Numero 16 - Ti Biblia (1973)

Ti yaalza ni Core. Ti pannacadusa dagiti immalza. Ti pannacaaramat dagiti paginciensoan dagiti immalza. Agtanabutob ti ili ket ti maysa a didigra maibaon.

¹ Ket ni Core nga anac a lalaki ni Isar nga anac a lalaki ni Coat nga anac a lalaki ni Levi, agraman ni Datan ken Abiram nga anac a lallaki ni Eliab, ken ni Hon nga anac a lalaki ni Pelet, annac ida ni Ruben, nangalada cadagiti lallaki:

² Ket timmacderda iti sango ni Moises, a cacanunongda dagiti dadduma nga annac ti Israel, a duagasut ket limapulo a pangpangolo ti gimong, a naayaban iti gimong, lallaki a nadayaw;

³ Ket naguummongda a nagtitipon iti maibusor cada Moises ken Aaron, ket kinunada cadacuada, Nalabes ti panagindadackelyo, idinto a ti amin a gimong nasantoanda, tunggal maysa cadacuada, ket ni Jehova siaadda cadacuada: Apayapay ngarud nga ipangpangronayo nga itatan-oc dagiti bagbagiyo iti gimong ni Jehova?

⁴ Ket ni Moises idi nangngegna nagpacleb:

⁵ Ket nakisao ken Core ken amin a cadduana, a kinunana, Intono bigat, iparangto ni Jehova no asino ti taona, ken asino ti nasantoan, ken paasitgennanto iti dennana: a ti piliennanto met laeng, paasitgennanto kencuana.

⁶ Daytoy ti aramidenyo; mangalacayo cadagiti paginciensoan, ni Core ken amin a cadduana;

⁷ Ket iccanyo ida iti apuy, ket iccanyo iti rabawda iti incienso iti sango ni Jehova intono bigat: ket maaramidto a ti lalaki a pilien ni Jehova, isunto ti santo; dacayo nalabes ti panagindadackelyo, dacayo nga annac ni Levi.

⁸ Ket ni Moises kinunana ken Core, Denggenyo ita dacayo nga annac ni Levi.

⁹ Ipapanyo ngata a bassit cadacayo ti pinangilasin ni Jehova cadacayo iti gimong ti Israel, tapno yadanicayo kencuana met laeng; tapno aramidenyo ti panagservi iti tabernaculo ni Jehova, ken tapno agyancayo iti sango ti gimong nga agannong cadacuada?

¹⁰ Ken tapno inyasidegnaca ken amin a cacabsatmo nga annac a lalaki ni Levi agraman kenca? ket sapulenyo met ti panagpadi?

¹¹ Isu ti gapuna a sica ken amin a cadduam nagtitiponcayo a naummong a bumusor ken Jehova: ket ni Aaron, Siasino aya a pagdanengdenganyo iti maibusor kencuana?

¹² Ket ni Moises nagbaon iti immayab cada Dahan ken Abiram, nga annac a lallaki ni Eliab: ket isuda kinunada, Dicamto sumang-at:

¹³ Bassit a banag aya ti pinangaonmo cadacami iti maysa a daga nga agay-ayus ti gatas ken diro tapno patayennacami iti let-ang, ngem masapulmo met a pagbalinen ti bagim a maysa a pangolo cadacami?

¹⁴ Maysa pay dinacami inyeg iti maysa a daga nga agay-ayus ti gatas ken diro, wenno iniccannacami iti tawiden a taltalon ken cauv-uvasan: suatem aya dagiti matmata dagitoy a lallaki? Dicamto sumang-at.

¹⁵ Ket ni Moises nagunget la unay idi, ket kinunana ken Jehova, Dica ipatpateg dagiti datdatonda: diac nangala iti maysa nga asno cadacuada, wenno nangranggas iti maysa cadacuada.

¹⁶ Ket ni Moises kinunana ken Core, Agyancayto, sica ken amin a gimongmo, iti sango ni Jehova, sica ken isuda, ken ni Aaron intono bigat:

¹⁷ Ket mangalacayo, tumunggal maysa a lalaki, iti paginciensoanna, ket iccanyo ida ti incienso, sa yegyonto iti sango ni Jehova, tunggal lalaki ti paginciensoanna, duagasut ket limapulo a paginciensoan; sica met ken ni Aaron tunggal maysa ti paginciensoanna.

¹⁸ Ket isuda nangalada, ti tunggal lalaki, ti paginciensoanna, ket iniccanda ida iti apuy, sada pinisucan iti incienso, ket nagyanda iti ruangan ti tolda ti gimong, agraman cada Moises ken Aaron.

¹⁹ Ket ni Core inummongna ti dagup ti gimong a maibusor cadacuada iti ruangan ti tolda ti gimong: ket ti dayag ni Jehova nagparang iti amin a gimong.

²⁰ Ket ni Jehova nakisao cada Moises ken ni Aaron, a kinunana,

²¹ Makilasincayo iti daytoy a gimong, tapno ibusec ida iti apagdaricmat.

²² Ket nagpaclebda ket kinunada, O Dios, a Dios dagiti espiritu ti isu-amin a lasag, macabasolto ti maysa a tao, ket sica pagungtamto iti dagup ti gimong?

²³ Ket ni Jehova nakisao ken Moises, a kinunana,

²⁴ Ibagam iti gimong a cunam, Adayoanyo ti naglawlaw iti tabernaculo da Core, Datan ken Abiran.

²⁵ Ket ni Moises timmacder ket napan iti yan da Datan ken Abiram; ket dagiti lallacay ti Israel simmurotda kencuana.

²⁶ Ket nagsao iti gimong, a kinunana, Panawanyo, dawatec cadacayo, dagiti toltolda dagitoy nadangkes a lallaki, ket dicay sumagid iti cucuada, di la ket ta mapucawcayo cadagiti basbasolda.

²⁷ Gapuna nga inadayoanda ti tabernaculo da Core, Datan ken Abiram iti isu-amin a sikigan: ket da Datan ken Abiram rimmuarda ket nagyanda iti ruangan dagiti toldada ken dagiti assawada, ken dagiti annacda a lallaki, ken dagii basbassitda.

²⁸ Ket ni Moises kinunana, Gapu iti daytoy ammoenyo a ni Jehova imbaonnac a nangaramid cadagitoy a gapuanan; ta diac inaramid ida a nakemco laeng.

²⁹ No dagitoy a tattao matayda coma iti toltoldada iti sapasap a pacatayan dagiti amin a tattao, wenno no masucnalanda coma cas pannacasucnal ti isu-amin a tattao; ngarud ni Jehova dinac imbaon.

³⁰ Ngem no ni Jehova aramidenna ti baro a banag ket ti daga ngangaenna ti ngiwatna, ket alununenna ida agraman amin a cucuada, ket sibibiagda a macarasocos iti tanem, maawatanyonto ngarud a dagitoy a lallaki inumsida ni Jehova.

³¹ Ket naaramid nga idi nalpasna nga impalawag amin dagitoy a sasao nagbir-ri ti daga iti babaenda,

³² Ket ti daga nginangana ti ngiwatna ket inalun-unna ida, ken dagiti famfamiliada, ken amin a lallaki a naibuyot ken Core, ken amin a cucuada.

³³ Iti casta, isuda ken amin a kimmanunong cadacuada nacaranoconda a sibibiag iti tanem: ket ti daga kinaemanna ida, ket natayda iti tengnga ti gimong.

³⁴ Ket amin ti Israel nga adda idi iti lawlawda nagtarayda idi a nagickisda: ta kinunada. Di la ket ta alun-unennacami ti daga.

³⁵ Ket rimmuar ti apuy nga aggapu ken Jehova, ket inalun-unna dagiti dua gasut ket limapulo a lallaki a nangipaay iti incienso.

³⁶ Ket ni Jehova nagsao ken Moises, a kinunana,

³⁷ Ibagam ken Eleazar, nga anac a lalaki ni Aaron a padi, nga alaenna dagiti paginciensoan iti darang ti apuy, ket iwarsim ti apuy iti adayo; ta isuda nasantoanda,

³⁸ Uray dagiti paginciensoan dagitoy managbasol a maicaniwas iti bibiagda met laeng; ket papitpitmo ida nga agservi a calupcup ti altar: ta indatonda met ida iti sango ni Jehova, isu ti gapuna a nasantoanda: ket isudanto ti maysa a pagtandaanan cadagiti annac ti Israel.

³⁹ Ket ni Eleazar a padi innalana dagiti paginciensoan a suer nga indaton dagidi napuuran: ket pinitpitda ida a pagcalupcup iti altar:

⁴⁰ Nga isu ti panglaglagipan a maipaay cadagiti annac ti Israel, tapno awan ti gangannaet a saan a putot ni Aaron nga umasideg a mamasged iti incienso iti sango ni Jehova; tapno saan coma a cas ken Core, ken cas cadagiti cadduana: cas imbaga ni Jehova kencuana nga inaramatna ni Moises.

⁴¹ Ngem idi simmaruno a bigat amin a gimong dagiti annac ti Israel nagtanabutobda iti maicaniwas cada Moises ken Aaron, a kinunada, Pinapatayyo dagiti tattao ni Jehova.

⁴² Ket naaramid idi a ti gimong nagtitipon a bimmusor cada Moises ken Aaron, kimmitada iti tolda ti gimong; ket adtoy, ti ulep inabungotanna, ket ti dayag ni Jehova nagparang.

⁴³ Ket da Moises ken ni Aaron immayda iti sango ti tolda ti gimong.

⁴⁴ Ket ni Jehova nakisao ken Moises a kinunana,

⁴⁵ Makilasincayo iti daytoy a gimong, tapno ibusec ida iti apagdaricmat, ket isuda nagpaclebda.

⁴⁶ Ket ni Moises sinaona ken Aaron, Alaem ti paginciensoam, ket iccam iti apuy nga aggapu iti altar, ket iccamto iti incienso, ket dardarasem nga ipan iti gimong, ket aramidem ti pannacaabbongda: ta ti unget addan a rimmuar ken Jehova; ti didigra narugianen.

⁴⁷ Ket ni Aaron innalana cas imbaga ni Moises, ket nagtaray a napan iti tengnga dagiti naum-ummong; ket, adtoy, ti didigra nairugi iti nagtengngaan dagiti tattao: ket imparabawna ti incienso, ket inaramidna ti pannacaabbong ti ili.

⁴⁸ Ket nagtacder iti baet dagiti natay ken dagiti nabiag; ket ti didigra napasardeng.

⁴⁹ Ket dagiti natay iti didigra sangapulo ket uppat a ribu pitogasutda sabali pay dagiti natay a gapu ken Core.

⁵⁰ Ket ni Aaron nagsubli ken Moises iti ruangan ti tolda ti gimong; ket ti didigra napasardeng.