Numero 10 - Ti Biblia (1973)

Dagiti tangtangguyob a pirac. Dagiti caputotan pumanawda iti Sinai. Ni Hobab naawis a makipagcuyog cadagiti tattao. Ti panagluas.

¹ Ket ni Jehova nagsao ken Moises, a kinunana,

² Mangaramidca iti dua a tangguyob a pirac: mangaramidcanto cadagiti napitpit: ket aramatemto ida a pagayab iti gimong ken pamagluas cadagiti nagpacarso.

³ Ket no pagtimkenda ida, amin a gimong aguummongdanto iti yanmo iti ruangan ti tolda ti gimong.

⁴ Ket no maymaysa laeng ti pagtimkenda, dagiti pangolo dagiti rinibu nga Israel aguummongdanto ngarud iti yanmo.

⁵ Ket no pagunienyo iti naariwawa, dagiti buybuyot nga adda iti bangirna iti daya, yussuatdanto ti pannagnada.

⁶ Ket no paguniendanto ti naariwawa iti maicadua a daras, dagiti buybuyot nga adda iti bangirna ti abagatan yussuatdanto ti pannagnada: paguniendanto ti naariwawa a maipanggep iti panagluasda.

⁷ Ngem no ti gimong maummongda nga agtitipon pagtimkenyonto, ngem dicayto pagunien iti naariwawa.

⁸ Ket dagiti annac a lallaki ni Aaron a dagiti papadi pagtimkendanto dagiti tangguyob; ket dagitoy dagiti agservinto cadacayo nga al-alagaden iti agnanayon cadagiti putputotyo.

⁹ Ket no incayo makigubat iti dagayo a maisupring iti cabusor a mamarigat cadacayo, no casta pagunienyonto iti naariwawa dagiti tangguyob; ket maipalagipcayto iti sango ni Jehova a Diosyo, ket maispalcayto cadagiti cabusoryo.

¹⁰ Casta met iti aldaw dagiti ragragsacyo, ken cadagiti nakedngan a fifiestayo, ken cadagiti panangrugi dagiti bulbulanyo, pagtimkenyonto dagiti tangguyob iti rabaw dagiti datdatonyo a mapuuran, ken rabaw dagiti sacrificio dagiti datdatonyo gapu iti cappia; ket isudanto cadacayo ti maysa a pacalaglagipan iti sango ti Diosyo; siac ni Jehova a Diosyo.

¹¹ Ket naaramid nga iti maicadua a tawen, iti maicadua a bulan, iti maicaduapulo nga aldaw ti bulan, ti ulep naipangato nanipud iti rabaw ti tabernaculo ti pamanecnec.

¹² Ket dagiti annac ti Israel nagrubbuatda cas mayannurot iti pannagnada a pumanaw iti let-ang ti Sinai; ket ti ulep nagsardeng iti let-ang ti Paran.

¹³ Ket isuda immuna nga inyussuatda ti panangnada cas mayannatup iti bilin ni Jehova nga intalecna ken Moises.

¹⁴ Ket iti umuna a lugar, ti bandera ti sangapacarsoan dagiti annac ni Juda nagrubbuat a nagna cas iti ornos dagiti buybuyotda: ket ti nangipangolo iti buyotna isu idi ni Naason nga anac a lalaki ni Aminadab.

¹⁵ Ket ti nangipangolo iti buyot ti caputotan dagiti annac ni Issacar isu idi ni Natanael nga anac a lalaki ni Suar.

¹⁶ Ket ti nangipangolo iti buyot ti caputotan dagiti annac ni Zabulon isu idi ni Eliab nga anac a lalaki ni Helon.

¹⁷ Ket ti tabernaculo nalasang idi; ket dagiti annac a lallaki ni Gerson ken dagiti annac a lallaki ni Merari, isuda a nagawit iti tabernaculo, nagrubbuatda.

¹⁸ Ket ti bandera ti sangcapacarsoan ni Ruben nagrubbuat a nagna cas mayannurot cadagiti buybuyotda; ket ti nangipangolo iti buyotna isu idi ni Elisur nga anac a lalaki ni Sedeur.

¹⁹ Ket ti nangipangolo iti buyot ti caputotan dagiti annac ni Simeon isu idi ni Selumiel nga anac a lalaki ni Zurisaddai.

²⁰ Ket ti nangipangolo iti buyot ti caputotan dagiti annac ni Gad isu idi ni Eliasaph nga anac a lalaki ni Deuel.

²¹ Ket dagiti Coatitas nagrubbuatda a nagna, a siaawit iti santuario: ket iti panagsangsangpetda, bangbangonenda ti tabernaculo.

²² Ket ti bandera ti sangcapacarsoan dagiti annac ni Efraim nagrubbuatda a nagna cas mayannurot cadagiti buybuyotda; ket ti nangipangolo iti buyotda isu idi ni Elisama nga anac a lalaki ni Ammiud.

²³ Ket ti nangipangolo iti buyot ti caputotan dagiti annac ni Manases isu idi ni Gamaliel nga anac a lalaki ni Pedasur.

²⁴ Ket ti nangipangolo iti buyot ti caputotan dagiti annac ni Benjamin isu idi ni Abidam nga anac a lalaki ni Gedeon.

²⁵ Ket ti bandera ti sangcapacarsoan dagiti annac ni Dan nga isu idi ti akinudi cadagiti isu-amin a nagpacarso nagrubbuat a nagna cas mayannurot cadagiti buybuyotda: ket ti nangipangolo idi iti buyotna isu ni Ahiezer nga anac a lalaki ni Ammisaddai.

²⁶ Ket ti nangipangolo iti buyot ti caputotan dagiti annac ni Aser isu idi ni Pagiel nga anac a lalaki ni Ocran.

²⁷ Ket ti nangipangolo iti buyot ti caputotan dagiti annac ni Neftali isu idi ni Ahira nga anac a lalaki ni Enan.

²⁸ Castoy idi dagiti panagussuat dagiti annac ti Israel a mayannatup cadagiti buybuyotda, ket nagrubbuatda.

²⁹ Ket ni Moises kinunana ken Hobab nga anac a lalaki ni Raguel a taga Madian, a catugangan ni Moises, Agbariw-ascami a mapan iti disso a sinao ni Jehova, Itedconto cadacayo: Umayca cadacami, ket naimbagto ti aramidenmi kenca: ta ni Jehova naimbag ti sinaona maipapan iti Israel.

³⁰ Ket isu kinunana kencuana, Saanacto nga umay; ngem innacto iti bucodco a daga, ken cadagiti cacabagiac.

³¹ Ket ni Moises kinunana, Dinacami baybay-an, dawatec kenca; yantangay ammom no casano ti panagtaengmi iti let-ang, ket sicanto ti pannacamatami.

³² Ket castoyto a no umayca cadacami, pudno a maaramidto nga uray ania nga imbag nga ipaayto ni Jehova cadacami, casta met ti aramidenminto kenca.

³³ Ket nagluasda nanipud iti bantay ni Jehova a nagnada iti tallo nga aldaw ket ti lacasa ti tulag ni Jehova immununa ngem isuda iti pagnaen ti tallo nga aldaw, nga agsapulda iti disso a paginanaanda.

³⁴ Ket ti ulep ni Jehova nagyan iti ngatoenda iti aldaw idi a nagluasda nanipud iti nagpacpacarsoanda.

³⁵ Ket naaramid nga idi a nagluas di lacasa, ni Moises kinunana, Tumacderca, O Jehova, ket dagiti cabusormo mawarada coma; ket agtalaw coma iti sangoanam dagiti gumura kenca.

³⁶ Ket idi nagsardeng, isu kinunana, Agsublica, O Jehova, cadagiti linacsa a ribu nga Israel.