Numero 17 - Ti Biblia (1973)

Ti sarucod ni Aaron agsaringit.

¹ Ket ni Jehova nakisao ken Moises, a kinunana,

² Saoem cadagiti annac ti Israel, ket mangalaca cadacuada cadagiti sarsarucod, maysa iti intunggal balay dagiti ammada, cadagiti amin a pangpangoloenda a maitutop cadagiti balbalay dagiti ammada, sangapulo ket dua a sarucod: isuratmo ti nagan ti tunggal maysa a tao iti sarucodna.

³ Ket isuratmonto ti nagan ni Aaron iti sarucod ni Levi: ta addanto maysa a sarucod iti tunggal olo dagiti balbalay dagiti ammada.

⁴ Ket idulinmonto ida iti tolda ti gimong iti sango ti pamanecnec a pangsaracac cadacayo.

⁵ Ket maaramidto a ti tao a piliecto, agsabongto ti sarucodna: ket pagsardengecto dagiti dandanengdeng dagiti annac ti Israel, a panangdanengdengda iti maicaniwas cadacayo.

⁶ Ket ni Moises sinaona cadagiti annac ti Israel, ket amin a pangoloenda intedda kencuana dagiti sarsarucod, iti tunggal pangolo maysa a mayanatup cadagiti balbalay dagiti ammada, a sangapulo met laeng ket dua a sarsarucod: ket ti sarucod ni Aaron adda idi cadagiti sarsarucodda.

⁷ Ket ni Moises indulinna dagiti sarsarucod iti sango ni Jehova iti tolda ti pamanecnec.

⁸ Ket naaramid nga iti simmuno a bigat, ni Moises simrec iti tolda ti pamanecnec: ket adtoy ta ti sarucod ni Aaron a maipabiang iti balay ni Levi, nagsaringit, ken nagbusel, ket nagsabong, ket namataud iti naloom nga almendras.

⁹ Ket ni Moises inruarna amin a sarsarucod iti sango ni Jehova nga impanna cadagiti amin nga annac ti Israel: ket kinitada ida ket innalada tumunggal maysa a lalaki ti sarucodna.

¹⁰ Ket ni Jehova kinunana ken Moises, Isublim nga icabil ti sarucod ni Aaron iti sango ti pamanecnec tapno masalimetmetan nga agservi a pagtandaanan a maibusor cadagiti annac ti kinasungit; tapno mapaggibusmo dagiti tantanabutob a maicaniwas caniac, tapno dida matay.

¹¹ Castoy ti inaramid ni Moises: cas imbilin ni Jehova kencuana, casta ti inaramidna.

¹² Ket dagiti annac ti Israel nakisaoda ken Moises, a kinunada, Adtoy mataycami, madadaelcami, madadaelcami a natalipupus.

¹³ Tunggal maysa nga umasideg, nga umadani iti tabernaculo ni Jehova matay: dacami amin mataycamto?