Numero 2 - Ti Biblia (1973)

Ti bilang, panagpacarso ken palpalungo dagiti capcaputotan.

¹ Ket ni Jehova nakisao cada Moises ken ni Aaron, a kinunana,

² Dagiti annac ti Israel agpacarsodanto tunggal lalaki iti sibay ti wagaywayna met laeng agraman cadagiti tanda dagiti balbalay dagiti ammada: iti maibatog iti tolda ti gimong agpacarsodanto iti lawlawna.

³ Ket dagiti agpacarso iti bangirna iti daya nga agpa-leleggacan ti init isudanto dagiti akinbandera iti pacarso ni Juda, mayannurot cadagiti buybuyotda: ket ti pangolo dagiti annac ni Juda isunto ni Naason nga anac n Aminadab.

⁴ Ket ti buyotna, ken dagidiay a nabilang cadacuada pitopulo ket uppat a ribu ket innem a gasutda.

⁵ Ket dagiti caputotan ni Issacar agpacarsodanto iti sibayna: ket ti pangolo dagiti annac ni Issacar isunto ni Nathanael nga annac a lalaki ni Suar.

⁶ Ket ti buyotna ken dagidiay a nabilang cadacuada limapulo ket uppat a ribu ket uppat a gasutda.

⁷ Ket ti caputotan ni Zabulon: ken ti pangolo dagiti annac ni Zabulon isunto ni Eliab nga anac a lalaki ni Helon.

⁸ Ket ti buyotna ken dagidiay a nabilang cadacuada limapulo ket pito a ribu ket uppat a gasutda.

⁹ Amin dagiti nabilang iti buyot ni Juda sangagasut walopulo ket innem a ribu ket uppat a gasut a mayannurot cadagiti buyotda. Isudanto ti agluas nga umuna.

¹⁰ Iti bangirna iti abagatan agyanto ti wagayway ti pacarso ni Ruben a mayannurot cadagiti buybuyotda: ket ti pangolo dagiti annac ni Ruben isunto ni Elisur nga anac a lalaki ni Sedeur.

¹¹ Ket ti buyotna ken dagidiay a nabilang cadacuada uppat a pulo ket innem a ribu ket lima a gasutda.

¹² Ket dagiti agpacarsonto iti sibayna dagiti caputotan ni Simeon: ket ti pangolo dagiti annac ni Simeon isunto ni Selumiel nga anac a lalaki ni Zurisaddai.

¹³ Ket ti buyotna ken dagidiay a nabilang cadacuada limapulo ket siam a ribu ket tallo a gasutda.

¹⁴ Ket ti caputotan ni Gad: ken ti pangolo dagiti annac ni Gad isunto ni Eliasaf nga anac a lalaki ni Reuel.

¹⁵ Ket ti buyotna ken dagidiay a nabilang cadacuada uppat a pulo ket lima a ribu, innem a gasut ket limapuloda.

¹⁶ Ti dagup ti nabilang ti pacarso ni Ruben sangagasut limapulo ket maysa a ribu, ket uppat a gasut ket limapuloda cas mayannurot cadagiti buybuyotda. Ket isudanto ti agluas a maicadua.

¹⁷ Sa ti tolda ti gimong agrubbuatto nga siaadda ti sangapacarsoan dagiti Levitas iti tengnga dagiti nagpapacarso: cas ti ornosda no agpacarsoda, castanto no magnada, tunggal maysa iti lugarna iti yan ti wagaywayda.

¹⁸ Iti bangirda iti laud, agyanto ti wagayway ti sangapacarsoan ni Efraim a mayannurot cadagiti buybuyotda: ket ti pangolo dagiti annac ni Efraim isunto ni Elisama nga anac a lalaki ni Ammiud.

¹⁹ Ket ti buyotna ken dagidiay a nabilang cadacuada uppat a pulo a ribu ket lima a gasutda.

²⁰ Ket iti sibayna agyanto ti caputotan ni Manases: ket ti pangolo dagiti annac ni Manases isunto ni Gamaliel nga anac a lalaki ni Pedasur.

²¹ Ket ti buyotna ken dagidiay a nabilang cadacuada tallopulo ket dua a ribu ket duagasutda.

²² Ket ti caputotan ni Benjamin: ket ti pangolo dagiti annac ni Benjamin isunto ni Abidan nga anac a lalaki ni Gedeon.

²³ Ket ti buyotna ken dagidiay a nabilang cadacuada tallopulo ket lima a ribu ket uppat a gasutda.

²⁴ Amin dagiti nabilang iti sangapacarsoan ni Efraim sangagasut ket walo a ribu ket sangagasut a mayannurot cadagiti buybuyotda. Ket isudanto ti agluas a maicatlo.

²⁵ Iti bangirna iti amianan agyanto ti bandera ti sangapacarsoan ni Dan a mayannurot cadagiti buybuyotda: ket ti pangolo dagiti annac ni Dan isunto Ahiezer nga anac a lalaki ni Amisaddai.

²⁶ Ket ti buyotna ken dagidiay a nabilang cadacuada innem a pulo ket dua a ribu ket pito a gasutda.

²⁷ Ket dagiti agpacarsonto iti sibayna isudanto ti caputotan ni Aser: ket ti pangolo dagiti annac ni Aser isunto ni Pagiel nga anac a lalaki ni Ocran.

²⁸ Ket ti buyotna ken dagidiay a nabilang cadacuada uppat a pulo ket maysa a ribu ket lima gasutda.

²⁹ Ket ti caputotan ni Neftali: ket ti pangolo dagiti annac ni Neftali isunto ni Ahira nga anac a lalaki ni Enan.

³⁰ Ket ti buyotna ken dagidiay a nabilang cadacuada limapulo ket tallo a ribu ket uppat a gasutda.

³¹ Amin dagiti nabilang iti sangapacarsoan ni Dan sangagasut limapulo ket pito a ribu ket innem a gasutda. Isudanto ti agluas a maudi iti abay dagiti banbanderada.

³² Dagitoy isuda ti nabilang cadagiti annac ti Israel cadagiti balbalay dagiti ammada: dagup dagiti nabilang cadagiti pacpacarso a mayannurot cadagiti buybuyotda innem a gasut ket tallo a ribu, lima gasut ket limapuloda.

³³ Ngem dagiti Levitas saanda a nabilang cadagiti annac ti Israel: cas imbilin ni Jehova ken Moises.

³⁴ Castoy ti inaramid dagiti annac ti Israel; iti mayannurot iti dagup ti imbilin ni Jehova ken Moises, casta ti panagpacarsoda idi iti abay dagiti wagwagaywayda ket casta ti pinagluasda, tunggal maysa iti finamfamilia cadacuada a mayannurot cadagiti balbalay dagiti ammada.