Numero 15 - Ti Biblia (1973)

Linlinteg maipapan cadagiti datdaton. Ti pannacadusa ti di nagngilin iti panaginana. Pannacaibilin dagiti parparaypay.

¹ Ket ni Jehova nakisao ken Moises, a kinunana,

² Saoem cadagiti annac ti Israel, ket cunam cadacuada, No macastreccayto iti daga a pagnaedanyo nga itedco cadacayo,

³ Ket mangaramidcayto iti maysa a daton iti apuy ken Jehova, maysa a daton a mapuuran, wenno maysa a sacrificio, a pagtungpal iti cari, wenno cas maysa a daton ti sibubulos a nakem, wenno cadagiti natudingan a fifiestayo, tapno maaramid ken Jehova ti maysa a nabanglo a sayamusom, pangen dagiti an-animal a dadackel, wenno arban dagiti an-animal a babassit:

⁴ Ti mangipaayto ngarud ti irucbabna, idatonna ken Jehova ti daton a macan nga apagcapulo ti maysa nga efa ti namayecmec nga harina a nagamayan iti apagcapat ti maysa nga hin a lana:

⁵ Ket ti arac a daton nga inumen, nga apagcapat ti maysa nga hin, saganaemto agraman ti daton a mapuuran, wenno maipaay a sacrificio a cacuyog ti tunggal cordero.

⁶ Wenno ti cacuyog ti tunggal carnero a lalaki saganaemto a maipaay a daton a macan ti dua nga apagcapulo ti maysa nga efa ti namayecmec nga harina a nagamayan iti maysa nga apagcatlo ti maysa nga hin a lana:

⁷ Ket ti maipaay a daton nga inumen, idatagmonto ti apagcatlo ti maysa nga hin nga arac, a nabanglo a sayamusom ken Jehova.

⁸ Ket no agsaganaca iti maysa a lalaki a vaca a maipaay a daton a mapuuran, wenno maipaay a maysa a sacrificio a pagtungpal iti cari, wenno maipaay a datdaton ti cappia ken Jehova;

⁹ Idatagmonto ngarud, agraman ti lalaki a vaca, ti maysa a daton a macan a tallo nga apagcapulo ti maysa nga efa ti namayecmec nga harina a nagamayan iti guddua ti maysa nga hin a lana.

¹⁰ Ket irucbabmonto a daton nga inumen ti guddua ti maysa nga hin nga arac, a maysa a daton a maaramid iti apuy a nabanglo a sayamusom ken Jehova.

¹¹ Castoy ti maaramidto iti tunggal lalaki a vaca, wenno tunggal maysa a carnero a lalaki, wenno tunggal maysa a cordero a lalaki, wenno cadagiti urbon a calcalding.

¹² Cas mayannurot iti bilang a saganaenyonto, casta ti aramidenyonto iti tunggal maysa a mayabuloy iti bilangda.

¹³ Amin a nayanac iti caputotanyo aramidennanto dagitoy a mayalubog itoy a wagas iti panangipaay iti apuy a nabanglo a sayamusom ken Jehova.

¹⁴ Ket no maysa a gangannaet a makipagnaed cadacayo, wenno siasino nga addanto cadacayo cadagiti caputotanyo, ket mangipaayto iti maysa a daton a maaramid iti apuy nabanglo a sayamusom ken Jehova; cas ti aramidenyo castamet ti aramidennanto.

¹⁵ Iti maipaay iti gimong, addanto maymaysa nga alagaden nga annuroten cadacayo, ken iti gangannaet a makipagnaed cadacayo, maymaysa nga alagaden nga agnanayon agpapan pay putputotyo: cas ti casasaadyo, castantomet ti gangannaet iti sango ni Jehova.

¹⁶ Maymaysa a linteg ken maymaysa a nagbilinan isunto ti maalagad cadacayo ken maalagad iti gangannaet a makipagnaed cadacayo.

¹⁷ Ket ni Jehova nakisao ken Moises, a kinunana,

¹⁸ Ibagam cadagiti annac ti Israel, ket saoem cadacuada, No macastreccayo iti daga a pangipanac cadacayo,

¹⁹ Maaramidto ngarud, nga, no mangancayo iti tinapay ti daga, mangipaaycayto iti maysa a daton a maitayag ken Jehova.

²⁰ Iti umuna cadagiti gamayyo mangidatoncayto iti maysa a bibingca a maipaay a daton a maitayag cas panangaramidyo iti maitayag a daton ti pagtaltagan, casta ti panangingatoyo.

²¹ Iti umuna cadagiti gamayyo itedyonto ken Jehova a maysa a daton a maitayag agpapan capcaputotanyo.

²² Ket no bumiddutcayo ken dicayo tungpalen amin dagiti bilbilin nga imbaga ni Jehova ken Moises,

²³ Amin met laeng nga imbaga ni Jehova cadacayo iti pannacaaramat ni Moises nanipud idi aldaw a panangted ni Jehova iti bilinna agpapan capcaputotanyo;

²⁴ Maaramidto ngarud, a no naaramid a di ginagara, a saan nga ammo ti gimong, amin a gimong mangipaayto iti maysa a bumaro a vaca a daton a mapuuran, a nabanglo a sayamusom ken Jehova, agraman ti datonna a macan, ken ti datonna a mainum, cas mayannurot iti nagbilinan, ken maysa a lalaki a calding a daton gapu iti basol,

²⁵ Ket ti padi aramidennanto ti pannacaabbong a maipaay iti gimong dagiti annac ti Israel, ket isuda mapacawandanto; ta isu maysa a biddut; ket inyegda dagiti datonda a maysa a daton a naaramid iti apuy ken Jehova, ken datonda gapu iti basol iti sango ni Jehova a maipaay iti biddutda:

²⁶ Ket amin a gimong dagiti annac ti Israel mapacawanto, casta met tigangannaet a makipagnaed cadacuada; ta iti biang dagiti amin a tao, naaramid a di-ginagara.

²⁷ Ket no ti maysa a tao macabasol a dina ginagara, mangidatagto ngarud iti maysa a cabayan a calding nga agtawen iti maysa, a daton gapu iti basol.

²⁸ Ket ti padi mangaramidto iti pacaabbongan a maipaay iti cararua a bumiddut no macabasol a dina gagaraen iti sango ni Jehova, tapno aramidenna ti pannacaabbongna; ket mapacawanto.

²⁹ Addaancayto iti maysa a linteg a maipaay iti adda maaramidna a dina gagaraen, tubo man cadagiti annac ti Israel wenno gangannaet a makipagnaed cadacuada.

³⁰ Ngem ti tao nga adda aramidna iti napalangguad nga ima, tubo man wenno gangannaet, isu met laeng agbassawang ken Jehova; ket dayta a cararua maipusayto iti ilina.

³¹ Gapu ta isu dina intaltalec ti sao ni Jehova, ket sinalungasingna ti bilinna; dayta a tao matalipupusto a maipusay, ti kinadakesna maipabaclayto kencuana.

³² Ket idi caadda dagiti annac ti Israel iti let-ang, nasaracanda ti maysa a lalaki nga agummong ti sungsungrod iti aldaw a panaginana.

³³ Ket dagiti nacasarac kencuana nga agur-urnong iti sungsungrod inyegda cada Moises ken Aaron, ken iti amin a gimong,

³⁴ Ket imbaludda, gapu ta saan pay a naikeddeng no ania ti maaramid coma kencuana.

³⁵ Ket ni Jehova kinunana ken Moises, Ti lalaki pudno a mapapatayto: dagup ti gimong uburendanto cadagiti batbato iti ruar ti pacarso.

³⁶ Ket amin a gimong inyegda iti ruar ti pacarso, ket inuburda cadagiti batbato, tapno natay; cas imbilin ni Jehova ken Moises.

³⁷ Ket ni Jehova nakisao ken Moises, a kinunana,

³⁸ Ibagam cadagiti annac ti Israel, ket ibilinmo cadacuada a mangaramidda iti agservi cadacuada a parparaypay cadagiti gayadan dagiti cawesda, agpapan cadagiti putputotda, ket icabildanto iti rabaw ti paraypay ti tunggal gayadan ti maysa a lubid nga azul:

³⁹ Ket agservinto cadacayo a paraypay, tapno makitkitayo, ket malagipyo dagiti amin a bilbilin ni Jehova, ket sungpotenyo ida; ken tapno dicay sursuroten ti pusoyo met laeng ken dagiti matmatayo met laeng a mangipacadawyan cadacayo iti panagbalangcantis;

⁴⁰ Tapno laglagipenyo ken aramidenyo amin a bilbilinco, ken nasantoancayo iti Diosyo.

⁴¹ Siac ni Jehova a Diosyo, a nangaon cadacayo iti daga nga Egipto, tapno siac ti Diosyo, siac ni Jehova a Diosyo.