinunana,

¹⁷ Parigatem dagiti Madianitas, ket cabilem ida:

¹⁸ Ta isuda pinarigatdacayo cadagiti al-allilawda a pinangulbodda cadacayo, a maipanggep ken Peor, ken iti maipanggep ken Cozbi, nga anac a babai ti pangolo ti Madian, a cabsatda a babai nga napapatay iti aldaw ti didigra iti maipanggep ken Peor.