Numero 23 - Ti Biblia (1973)

Ti umuna ken maicadua a padto ni Balaam.

¹ Ket ni Balaam kinunana ken Balac, Ibangonannac cadagiti pito nga altar, ket isaganaannac ditoy iti pito a vaca ken pito a cordero a lallaki.

² Ket ni Balac inaramidna cas sinao ni Balaam; ket ni Balac ken Balaam indatonda iti tunggal altar ti maysa a vaca ken maysa a cordero a lalaki.

³ Ket ni Balaam kinunana ken Balac, Agyanca iti yan ti datonmo a mapuuran, ket siac innacto; ta bareng umayto sumabat caniac ni Jehova; ket ti uray ania nga iparangnanto caniac, saoecto kenca. Ket napan iti maysa a tapaw nga awan rorootna.

⁴ Ket ti Dios sinaracna ni Balaam: ket daytoy kinunana kencuana, Sinaganac dagiti pito nga altar ket inrucbabco ti maysa a vaca ken maysa a cordero a lalaki iti tunggal altar.

⁵ Ket ni Jehova incabilna ti maysa a sao iti ngiwat ni Balaam, ket kinunana, Agsublica ken Balac ket castoy ti saoemto.

⁶ Ket nagsubli kencuana ket adtoy, isu nagyan iti sibay ti daton a mapuuran, isu ken amin dagiti panpangoloen ti Moab.

⁷ Ket inaramatna ti pangngarigna, ket kinunana, Manipud Aram inyegna ni Balac, Nga ari ti Moab manipud bantay ti Daya: Umayca, ilunodmo caniac ni Jacob, Ket umayca, ti Israel inca cariten.

⁸ Casano ti panangilunodconto iti di inlunod ti Dios Casano ti panangcaritconto iti di kinarit ni Jehova?

⁹ Ta manipud iti tapaw dagiti batbato isu makitac, Ket manipud cadagiti turturod isu maimatangac; Adtoy, isu maysa nga ili nga agnaed nga agwaywayas, Ket cadagiti nasnacion dinto maibilang.

¹⁰ Asino ti macabalin a mangbilang iti tapoc ni Jacob, Wenno mangbilang iti apagcapat ti Israel? Matayac coma iti patay dagiti nasingpet, Ket ti maudi a tungpalco cas coma kencuana!

¹¹ Ket ni Balac kinunana ken Balaam, Ania ti inaramidmo caniac? Innalaca tapno ilunodmo dagiti cabusorco, ket adtoy, binendicionam met la ida.

¹² Ket isu simmungbat ket kinunana kencuana, Diac ngamin aya rebbeng nga aluadan ti panangisaoc iti incabil ni Jehova iti ngiwatco?

¹³ Ket ni Balac kinunana kencuana, Umayca ita, dawatec kenca, makicuyogca coma caniac agingga iti sabali a disso a panipudan ti pacakitaam cadacuada; makitamto ida ngem ti laeng maudi a pingirda, ket dica makitanto amin ida: ket ilunodmo ida coma caniac manipud idiay.

¹⁴ Ket isu innalana nga impan iti talon ti Sofim, iti tapaw ti Pisga ket nagbangon iti pito nga altar, ket nangidaton iti maysa a lalaki a vaca, ken maysa a cordero a lalaki iti rabaw ti tunggal altar.

¹⁵ Ket isu kinunana ken Balac, Agyanca ditoy yan ti datonmo a mapuuran bayat ti panangsaracco ken Jehova sadiay.

¹⁶ Ket ni Jehova sinabetna ni Balaam, ket incabilna ti maysa a sao iti ngiwatna, ket kinunana, Agsublica ken Balac, ket castoy ti saoemto.

¹⁷ Ket isu immay kencuana, ket adtoy, siaadda iti yan ti daton a mapuuran, ken dagiti pangpangoloen ti Moab agraman kencuana. Ket ni Balac kinunana kencuana, Ania ti sinao ni Jehova?

¹⁸ Ket isu inaramatna ti pangngarigna, ket kinunana, Tummacderca, Balac, ket dumngegca; Imdengannac, sica nga anac ni Zippor:

¹⁹ Ti Dios saan a maysa a tao tapno agtiri, Di met anac ti tao tapno agbabawi: Isu ti nagcuna, dinanto aya aramiden? Wenno isu ti nagsao, ket dinanto aya tungpalen?

²⁰ Adtoy, Inawatco ti bilin a mamendicion: Ket isu binendicionanna, ket diac mabalin a baliwan.

²¹ Isu dina naimatangan ken Jacob ti kinadakes; Di nacakita ti kinasukir iti Israel: Ni Jehova a Diosna siaadda kencuana, Ken ti ickis ti maysa nga ari adda cadacuada.

²² Ti Dios aonenna ida iti Egipto; Isu addaan iti cas pigsa ti vaca a naatap.

²³ Pudno a maibusor ken Jacob awan cabaelan ti managanito; Wenno uray ania a padpadles a maibusor iti Israel: Ita ti maisaonto maipanggep ken Jacob ken iti Israel, Anian ti inaramid ti Dios!

²⁴ Adtoy, ti ili tumacder cas maysa a leon a babai, Ket itacderna ti bagina cas leon a lalaki: Isu dinto agpasag inggana iti di mangan iti samsam, Ken uminum iti dara ti napatay.

²⁵ Ket ni Balac kinunana ken Balaam, Dica ilunod ida a pulos, wenno dica bendicionan ida a pulos.

²⁶ Ngem ni Balaam simmungbat ket kinunana ken Balac, Diac aya imbaga kenca a kinunac, Amin nga ibaga ni Jehova, dayta ti rebbengco nga aramiden?

²⁷ Ket ni Balac kinunana ken Balaam, Umayca ita ala, alaencanto iti sabali a disso; nalabit a manipud idiay pagayatanto ti Dios ti panangilunodmo cadacuada caniac.

²⁸ Ket ni Balac innalana ni Balaam inggana iti tapaw ti Peor, a mangtan-aw iti let-ang.

²⁹ Ket ni Balaam kinunana ken Balac, Ibangonannac ditoy iti pito nga altar, ket isaganaannac ditoy cadagiti pito nga vaca, ken pito a carnero a lallaki.

³⁰ Ket ni Balac inaramidna ti cas sinao ni Balaam, ket indatonna ti maysa a vaca, ken ti maysa a carnero a lalaki iti rabaw ti tunggal altar.