Numero 21 - Ti Biblia (1973)

Naparmec ni Arad. Dagiti ul-uleg ken ti sinan-uleg a suer. Dagiti panagdaldaliasat nanipud iti Obot agingga iti Fasga. Naparmec da Sehon ken ni Og.

¹ Ket ti Cananeo, nga ari ti Arad a nagnaed iti Abagatan, nangegna a masasao a ti Israel umayda magna iti dalan ti Atarim; ket nakibacal iti Israel, ket innalana ti dadduma cadacuada a cayawna.

² Ket ti Israel nangipaay iti maysa a cari ken Jehova ket kinunana, No pudno a yawatmonto iti imac dayta nga ili, talipupusecto a dadaelen dagiti il-ilida.

³ Ket ni Jehova impangagna ti timec ti Israel, ket inyawatna dagiti taga Canaan; ket dinadaelna ida a tinalipupus agraman il-ilida: ket ti nagan ti disso nanagan iti Horma.

⁴ Ket isuda nagnada nanipud bantay Hor iti dalan nga agpa-Baybay a Nalabaga, tapno lawlawenda ti daga ti Edom: ket ti cararua ti ili napatacrot unay gapu iti dalan.

⁵ Ket ti ili nagsao iti maicaniwas iti Dios, ken maicaniwas ken Moises, Ania ti gapuna aya nga inaonnacami sadi Egipto tapno mataycami ditoy tay-ac? ta awan taraon, ken awan danum; ket ti cararuami masuya itoy saan a naimas a tinapay.

⁶ Ket ni Jehova imbaonna dagiti umapapuy nga ul-uleg iti baet dagiti tattao, ket kinagatda dagiti tattao; ket natay ti adu a tattao ti Israel.

⁷ Ket dagiti tattao immayda ken Moises, ket kinunada, Nacabasolcami, gapu ta nagsaocami iti maicaniwas ken Jehova, ken maicaniwas kenca; agdawatca ken Jehova nga iccatenna coma cadacami dagiti ul-uleg. Ket ni Moises indawatanna ti umili.

⁸ Ket ni Jehova kinunana ken Moises, Mangaramidca iti maysa nga umapapuy nga uleg, ket ibayogmo iti maysa a monmon; ket maaramidto a tunggal maysa a nacagat, no cumita kencuana agbiagto.

⁹ Ket ni Moises inaramidna ti maysa a sinan-uleg nga suer ket imbayogna iti maysa a monmon: ket naaramid a no maysa nga uleg kimmagat iti maysa a tao, no isu cumita idi sinan-uleg a suer, nagbiag.

¹⁰ Ket dagiti annac ti Israel nagrubbuatda, ket nagtoldada idiay Oboth.

¹¹ Ket nagnada a pimmanaw idiay Oboth ket nagtoldada idiay Ije-abarim, iti let-ang nga adda iti sango ti Moab, nga agpa-leleggacan ti init.

¹² Manipud idiay nagnada, ket nagtoldada idiay lobong ti Zared.

¹³ Manipud idiay nagnada ket nagtoldada iti sabali a bangir ti Arnon, nga adda iti let-ang nga aggapu iti beddeng ti Amorreo: ta ti Arnon isu ti ingga ti Moab, nagbaetan ti Moab ken dagiti Amorreo.

¹⁴ Isu ti gapuna a masao iti libro dagiti Gubgubat ni Jehova, Vaheb sadiay Sufa, ken cadagiti lob-lobong ti Arnon,

¹⁵ Ket ti salogan ti lob-lobong, Nga agpababa iti pagnaedan ti Ar, Ket agsadag iti beddeng ti Moab.

¹⁶ Ket manipud idiay nagnada a nagturong iti Beer: daytoy isu ti bobon a nagcunaan ni Jehova ken Moises, Urnongem a tiptiponen dagiti tattao, ket iccacto ida iti danum.

¹⁷ Idin ti Israel kinantana daytoy a cancion: O bobon, agburayocca; cantaanyo ala:

¹⁸ Ti bobon, a dagiti pangolo kinutcutanda, A dagiti agturturay ti ili kinalianda, Iti cetro, ken cadagiti sarucodda. Ket manipud iti let-ang nagnada a napan iti Matana:

¹⁹ Ket manipud Matana inggana iti Nahaliel; ket manipud Mahaliel agingga iti Bamot;

²⁰ Ket manipud Bamot inggana iti lobong nga adda iti pagtatalonan ti Moab, agtungpal iti tapaw ti Pisga, a tan-awanna ti let-ang.

²¹ Ket ti Israel namalubos cadagiti mabaon a mapan ken Sehon, nga ari dagiti Amorreos, a kinunana,

²² Palasatennacam cadi iti dagam: dicami agpakillo ti pagtatalonan, wenno iti inuvasan; dicamto uminum iti danum dagiti bobbobon, magnacamto iti napatac a dalan ti ari, inggana iti dicami macalasat iti pagbeddengam.

²³ Ket ni Sehon dina naibtor a pinalasat ti Israel iti beddengna: no di ket ni Sehon inommongna a tiniptipon amin dagiti tataona, ket rimmuarda a bimmusor iti Israel iti yan ti let-ang, ket nacadanon iti Jahas; ket nakibacal iti Israel.

²⁴ Ket ti Israel kinabilna iti tadem ti campilan, ket tinagicuana iti dagana nanipud iti Arnon inggana iti Jabboc, nga agingga iti annac ti Ammon; ta ti beddeng dagiti annac ti Ammon napigsa idi.

²⁵ Ket ti Israel naalana amin dagiti il-ili; ket ti Israel nagnaedanna dagiti amin a il-ili dagiti Amorreo, idiay Hesbon, ken amin nga il-ilina.

²⁶ Ta ti Hesbon isu idi ti ili ni Sehon nga ari dagiti Amorreo, a nakigubat ken sinuctan ti ari ti Moab, ket inagawna amin a dagana iti imana agingga iti Arnon met laeng.

²⁷ Isu ti gapuna a dagiti domadaniw, cunada, Umaycayo iti Hesbon: Bangonenyo ket buclenyo coma ti ciudad ni Sehon:

²⁸ Ta maysa nga apuy rimmuar iti Hesbon, maysa a gil-ayab iti ciudad ni Sehon: nga inalun-unna ti Ar ti Moab, dagiti appo dagiti nangato a disso ti Arnon.

²⁹ Moab, ay-ayca pay: Sica, O ili ti Cemos, nawarawaracan: isu intedna dagiti annacna a lallaki cas tumatalaw, ken dagiti annacna a babbai iti pannacacayaw, ken Sehon nga ari dagiti Amorreo.

³⁰ Dacami pinanami ida; ti Hesbon napucaw agingga iti Dibon, ket dinadaelmi agingga iti Nofa, nga dumanon iti Medeba.

³¹ Castoy ti panagnaed ti Israel iti daga dagiti Amorreo.

³² Ket ni Moises pinasimisimna ti Jazer; ket innalada dagiti il-ili sadiay, ket pinasiada dagiti Amorreo nga addada idiay idi.

³³ Ket nagbaw-ingda ket simmang-atda iti dalan ti Basan: ket ni Og nga ari ti Basan rimmuar a bimmusor cadacuada, isu ken isu-amin a tattaona, tapno makibacalda idiay Edrei.

³⁴ Ket ni Jehova kinunana ken Moises, Dica agbuteng kencuana; ta inyawatcon ti bagina ita iman, casta met ti amin dagiti tattaona, ken ti dagana; ket aramidemto kencuana cas ti inaramidmo ken Sehon nga ari dagiti Amorreo a nagnaed idiay Hesbon.

³⁵ Iti casta kinabilda, isu ken dagiti annacna a lallaki, ken amin a tattaona, inggana iti awan natda kencuana: ket tinagicuada ti dagana.