Numero 24 - Ti Biblia (1973)

Ti maicatlo ken maicapat a padto ni Balaam.

¹ Ket ni Balaam idi nakitana a kinaay-ayo ni Jehova a bendicionan ti Israel, saan a napan cas cadagiti dadduma nga aldaw a nangsarac cadagiti panagan-anito, ngem intaengna ti rupana a sinangona ti let-ang.

² Ket ni Balaam intannawagna dagiti matana, ken nakitana nga ti Israel sinanaed cas mayannurot cadagiti capcaputotanda; ket ti Espiritu ti Dios immay kencuana.

³ Ket inaramatna ti pangngarigna, ket kinunana, Ni Balaam nga anac ni Beor cunana, Ken ti tao a naripcan ti matana cunana:

⁴ Cunana, Ti macangngeg cadagiti sasao ti Dios, Ti macakita iti parparmata ti Mannacabalin-amin, Nagpasag, ket simumulagat dagiti matana:

⁵ Amangan a nagpintas dagiti toldam, O Jacob, Dagiti tabernaculom, O Israel!

⁶ Cas loblobong aglaylayonda. Cas bangbangcag iti abay ti carayan, Cas caycayo a sandalo nga immula ni Jehova, Cas caycayo a cedro iti arubayan ti dandanum.

⁷ Danum agayusto cadagiti timtimbana, Ket cadagiti adu a dandanum agyanto ti bin-ina, Ket nangatngatonto ngem ni Agag ti arina, Ket maitan-octo ti pagarianna.

⁸ Ti Diso aonenna sadi Egipto; Isu addaan cas ti pigsa ti vaca a naatap; Dagiti il-ili a cabusorna lamutennanto, Ket dagiti tultulangda tuctuccolennanto, Ket salputennanto ida cadagiti panpanana.

⁹ Isu nagrucob, isu cas leon a nagidda, Ken cas maysa a leon a babai; Asino ti mangriingto kencuana? Nagasat coma ti tunggal maysa nga agdaydayaw kenca, Ken mailunod coma tunggal maysa a mangilunod kenca.

¹⁰ Ket ti pungtot ni Balac bimmara iti maicaniwas ken Balaam, ket pinagsipatna dagiti im-imana; ket ni Balac kinunana ken Balaam, Inayabanca tapno ilunodmo dagiti cabusorco, ket, adtoy, sica binendicionam ida laeng cadagitoy namitlo a daras.

¹¹ Isu ti gapuna nga ita, agtalawca a mapan iti lugarmo: pinanunotco idi nga itan-occa iti dackel a dayaw; ngem, adtoy ta, ni Jehova pinaritannaca iti dayaw.

¹² Ket ni Balaam kinunana ken Balac, Diac met aya sinao cadagiti babaonem nga imbaonmo caniac, a kinunac,

¹³ Uray ited coma caniac ni Balac ti balayna a napno iti pirac ken balitoc, diac mabalin a labsingen ti sao ni Jehova, tapno agaramidac iti naimbag man wenno dakes a bucbucodco; ti saoen ni Jehova, dayta ti saoecto?

¹⁴ Ket ita adtoy, Innac iti ilic: umayca, ket ipacaammoc kenca ti aramidento daytoy nga ili iti ilim cadagiti maud-udi nga al-aldaw.

¹⁵ Ket isu inaramatna ti pangngarigna, ket kinunana, Ni Balaam nga anac ni Beor cunana, Ken ti tao a naripcan ti matana cunana;

¹⁶ Cunana, Ti macangngeg cadagiti sasao ti Dios, Ken macaammo iti sirib ti Cangatoan unay, Ti macakita iti parparmata ti Mannacabalin-amin, Nagpasag, ket simumulagat dagiti matana:

¹⁷ Makitac ngem saan nga ita; Masirpatco ngem saan nga asideg: Ken Jacob rumuarto ti maysa a bitwen. Ket tumaudto ti maysa a cetro iti Israel, Ket sugatennanto amin nga igigid ti Moab, Ket ipadsonanto amin nga annac ti riri.

¹⁸ Ket ti Edom maysanto a pagtagicuaan, Ti Seir maysanto met a pagtagicuaan; nga idi isu ti caboabusorna; Ngem ti Israel situtured a mangaramid.

¹⁹ Ket aggapunto ken Jacob ti maysa nga addaan turay, Ken mangdadaelto ti matda iti ili.

²⁰ Ket kinitana ti Amalec, ket inaramatna ti pangngarigna, ket kinunana, Ti Amalec isu ti umuna cadagiti nasnacion; Ngem ti maudi a tungpalna, agbanagto iti pannacadadaelna.

²¹ Ket kinitana ti Cineo, ket inaramatna ti pangngarigna, ket kinunana, Napigsa ti pagnaedam a disso, Ket ti umocmo maisaad iti bato.

²² Nupay casta ti Cineo macraayanto, Inggana iti dinaca ipan ti Assur iti pannacacayaw.

²³ Ket inaramatna ti pangngarigna ket kinunana, Ay, asinonto ti agbiag no aramiden ti Dios daytoy?

²⁴ Ngem umayto dagiti sasacayan nga aggapu iti igid ti Cittim, Ket parigatendanto ti Assur, ken parigatendanto ti Eber; Ket isu casta met agbanagto iti pannacadadael.

²⁵ Ket ni Balaam timmacder ket napan nagsubli iti dissona; ket ni Balac casta met a napan iti dalanna.