Numero 11 - Ti Biblia (1973)

Ti ili agdanengdeng, ket paglidayan ni Moises. Pitopulo a lallacay madutocda a tumulong ken Moises. Ni Eldad ken Medad. Maibaon dagiti tuctucling.

¹ Ket ti ili isuda idi ti cas nagdanengdeng a nagsao iti dakes cadagiti pagdengngeg ni Jehova: ket idi a nangngeg ni Jehova, napabara ti pungtotna; ket ti apuy ni Jehova simged iti baetda ket inalun-unna ti akinudi a paset ti pacarso.

² Ket dagiti tattao inawaganda ni Moises, ket ni Moises, nagcararag ken Jehova, ket ti apuy nagsardeng.

³ Ket ti nagan daydiay nga ayan managanan nagarian idi iti Taberah: gapu ta ti apuy ni Jehova simged iti baetda.

⁴ Ket ti caaduan nga adda idi cadacuada naggartemda unay iti napalalo: ket dagiti annac ti Israel casta met a nagsangitda manen, ket kinunada, Asino ti mangtedto cadacami iti lasag a sidaen?

⁵ Malagipmi dagiti ic-ican a sinsindami idiay Egipto nga awan baybayadda, dagiti pepino, ken dagiti morod, ken dagiti cutsay, ken dagiti lasona, ken dagiti bawang:

⁶ Ngem ita ti cararuami malidliday; awan ti uray ania laeng a makita no di daytoy mana.

⁷ Ket ti mana cas la iti bukel ti culantro, ket ti kitana cas la ti kita ti bedelio.

⁸ Ket nagwaras dagiti tattao ket inummongda, ket ginilingda cadagiti paggilingan wenno linutlutda iti paglebbecan, ket liningtada cadagiti bangbanga, ket inaramidda a bibbibingca: ket ti ramanna cas la raman ti baro a lana.

⁹ Ket idi agtinnag ti linnaaw iti pacarso iti rabii, ti mana agtinnag idi iti rabawna.

¹⁰ Ket ni Moises nangegna a nagsangit dagiti tattao iti sacnap dagiti familiada, tunggal maysa a lalaki iti ruangan ti toldana: ket ti pungtot ni Jehova bimmara iti casta unay, ket ni Moises napalucsaw.

¹¹ Ket ni Moises kinunana ken Jehova, Ania ti gapuna nga impaaymo iti dakes itoy adipenmo? Ket apayapay diac nacasarac iti caasi iti imatangmo ta ipabaclaymo ti awit iti dagup dagitoy a tattao.

¹² Pinatanurco aya ida iti unegco amin dagitoy a tattao? Pinasngayco aya ida, tapno kinunam caniac, Sacroyem ida ita barucongmo, cas agtaraken nga ama a mangubba iti agsuso nga ubing agingga iti daga nga insapatam cadagiti ammada?

¹³ Sadino ti pamaaddaac iti lasag nga itedco iti dagup dagitoy a tattao? ta isuda agsangsangitda iti yanco a cunada, Iccannacami iti lasag tapno macapangancami.

¹⁴ Diac cabaelan nga awiten a maymaysa ti amin dagitoy a tattao, ta napalalo a nagdagsen caniac.

¹⁵ Ket no castoy la ti pamayam caniac dawatec kenca a patayennac ita imam, no natumpungac la ket ti caasi iti saclangmo; ket dica coma ipalubos a makitac ti kinaay-ay-ayco.

¹⁶ Ket ni Jehova kinunana ken Moises, Ummongem iti yanco ti pitopulo a lallaki cadagiti lallacay ti Israel, nga ammom nga isuda ti calalacayan ti ili ken agturay cadacuada; ket yegmo ida iti tolda ti gimong tapno makipagyanda kenca idiay.

¹⁷ Ket siac bumabaacto, ket makisaoacto kenca idiay; ket mangalaacto iti Espiritu nga adda kenca ket icabilconto cadacuada; ket makipagawitdanto kenca iti awit ti ili, tapno dica agmaymaysa a mangawit.

¹⁸ Ket cunam cadagiti tattao, Santificarenyo dagiti bagbagiyo a maipaay iti bigat, ket agsidacayto iti lasag: ta nagsangitcayo cadagiti pagdengngeg ni Jehova a kinunayo, Asino ti mangted cadacami iti lasag a sidaen? ta naimbag idi idiay Egipto: isu ti gapuna a ni Jehova iccannacayto iti lasag, ket agsidacayto.

¹⁹ Dicayto agsida iti maysa nga aldaw laeng, uray dua nga aldaw, uray lima nga aldaw, uray sangapulo nga aldaw, uray duapolo nga aldaw;

²⁰ No di ket iti uneg ti macabulan, inggana ti di sumngaw cadagiti abut dagiti agongyo, ken macasuya cadacayo: gapu ta inwagsacyo ni Jehova nga adda iti baetyo, ket nagsangitcayo iti sangoananna, a kinunayo, Ania ti gapuna a pimmanawcami sadi Egipto?

²¹ Ket ni Moises kinunana, Ti ili nga iti nagtengngaanna addaac innem a gasutda a ribu a magmagna; ket sica kinunam, Iccacto ida iti lasag a sidaenda iti uneg ti macabulan.

²² Mapapatayto dagiti ar-arban ken pangpangen tapno umanay cadacuada wenno matiptipon a maummongto amin nga ic-ican ti taaw nga agservi cadacuada, tapno umanay cadacuada?

²³ Ket ni Jehova kinunana ken Moises, Immababa aya ti ima ni Jehova? ita makitamto no ti saoc matungpalto wenno saan.

²⁴ Ket ni Moises rimmuar ket sinaona iti ili dagiti sao ni Jehova: ket inummongna dagiti pitopulo a lallaki cadagiti panglacayen ti ili ket insaadna ida iti lawlaw ti Tabernaculo.

²⁵ Ket ni Jehova bimmaba iti ulep, ket nakisao kencuana, ket nangala iti Espiritu nga adda idi kencuana, ket incabilna cadagiti pitopulo a lallacay, ket naaramid nga idi immapay cadacuada ti Espiritu nagpadtoda, ngem saanda nga inulitan nga aramiden.

²⁶ Ngem nagbati idiay dagiti dua a lallaki iti pacarso, ti nagan ti maysa ni Eldad, ket ti nagan ti caduana ni Medad: ket ti Espiritu immapay cadacuada; ket isuda idi cadacuada ti naisurat, ngem saanda a rimmuar a napan iti Tabernaculo: ket nagpadtoda iti pacarso.

²⁷ Ket maysa nga agtutubo nagtaray ket sinaritana ken Moises, ket kinunana, Ni Eldad ken ni Medad agpadtoda iti pagpacarsoan.

²⁸ Ket ni Josue nga anac a lalaki ni Nun a ministro ni Moises, maysa cadagiti napili a lallakina, simmungbat ket kinunana, Apoc a Moises, paritam ida.

²⁹ Ket ni Moises kinunana kencuana, Adda ilemmo a maipuon caniac? Sapay coma ta amin a tattao ni Jehova mammadtoda tapno icabil ni Jehova ti Espirituna cadacuada!

³⁰ Ket ni Moises napan iti yan ti pacarso isu ken dagiti lallacay ti Israel.

³¹ Ket nagpuyupuy ti maysa nga angin a naggapu ken Jehova, ket ingapuna iti taaw dagiti tuctucling, ket binay-anna ida a nagtinnag iti sibay ti pagpacarsoan iti nganngani maysa nga aldaw a pagnaen iti daytoy a bangir, ken maysa nga aldaw a pagnaen iti sabali a bangir, iti naglawlaw iti pacarso, ken nganngani dua a sico ti cangato iti rabaw ti daga.

³² Ket dagiti tattao bimmangonda a nagmalmalem ken nagpatpatnag, ken iti sumaruno nga aldaw, ket nagummongda cadagiti tuctucling: ti cababassitan ti naornong inummongna ti sangapulo nga omer: ket inwalagwagda ida iti lawlaw ti nagpacarsoanda a maipaay cadacuada.

³³ Idi nga adda pay laeng ti lasag a di pay la nangalngal iti baet dagiti ngipenda, ti unget ni Jehova simged a maibusor cadagiti tattao, ket ni Jehova dinidigrana ti ili iti maysa a naindaclan unay nga angol.

³⁴ Ket ti nagan daydiay a disso nagaladan idi iti Kibroth-hattaavah: gapu ta idiay ti nangitamnanda cadagiti tattao a naggartem.

³⁵ Nanipud Kibroth-hattaavah nagnada a napan iti Haseroth; ket nagsardengda sadi Haseroth.