Numero 12 - Ti Biblia (1973)

Ti panagdanengdeng da Aaron ken Miriam a maibusor ken Moises. Ni Moises no justificar. Ni Miriam agcucutel.

¹ Ket da Miriam ken Aaron nagsaoda iti maicaniwas ken Moises, maipuon iti babai a taga Ethiope nga inasawana idi cua: gapu ta inasawana ti maysa a babai a taga Ethiope.

² Ket kinunada, Ni laeng Moises aya ti pakisasaoan ni Jehova? di la makisao met cadata? Ket ni Jehova nangngegna dayta.

³ Ket ni lalaki a Moises isu idi ti napacumbaba unay cadagiti isu-amin a lallaki nga adda iti rabaw ti daga.

⁴ Ket ni Jehova dagus a kinunana cada Moises, ken Aaron, ken Miriam, Dacayo a tallo rumuarcayo nga umay iti tolda ti gimong, Ket isuda a tallo rimmuarda.

⁵ Ket ni Jehova bimmaba iti maysa a monmon nga ulep, ket nagyan iti ruangan ti Tabernaculo, ket inayabanna ni Aaron ken ni Miriam: ket isuda a dua nagparangda.

⁶ Ket kinunana, Denggenyo ita dagiti sasaoc: no adda maysa a mammadto cadacayo, siac a Jehova ipacammocto kencuana ti bagic iti maysa a parparmata, makisaoacto kencuana iti tagtagainep.

⁷ Ni adipenco a Moises saan a casta: isu ti matalec iti amin a balayco:

⁸ Kencuana makisaoacto iti ngiwanngiwat a nabatad met laeng, ket saan a iti nalimed a palpalawag; ket makitananto ti langa ni Jehova: ania ti gapuna ngarud a dicay la nagbuteng a nagsao iti maicaniwas ken adipenco, iti maicaniwas ken Moises?

⁹ Ket ti unget ni Jehova simged cadacuada, sa pimmanaw.

¹⁰ Ket ti ulep pimmanaw iti tabernaculo ket adtoy ta ni Miriam nagcucutel, nagpuraw a cas nieve ket ni Aaron kinitana ni Miriam, ket, adtoy, isu agcucutelen.

¹¹ Ket ni Aaron kinunana ken Moises, O apoc, dawatec kenca dica cad ipabaclay cadacami ti basol, ta nagaramidcami a simamauyong unay, ket iti dayta nacabasolanmi.

¹² Dawatec a dica cadi ipalubos nga isu cas maysa a natay a naibus ti guddua ti lasagna no rumuar iti tian ni inana.

¹³ Ket ni Moises inawaganna ni Jehova, a kinunana, Agasam cadi dawatec kenca, O Dios.

¹⁴ Ket ni Jehova kinunana ken Moises, No ni amana tinupraanna la coma iti rupana, di ngata coma maibabain bayat iti pito nga aldaw maipaing coma iti ruar ti pacarso cadagiti pito nga aldaw, ket iti calpasanna maiserrecto met laeng.

¹⁵ Ket ni Miriam naipaing iti ruar ti pagpacarsoan iti pito nga al-aldaw: ket ti ili saan a nagna, inggana iti di naisubli a sumbrec ni Miriam.

¹⁶ Ket iti calpasanna ti ili nagrubbuat a nagna nanipud iti Jaseroth, sada nagsardeng iti let-ang ti Paran.