Numero 19 - Ti Biblia (1973)

Ti pannacagugor nga aramaten dagiti dapo ti nalabaga a urbon a vaca.

¹ Ket ni Jehova nagsao cada Moises ken Aaron, a kinunana,

² Dagitoy isuda ti nagbilinan ti linteg nga imbilin ni Jehova a kinunana, Saoem cadagiti annac ti Israel a mangyegda kenca iti maysa nga urbon a vaca a nalabaga ket awan labangna, nga awan pamilawan kencuana, ken di pay naipacpaco iti sangol:

³ Ket itedyonto ken Eleazar a padi, ket isu iruarnanto iti ruar ti pacarso, ket maysa ti pumapatayto iti sangoananna:

⁴ Ket ni Eleazar a padi itinto ramayna ti pangalana iti darana, ket mangiwarsinto iti darana, nga iturongna iti sango ti tolda ti gimong, iti maminpito:

⁵ Ket maysa ti mangpuurto iti urbon a vaca iti imatangna; ti lalatna, ken ti lasagna, ken ti darana agraman ti tackina puurannanto:

⁶ Ket ti padi mangalanto iti cayo a cedro ken hisopo ken escarlata, ket isebbananto iti tengnga ti pacapuuran ti vaca.

⁷ Ti padi labaannanto dagiti cawesna, ket digosennanto ti bagina iti danum, ket iti calpasanna, sumrecto iti pacarso, ket ti padi narugitto inggana iti sumipnget.

⁸ Ket ti mangpuur iti urbon a vaca labaannanto iti danum dagiti cawes na ket digosennanto iti danum ti bagina, ket narugitto inggana iti sumipnget.

⁹ Ket maysa a tao a nadalus umongennanto dagiti dapo ti urbon a vaca ket idulinnanto iti ruar ti pacarso iti maysa a disso a nadalus; ket maaywananto nga agpaay iti gimong dagiti annac ti Israel a maysa a danum a maipaay iti kinarugit; isu ti maysa a daton gapu iti basol.

¹⁰ Ket ti nangurnong cadagiti dapo ti urbon a vaca labaannanto dagiti pagpagananayna, ket isu narugitto inggana iti sumipnget: ket isunto ti agservi a maysa nga alagaden nga agnanayon cadagiti annac ti Israel ken iti gangannaet a makinaed cadacuada.

¹¹ Ti sumagid iti bagi a natay ti siasinoman a tao saanto a nadalus iti pito nga aldaw.

¹² Isu met laeng dalusannanto ti bagina iti daydiay a danum iti maicatlo nga aldaw, ket iti maicapito nga aldaw nadalusto; ngem no dina dalusan ti bagina iti maicatlo nga aldaw, dinto ngarud nadalus iti maicapito nga aldaw.

¹³ Siasinoman a sumagid iti bagi a natay ti tao, ket saanna a dalusan ti bagina, mamulitanna ti tabernaculo ni Jehova; ket dayta a cararua maipusayto iti Israel; gapu ta ti danum a maipaay ti kinarugit saan a naiwarsi kencuana, isu saanto a nadalus; ti saanna a kinadalus adda pay la kencuana.

¹⁴ Daytoy isu ti linteg no matay ti maysa a tao iti maysa a tolda: tunggal maysa a sumbrec iti tolda, ken tunggal maysa nga adda iti tolda saanto a nadalus iti pito nga aldaw.

¹⁵ Amin nga agdadata a vaso nga awan ti calubna a naisilpo saan a nadalus.

¹⁶ Ket siasinoman a mangsagid iti maysa a natay iti campilan, wenno natay a bagi, wenno maysa a tulang ti tao, wenno maysa a tanem, iti langalang saanto a nadalus iti pito nga aldaw.

¹⁷ Ket iti maipaay iti saan a nadalus mangaladanto iti dapdapo ti napuuran a daton gapu iti basol, ket ti agayus a danum maiccanto iti maysa a vaso:

¹⁸ Ket ti maysa a tao a nadalus mangalanto iti hisopo, ket itanebnanto iti danum, ket iwarsina iti rabaw ti tolda ken amin a vasvaso ken amin a tattao nga adda idiay, casta met ken nacasagid iti tulang, wenno iti pinatay, wenno iti natay, wenno iti tanem:

¹⁹ Ket ti tao a nadalus warsiannanto ni saan a nadalus iti maicatlo nga aldaw, ken iti maicapito nga aldaw: ket iti maicapito nga aldaw dalusannanto; ket isu labaananto dagiti pagan-anayna, ket agdigosto iti danum, ket nadalusto iti sumipnget.

²⁰ Ket ti tao a saanto a nadalus ket dinanto dalusan ti bagina, dayta a cararua maipusayo iti tengnga ti gimong, gapu ta minulitanna ti santuario ni Jehova: ti danum a maipaay iti kinarugit saan a naiwarsi kencuana; isu saan a nadalus.

²¹ Ket isunto ti agnanayon a maalagad cadacuada: ket ti mangiwarsi iti danum a maipaay iti kinarugit labaannanto dagiti pagan-anayna; ket daydiay sumagid iti danum a maipaay iti kinarugit narugitto inggana iti sumipnget.

²² Ket ti uray ania a sagiden ti tao a narugit, narugitto; ket ti cararua a mangsagid iti dayta saanto a nadalus inggana iti sumipnget.