Numero 13 - Ti Biblia (1973)

Maibaon dagiti agsimisim sadiay Canaan. Ti ipadamag dagiti agsimisim.

¹ Ket ni Jehova nagsao ken Moises, a kinunana,

² Bumaonca cadagiti lallaki nga agsimisim iti daga a Canaan nga itedco cadagiti annac ti Israel: iti tunggal caputotan dagiti ammada ti pangalaanyo iti baonenyo a maysa a lalaki, tunggal maysa a pangolo cadacuada.

³ Ket ni Moises imbaonna ida nanipud iti let-ang ti Paran cas mayalubog iti panagbilin ni Jehova: isuda amin a lallaki a pangolo idi dagiti annac ti Israel.

⁴ Ket dagitoy dagiti nagnaganda: iti caputotan ni Ruben, ni Sammua nga anac a lalaki ni Zacur.

⁵ Iti caputotan ni Simeon, ni Safat nga anac a lalaki ni Huri.

⁶ Iti caputotan ni Juda, ni Caleb nga anac a lalaki ni Jefone.

⁷ Iti caputotan ni Issacar, ni Igal nga anac a lalaki ni Josef.

⁸ Iti caputotan ni Efraim, ni Oseas nga anac a lalaki ni Nun.

⁹ Iti caputotan ni Benjamin, ni Palti nga anac a lalaki ni Rafu.

¹⁰ Iti caputotan ni Zabulon, ni Gaddiel nga anac a lalaki ni Sodi.

¹¹ Iti caputotan ni Jose nga isu met laeng ti caputotan ni Manases, ni Gadi nga anac a lalaki ni Susi.

¹² Iti caputotan ni Dan, ni Amiel nga anac a lalaki ni Gemali.

¹³ Iti caputotan ni Aser, ni Setur nga anac a lalaki ni Micael.

¹⁴ Iti caputotan ni Neftali, ni Nahabi nga anac a lalaki ni Vapsi.

¹⁵ Iti caputotan ni Gad, ni Geuel nga anac a lalaki ni Maqui.

¹⁶ Dagitoy isuda dagiti nagnagan dagiti lallaki nga imbaon ni Moises nga agsimisim iti daga. Ket ni Moises ninaganna ni Oseas nga anac a lalaki ni Nun iti Josue.

¹⁷ Ket ni Moises imbaonna ida tapno simisimanda ti daga a Canaan, ket kinunana cadacuada, Sang-atenyo daytoy a dalan iti abagatan ket sumang-atcayo iti caturturodan:

¹⁸ Ket kitaenyo ti daga, no ania; ken no dagiti tattao nga agnaed idiay napigsada wenno nacapuyda, no bassitda wenno aduda;

¹⁹ Ken ania ti daga a pagtaenganda, no naimbag wenno dakes; ken ania dagiti il-ilida a pagnaedanda, no pacpacarso wenno nasarikedkedan;

²⁰ Ken ania ti cadagdagana no nadam-ag wenno naticag, no adda caycayona, wenno awan. Ket umingelcayo a naimbag, ket mangyegcayto iti bunga ti daga. Ta ti tiempo idi, tiempo a panagloom ti uvas nga umuna.

²¹ Iti casta simmang-atda ket nagsimisimda iti daga nanipud iti let-ang ti Sin inggana iti Rohob, iti pagsercan ti Emath.

²² Ket nagsang-atda iti abagatan ket immayda iti Hebron; ket ni Aiman, Sisai, ken Tolmai nga annac a lallaki ni Anac addada idi idiay. (Ita ti Hebron pito a tawen a nabangonen idi awan pay ti Zoan idiay Egipto.)

²³ Ket immayda iti lobong ti Escol, ket pimmucanda sadiay iti maysa a sanga nga adda sangcasar-ayna a bunga ti uvas, ket inawit dagiti dua iti maysa a sarucud; nangisangpetda met cadagiti granadas ken highigos.

²⁴ Daydiay a disso nanaganan idi iti lobong ti Escol, maipuon di sar-ay a pinucan idiay dagiti annac ti Israel.

²⁵ Ket nagawidda iti nagsimisimanda a daga iti gibus ti uppat a pulo nga aldaw.

²⁶ Ket nagnada ket simmangpetda ken Moises, ken Aaron, ken cadagiti dagup ti gimong dagiti annac ti Israel, iti let-ang ti Paran sadiay Cades; ket nangisangpetda iti damag cadacuada, ken iti amin a gimong, ket imparangda cadacuada ti bunga ti daga.

²⁷ Ket sinaritada kencuana, ket kinunada, Napancami iti daga a nangibaonam cadacami, ket pudno nga agayus ti gatas ken diro; ket daytoy ti bungana.

²⁸ Nupay casta dagiti tattao nga agnaed iti daga napigsada, ket dagiti il-ili nabacudanda ket napigsada unay: maysa pay nakitami dagiti annac ni Anac idiay.

²⁹ Ni Amalec agnaed iti daga ti abagatan, ket ti Heteo, ken ti Jehuseo, ken ti Amorreo agnaedda iti caturudan: ket ti Cananeo agnaed iti abay ti taaw, ken iti abay ti Jordan.

³⁰ Ket ni Caleb pinagtalnana ti ili iti sango ni Moises, ket kinunana, Ala sumang-attayo ita ket isu tagicuaentayo coma, ta isu mabalintayo unay a parmeken.

³¹ Ngem dagiti lallaki a nakipagsang-at kencuana kinunada, Ditayto mabalin ti sumang-at a bumusor cadagiti tattao: ta isuda napigpigsada ngem datayo.

³² Ket isuda inyegda ti dakes a damag ti daga nga sinimisimanda cadagiti annac ti Israel, a cunada, Ti daga a napanmi sinimisiman, isu ti daga a manglamut cadagiti agnaed kencuana; ket amin dagiti tattao a nakitami idiay tattaoda a natayag unay.

³³ Ket idiay nakitami dagiti gigantes nga annac a lallaki ni Anac, a nagtaud cadagiti gigantes: ket cayariganmi idi ti cas la dudon ti panangipagarupmi, ket casta idi ti caarigmi iti imatangda.