Numero 14 - Ti Biblia (1973)

Agsungit ti ili. Ti layat ni Jehova ken ti panangibabaet ni Moises. Dagiti uppat a pulo a tawen a panagwalangwalang isuda ti pangbabalawan. Ti ili maabac sadiay Horma.

¹ Idin amin ti gimong nagickis, ket nagpuccaw, ket dagiti tattao nagsangitda iti daydi a rabii.

² Ket amin nga annac ti Israel nagdanengdengda iti maicaniwas ken Moises, ken maicaniwas ken Aaron: ket ti dagup ti gimong kinunada cadacuada, Dicami coma ket natay iti daga nga Egipto! wenno dicami coma ket natay ditoy a let-ang!

³ Ket ania ti gapuna nga inyegnacam ni Jehova ditoy a daga, tapno maipasagcami iti campilan? dagiti assawami ken dagiti babassitmi isudanto ti maranggasan: di coma nasayaat cadacami nga agsublicam sadi Egipto?

⁴ Ket kinunada ti maysa ken maysa cadacuada, Mamangontay coma iti maysa a capitan, ket agsublitay coma sadi Egipto.

⁵ Ni Moises ngarud ken ni Aaron nagpaclebda iti sango ti amin a natiptipon a gimong dagiti annac ti Israel.

⁶ Ket ni Josue nga anac ni Nun, ken ni Caleb nga anac ni Jefone isuda a naicadua cadagiti nagsimisim iti daga, rinay-abda dagiti cawesda:

⁷ Ket kinunada cadagiti amin a sigigimong nga annac ti Israel a kinunada, Ti daga a linasatmi a sinimisiman isu ti maysa nga aglablabes ti imbagna a daga.

⁸ No ni Jehova caay-ayonatayo, yegnatayto ngarud iti daytoy a daga, ket itednanto cadatayo; maysa a daga nga agayus ti gatas ken diro.

⁹ Isuna laeng nga dicayo coma cumaniwas ken Jehova, wenno dicayo agbuteng cadagiti tattao iti dayta a daga; ta isuda ti taraon nga agpaay cadatayo: ti sarikedkedda naiccat cadacuada, ket ni Jehova adda cadatayo: dicay agbuteng cadacuada.

¹⁰ Ngem amin a gimong cayatda nga uburen ida iti batbato. Ket ti dayag ni Jehova nagparang iti tolda ti gimong cadagiti amin nga annac ti Israel.

¹¹ Ket ni Jehova kinunana ken Moises, Casanonto ti cabayag ti panangumsina caniac daytoy nga ili? Casanonto ti cabayag ti dida pammati caniac, gapu cadagiti amin a pagilasinan nga inaramidco iti tengngada?

¹² Didigraecto ida iti angol, ket diacto pagtawiden ida, ket aramidencanto a maysa a nacion a dacdackel ken manmannacabalin ngem isuda.

¹³ Ket ni Moises kinunana ken Jehova, No casta dagiti taga Egipto maammoandanto; gapu ta inaonmo daytoy nga ili babaen iti pannacabalinmo iti tengngada;

¹⁴ Ket ibagadanto cadagiti agnaed ditoy a daga: isuda ammoda a sica a Jehova addaca iti tengnga daytoy a ili; ta sica a Jehova makitadaca iti nalatac, ket ti ulepmo agtindec iti ngatoenda, ket mapanca iti sangoda, iti maysa a monmon nga ulep no aldaw, ken maysa a monmon nga apuy no rabii.

¹⁵ Ita no papatayemto daytoy nga ili cas maymaysa a tao, dagiti il-ili ngarud a nacaammo iti damagmo, saoendanto a cunada,

¹⁶ Gapu ta ni Jehova dina nabalinan nga iserrec daytoy nga ili iti daga nga insapatana cadacuada, isu ti gapuna a pinapatayna ida iti let-ang.

¹⁷ Ket ita, dawatec kenca, dackel coma ti pannacabalin ti Apo, cas sinaom, a kinunam,

¹⁸ Ni Jehova nabannayat nga agpungtot, ket aglablabonan iti caasi a naayat, mamacawan iti kinadakes ken iti kinasalungasing ket uray apagapaman dina baybay-an ti macabiddut, a pasarungcaranna ti kinadakes dagiti amma cadagiti annac, cadagiti maicatlo ken maicapat a caputotan.

¹⁹ Pacawanem, dawatec, kenca, ti kinadakes daytoy nga ili, cas iti kinadakel ti caasim a naayat, ken mayannurot iti panangpacawanmo itoy nga ili, nanipud sadi Egipto agpapan ita.

²⁰ Ket ni Jehova kinunana, Pinacawanco cas mayabuloy iti saom:

²¹ Ngem pudno unay, cas siac sibibiagac ken cas amin ti daga mapnodanto iti dayag ni Jehova;

²² Gapu ta amin dagidiay a tattao a nacakita iti dayagco, ken dagiti pagilasinac a gapuanac sadi Egipto ken iti let-ang, nupay casta sinuutdac cadagitoy naminsangapulo daras, ket dida impangag ti timecco.

²³ Pudno isuda didanto makita ni daga nga insapatac cadagiti ammada, wenno siasinoman cadagiti nangumsicaniac dinanto makita:

²⁴ Ngem ni adipenco a Caleb, gapu ta adda sabali a di-simmina, isu iserrecconto iti daga a napananna; ket dagiti putona agtagicuadanto.

²⁵ Ita dagiti Amalecita ken dagiti Cananeo agnaedda iti lobong: intono bigat agsublicayo ket dumanoncayo let-ang iti dalan nga agpa-Baybay a Nalabaga.

²⁶ Ket ni Jehova imbagana ken Moises ken ni Aaron, a kinunana,

²⁷ Casanonto ti cabayag ti panaganuco itoy dakes a gimong nga agdanengdeng iti maicaniwas caniac? Nangngegco dagiti danengdeng dagiti annac ti Israel nga agdanengdengda iti maicaniwas caniac.

²⁸ Saoem cadacuada, Cas siac sibibiagac, cuna ni Jehova, kinaagpaysona, a cas ti sinaoyo cadagiti lapayagco, casta ti aramidecto cadacayo:

²⁹ Ditoyto a let-ang pagpasagan dagiti bangcayyo: ken amin dagiti nabilang cadacayo, cas mayannurot iti dagup ti bilangyo, manipud iti duapulo ti tawenna ken agpangato a nagdanengdeng iti maicaniwas cania,

³⁰ Pudno a dicayto macastrec iti daga a nacaipuonan ti nangisapataac tapno pagnaedencayo idiay, malacsid ni Caleb nga anac ni Jefone; ken ni Josue, nga anac ni Nun.

³¹ Ngem dagiti babassityo a sinaoyo nga isudanto ti maranggasan isudanto ti iserrecco, ket isudanto ti macaammo iti daga nga inuyawco.

³² Ngem ti maipapan cadacayo, dagiti bangcayyo a natay agpasagdanto ditoy a let-ang.

³³ Ket dagiti annacyo agwalangwalangdanto iti let-ang cadagiti uppat a pulo a tawen, ken awitendanto dagiti kinabalangcantisyo, inggana iti di maibus dagiti bangcayyo iti let-ang.

³⁴ Mayannatup ti bilang dagiti al-aldaw a pinagsimisimyo iti daga nga isu ti uppat a pulo nga aldaw, ti tunggal aldaw cabatoganna ti maysa a tawen, nga uppat a pulo met laeng a tawen, ket maammoanyonto ti isisinac.

³⁵ Siac a Jehova sinaoc, pudno a daytoy aramidecto iti amin daytoy dakes a iti maicaniwas caniac: iti daytoy a let-ang maibusdanto, ket idiay mataydanto.

³⁶ Ket dagiti lallaki a ni Moises imbaonna a nagsimisim iti daga, a nagsubli ken namagdanengdeng isuda iti amin a gimong iti maicaniwas kencuana, iti panangidanonda iti maysa a dakes a damag a maisupadi iti daga.

³⁷ Dagidiay met laeng a lallaki a nangidanon iti dakes a damag ti daga natayda iti didigra iti sango ni Jehova.

³⁸ Ngem ni Josue nga anac lallaki ni Nun ken ni Caleb nga anac a lallaki ni Jefone natdada a sibibiag cadagidiay a tattao a napan nagsimisim iti daga.

³⁹ Ket ni Moises pinalawagna dagitoy a sasao cadagiti annac ti Israel: ket ti ili naglidayda iti dackel unay.

⁴⁰ Ket bimmangonda a nasapa iti bigat, ket simmang-atda iti tapaw ti bantay a kinunada, Adtoy addacami ditoy, ket ala sumang-atcamto iti disso nga incari ni Jehova: ta nagbasolcami.

⁴¹ Ket ni Moises kinunana, Apayapa ita salungasingenyo ti bilin ni Jehova, idinto a kitkitaenyo nga awanto ti pagbanaganna a naimbag?

⁴² Dicay sumang-at, ta ni Jehova awan cadacayo; tapno dicayo macabil iti sango dagti cabusoryo.

⁴³ Ta idiay dagiti Amalecita, ken dagiti Cananeo addada iti sangoyo, ket mapasagcayto iti capilan: gapu ta naglicudcayo iti isusurot ken Jehova, isu ti gapuna nga awanto cadacayo ni Jehova.

⁴⁴ Ngem isuda nagpangasda a simmang-at iti tapaw ti bantay: nupay casta ti lacasa ti tulag ni Jehova, ken ni Moises saanda a pimmanaw iti pacarso.

⁴⁵ Idin dagti Amalecita simmalogda, ken dagti Cananeo a nagnaed iti dayta a bantay, ket kinabilda ida, ket pinarmecda ida inggana iti Horma.