Numero 18 - Ti Biblia (1973)

Dagiti rebbeng dagiti Levitas. Ti biang dagiti papadi cadagiti datdaton. Dagiti apagcapulo maipato cadagiti Levitas.

¹ Ket ni Jehova kinunana ken Aaron, Sica ken dagiti annacmo a lallaki ken ti balay dagiti ammam agraman kenca, awitenyo ti kinadangkes ti santuario: ket sica ken dagiti annacmo a lallaki agraman kenca, awitenyonto ti kinadakes ti kinapadiyo.

² Ket dagiti cacabsatmo met a putot ni Levi a caputotan ni Amam, paasitgem ida kenca, tapno maitiponda kenca, ket agannongda kenca: ngem sica ken dagiti annacmo agraman kenca agyancayto iti sango ti tolda ti pamanecnec.

³ Ket isuda tungpalendanto ti igunamgunammo ken ti panagaywan iti amin ti Tabernaculo: isuna laeng a didanto umadani iti yan dagiti vasvaso ti santuario, ken iti yan ti altar, tapno dida matay, isuda man wenno dacayo.

⁴ Ket maitipondanto kenca, ket salimetmetandanto ti panagaywan iti tolda ti gimong, a maipaay iti isu-amin a maaramid it Tabernaculo: ket didanto umadani kenca dagiti sangsangaili.

⁵ Ket salimetmetanyonto ti pannacaaluad ti santuario ken ti pannacaaluad ti altar: tapno awanton coma ti pungtot a maipaay cadagiti annac ti Israel.

⁶ Ket siac, adtoy, innalac dagiti cacabsatmo a Levitas cadagiti annac ti Israel: isuda ti maysa a sagut a naited ken Jehova, tapno agservida iti tolda ti gimong.

⁷ Ket sica ken dagiti annacmo a lallaki agraman kenca salimetmetanyonto ti kinapadiyo iti isu-amin a banbanag ti altar, ken maipaay ti adda iti uneg ti abbong: ket agservicayto: itedco cadacayo ti kinapadi cas sagut nga annongen: ket ti sangsangaili nga umadani mapapatayto.

⁸ Ket ni Jehova nagsao ken Aaron, Ket siac, adtoy, intedco kenca ti pannacaaywan dagiti datdatonco a maitayag, uray amin dagiti nasantoan a banbanag dagiti annac ti Israel; intedcon ida kenca ken cadagiti annacmo a pannacabagi nga agnanayon maipuon iti pannacasapsapo.

⁹ Daytoy isunto ti cucuam dagiti nasantoan unay a banbanag a mailisi iti apuy: tunggal datonda, uray tunggal datonda a daton a macan, ken tunggal datonda gapu iti basol, ken tunggal datonda gapu iti salungasing nga idatagda caniac isudanto ti nasantoan unay kenca, ken cadagiti annacmo a lallaki.

¹⁰ Cas iti nasantoan, unay mangancanto idiay; tunggal lalaki; a mangan idiay nasantoanto kenca.

¹¹ Ket dagitoy ti cucuam; ti daton a maitayag ti isagutda, amin met laeng a datdaton a mailili dagiti annac ti Israel; itedco ida kenca, ken cadagiti annacmo a lallaki, ken cadagiti annacmo a babai agraman kenca, a pannacabiangda nga agnanayon: tunggal maysa a nadalus iti balaymo manganto cadagidiay.

¹² Amin a casasayaatan ti lana, ken amin a casasayaatan ti arac, ken iti bucbuckel, dagiti umuna a bungbungada nga itedda ken Jehova, intedcon ida kenca.

¹³ Dagiti umuna a bungbunga a naloom dagiti isu-amin nga adda iti dagada nga yegda ken Jehova, cucuamto; tunggal maysa a nadalus iti balaymo manganto cadagitoy.

¹⁴ Amin a banbanag nga impaay ti Israel, cucuamto.

¹⁵ Amin a manglucat iti aanacan iti amin a lasag nga idatonda ken Jehova, tao man ken animal, cucuamto: nupay casta ti inauna nga anac ti tao, di-bumurong a subbotemto, ket ti umuna nga anac dagiti saan a nadalus nga animal subbotemto.

¹⁶ Ket dagiti masubbot cadacuada manipud agtawen iti maysa a bulan subbotemto cas mayannurot iti panggatadam a catutupanna iti pirac a lima a siclo, cas ti siclo ti santuario (isu a duaplo a gera.)

¹⁷ Ngem ti inauna nga urbon ti maysa a vaca, wenno inauna nga anac ti carnero, wenno ti inauna ti maysa a calding, dicanto subsubboten; isuda nasantoanda: iwarsimto ti darada iti rabaw ti altar, ket puuramto ti tabada, a daton maaramid iti apuy a maipaay a nabanglo a sayamusom ken Jehova.

¹⁸ Ket ti lasagda cucuamto, cas ti barucong a mailili, ken cas ti luppo a macanawan, cucuamto.

¹⁹ Amin dagiti daton a maitayag cadagiti nasantoan nga irucbab dagiti annac ti Israel ken Jehova intedco kenca cadagiti annacmo a lallaki, ken cadagiti annacmo a babai, agraman kenca, cas maysa a pannacabagi nga agnanayon: isu ti maysa a tulag ti asin nga agnanayon kenca, ken cadagiti putotmo agraman kenca, iti sango ni Jehova.

²⁰ Ket ni Jehova kinunana ken Aaron, Sica awanto ti tawidmo iti dagada, wenno awanto ti binglaymo cadacuada: Siac ti bagim ken tawidmo iti nagtengngaan dagiti annac ti Israel.

²¹ Ket cadagiti annac ni Levi, adtoy, intedco amin nga apagcapullo iti Israel a maysa a tawid, a supapac ti annong nga ipaayda, a panagannong met laeng iti tolda ti gimong.

²² Manipud ita dagiti annac ti Israel didanto umasideg iti tolda ti gimong, di la ket ta amitenda ti basol ket matayda.

²³ Ngem dagiti Levitas aramidendanto ti annong ti tolda ti gimong, ket baclayendanto ti kinadakesda: isu ti maalagadto iti agnanayon cadagiti capcaputotanyo ken cadagiti annac ti Israel, isuda awanto ti tawidda.

²⁴ Ta ti apagcapullo dagiti annac ti Israel, nga irucbabda, a daton a maitayag ken Jehova, intedcon a maysa a tawid cadagiti Levitas: isu ti gapuna nga insaoc cadacuada, Cadagiti annac ti Israel awanto ti tawidda.

²⁵ Ket ni Jehova nakisao ken Moises, a kinunana,

²⁶ Maysa pay saoemto cadagiti Levitas, ket cunam cadacuada, No alaenyo cadagiti annac ti Israel ti apagcapullo nga intedco cadacayo nga aggapu cadacuada a tawidyo, mangirucbabcayto ngarud iti dayta iti maysa a daton a maitayag ken Jehova, a maysa nga apagcapullo nga agtaud iti apagcapullo.

²⁷ Ket ti maitayag a datonyo mabilangto cadacayo a cas la cadagiti bukel ti pagtaltagan, ken cas ti kinawadwad ti arac iti pagpespesan.

²⁸ Castoy met ti panangirucbabyonto iti daton a maitayag ken Jehova cadagiti amin nga apagcapulloyo nga awatenyo cadagiti annac ti Israel; ket cadagitoy itedyonto ti daton a maitayag ken Jehova a maipaay ken Aaron a sacerdote.

²⁹ Iti dagup dagiti sagsagutyo ipaayyonto amin ti daton a maitayag ken Jehova, iti dagup ti casasayaatanna, a ti pasetna a napasanto.

³⁰ Isu ti gapuna a saoem cadacuada, No itayagyo ti casasayaatan a nayonna, maibilangto ngarud cadagiti Levitas, a cas ti apit ti pagtaltalgan ken cas ti apit ti pagpespesan ti arac.

³¹ Ket canenyonto iti tunggal dissoyo dacayo ken dagiti cabbalayyo: ta isu ti gongonayo a caanatup ti panaganongyo iti tolda ti gimong.

³² Ket dacayo dicayto agawit iti basol gapu iti dayta, no intayagyon ti nayonna a casayaatan: ket dicayto mulitan dagiti nasantoan a banbanag dagiti annac ti Israel, tapno dicay matay.