Nehemias 9 - Ti Biblia (1973)

Maysa a cararag dagiti Levitas, a mangbigbig iti nalabes a kinaimbag ni Jehova. Cararag dagiti Levitas, a mangipudno iti basol ti sangcanacion.

¹ Iti maicaduapulo ket uppat nga aldaw ti daytoy a bulan naguornong dagiti annac ti Israel iti panagayunar, ken agraman cawes a nakersang, ken daga iti rabawda.

² Ket limmasin ti putot ti Israel cadagiti amin a gangannaet, ket nagtacderda, ken impudnoda dagiti basbasolda, ken dagiti kinadangcoc dagiti ammada.

³ Ket nagtacderda iti dissoda, ket nagbasada iti libro ti linteg ni Jehova a Diosda iti maysa nga apagcapat ti aldaw; ket iti sabali nga apagcapat nagpudnoda, ken nagcararagda ken Jehova a Diosda.

⁴ Idin nagtacder iti ngato dagiti tucad dagiti Levitas, da Jesua, Bani, Cadmiel, Sabanias, Bunni, Serebias, Bani, ken Kenani, ket nagickisda iti natbag a timec ken Jehova a Diosda,

⁵ Idin dagiti Levitas a da Jesua, Cadmiel, Bani, Hasebnias, Serebias, Odaias, Sebanias, ken Petahia, kinunada, Tumacdercayo ken benditoenyo ni Jehova a Diosyo manipud agnanayon agingga iti agnanayon; ket bendito ti naganmo a nagloriaan, isu a natantan-oc ngem iti amin a bendicion ken dayaw.

⁶ Sica ni Jehova, sica laeng a maymaysa; inaramidmo ti langit, a langit dagiti langlangit, agraman iti amin a buyotda, ti daga ken amin nga adda kencuana, dagiti taaw ken amin nga adda cadacuada, ket igigirmo ida amin; ket agcararag kenca ti buyot ti langit.

⁷ Sica ni Jehova a Dios, a nangpili ken Abram, ken nangiruar kencuana idiay Ur dagiti Caldeos, ket intedmo kencuana ti nagan nga Abraham,

⁸ Ket nasaracam ti pusona a matalec iti sangoanam, ket intulagmo kencuana nga itdem ti daga ti Cananeo, ti Jetteo, ti Amorreo, ken ti Ferezeo, ken ti Jebuseo, ken ti Gergeseo, tapno itdem iti putotna, ket tinungpalmo dagiti saom ta nalintegca.

⁹ Ket kinitam ti pannacaparigat dagidi ammami idiay Egipto, ket impangagmo ti asugda iti denna ti Baybay a Nalabaga,

¹⁰ Ket intedmo dagiti pagilasinan ken datdatlag ken Faraon, ken cadagiti amin nga ad-adipenna, ken amin a tattao ti dagana; ta ammom idi a nagaramidda a sipapalangguad unay a maibusor cadacuada, ket nanagananca iti maysa a nagan, a cas itoy nga aldaw.

¹¹ Ket biningaymo di baybay iti sangoananda, iti casta a limmasatda iti tengnga ti baybay iti daga a namaga; ket dagiti agcamat cadacuada impalladawmo cadagiti tucoc, cas maysa a bato iti uneg dagiti mannacabalin a dandanum.

¹² Maysa pay iti maysa a monmon nga ulep indalanmo ida iti aldaw; ken iti maysa a monmon nga apuy iti rabii, tapno lawagam ida iti dalan a pagnaanda coma.

¹³ Bimmabaca met idiay rabaw ti bantay Sinai, ket kinasaom ida manipud langit, ket intedmo cadacuada dagiti nalinteg nga anannuruten ken dagiti pudno a linlinteg, dagiti naimbag nga al-alagaden ken bilbilin,

¹⁴ Ken impacaammom cadacuada ti nasantoan nga aldaw a panaginana, ket imbilinmo cadacuada dagiti bilbilin, ken al-alagaden, ken maysa a linteg, iti pannacaaramat ni Moises nga adipenmo,

¹⁵ Ket iniccam ida ti tinapay a naggapu iti langit a gapu iti bisinda, ket inruarmo ti danum a maipaay cadacuada a naggapu idi bato a gapu iti wawda, ket binilinmo ida tapno sumrecda coma a mangtagicua iti daga nga insapatam nga ited cadacuada.

¹⁶ Ngem isuda ken dagiti ammami nagaramidda a sipapalangguad, ket pinatangkenda ti teltelda, ket dida impangag dagiti bilbilinmo,

¹⁷ Ket indianda ti nagtulnog, dida linagip dagiti datdatlagmo nga inaramidmo iti tengngada, no di ket pinatangkenda ti teltelda, ket iti isusukirda nangdutocda iti maysa a capitan tapno agsublida iti kinabag-en. Ngem sica ti maysa a Dios a nadadaan a mamacawan naparabur ken manangngaasi, natanang nga agpungtot ken nawadwad iti kinamanangngaasi, ket dica indian ida.

¹⁸ Wen, idi inyaramidanda ida iti maysa a sinucog a sinan-urbon a vaca, ket kinunada, Daytoy ti Diosmo a nangaon kenca idiay Egipto, ket inaramidda dagiti dadackel a pananggargari;

¹⁹ Nupay casta sica cadagiti nawadwad a kinamanangngaasim dica indian ida idiay let-ang: ti monmon nga ulep saan a pinanawan iti rabawda iti aldaw, tapno iturongna ida iti dalan; uray ti monmon nga apuy iti rabii, tapno iparangarangna cadacuada ti lawag, ken ti dalan a pagnaanda coma.

²⁰ Intedmo met ta naimbag nga Espiritum tapno mangisuro cadacuada, ket dica met inkedked ti manam iti ngiwatda, ket iniccam ida ti danum a gapu iti wawda.

²¹ Wen, uppat a pulo a tawen a tinaraonam ida idiay let-ang, ket dida nagcurang iti aniaman: dagiti pagan-anayda dida dimmaan, ket dagiti sacsacada dida limteg.

²² Maysa pay intedmo cadacuada dagiti pagpagarian ken il-ili, nga inwarasmo gapu ti gasat a mayannurot cadagiti bingayda: iti casta tinagicuada ti daga ni Sejon, a ti met laeng daga ti ari ti Jesebon, ken ti daga ni Og nga ari ti Basan.

²³ Pinaadum met dagiti annacda a cas cadagiti bitbitwen ti langit, ket inserrecmo ida iti daga a nasaom cadagiti ammada, a sumrecda coma a mangtagicua ti dayta.

²⁴ Iti casta simrec dagiti annac ket tinagicuada ti daga, ket pinarucmam iti sangoananda dagiti nagnaed iti daga dagiti Cananeos, ket intedmo ida cadagiti im-imada, agraman cadagiti arida ken dagiti tattao ti daga, tapno aramidenda cadacuada ti cas kinayatda.

²⁵ Ket innalada dagiti nasarikedkedan nga il-ili, ken ti nadam-eg a daga, ken tinagicuada dagiti balbalay a napno cadagiti nasayaat a banbanag, bitbito nga inaramid, inuv-uvasan, ken inol-olivaan, ken caycayo nga agbunga a nawadwad: iti casta nanganda, ken napnecda, ket napalucmegda, ken nagrag-oda iti dackel a kinaimbagmo.

²⁶ Nupay casta nasungitda, ken simmukirda a maicaniwas kenca, ket impalladawda iti licudanda ti lintegmo, ket pinatayda dagiti mammadtom a nangsacsi iti maibusor cadacuada tapno isublida coma ida manen kenca, ket inaramidda dagiti dadackel a pananggargari.

²⁷ Gapuna nga inyawatmo ida iti ima dagiti cabusorda, a namarigat cadacuada: ket iti aldaw ti riribucda, idi immasugda kenca, nangipangagca nanipud langit; ket mayannurot cadagiti nawadwad a caasim iniccam ida cadagiti mangisalacan a nangisalacan cadacuada iti ima dagiti cabusorda.

²⁸ Ngem iti calpasan ti panaginanada; inaramidda manen ti dakes iti sangoanam; gapuna a binay-am ida iti ima dagiti cabusorda, iti casta inturayanda ida; nupay casta idi a nagsublida, ken immasugda kenca, nangipangagca nanipud langit; ket inispalmo ida cadagiti adu a daras a mayannurot cadagiti caasim,

²⁹ Ket pinanecnecam ti maicaniwas cadacuada, tapno yegmo ida manen iti lintegmo. Nupay casta nagaramidda a sipapalangguad, ken dida impangag dagiti bilbilinmo, no di ket nagbasolda a maibusor cadagiti ipaannurotmo (isu a no tungpalen ti maysa a tao, agbiagto cadacuada), ket inlisida ti abaga, ken pinatangkenda ti teltelda, ket dida kinayat ti dimngeg.

³⁰ Nupay casta inanusam ida bayat iti adu a tawen, ket nangpanecnecca a maibusor cadacuada gapu iti Espiritum iti pannacaaramat dagiti mammadtom: nupay casta dida kinayat ti nangipangag; gapuna nga intedmo ida iti ima dagiti tattao cadagiti dagdaga.

³¹ Nupay casta iti nawadwad a caasim dica ginibus ida, dica met indian ida; ta sica ti naparabur ken manangngaasi a Dios.

³² Ita ngarud, Diosmi, ti dackel, a mannacabalin, ket nacakigkigtot a Dios, a mangsalimetmet iti tulag ken kinamanangngaasi, dica palubosan nga agparang ita sangoanam a cas bassit ti amin a rigat, nga immay cadacami, cadagiti pangpangoloenmi, ken cadagiti papadimi, ken cadagiti mammadtomi, ken cadagiti ammami, ken iti amin nga ilim, nanipud idi tiempo dagiti ar-ari ti Asiria agingga itoy nga aldaw.

³³ Nupay casta nalintegca iti amin a naipaay cadacami; ta nagaramidca a sipupudno, ngem nagaramidcami a sidadangcoc.

³⁴ Uray dagiti ar-arimi, pangpangoloenmi, papadimi, wenno dagidi ammami, dida sinalimetmetan ti lintegmo, dida met impangag dagiti bilbilinmo ken dagiti pangpanecnecmo a pinangsacsim a maibusor cadacuada.

³⁵ Ta didaca nagservian iti pagarianda, ken iti dackel a kinaimbagmo nga intedmo cadacuada, ken iti dackel ken nataba a daga nga intedmo iti sangoda, dida nagbawingan dagiti nadangcoc nga aramidda.

³⁶ Adtoy, dacami dagiti ad-adipenmo itoy nga aldaw, ket no maipapan iti daga nga intedmo cadagiti ammami a canenda ti bungana ken ti imbagna, adtoy, ad-adipencami kencuana.

³⁷ Ket mangted iti adu nga apit cadagiti ar-ari nga insaadmo cadacami a gapu cadagiti basbasolmi: casta met nga agturayda cadagiti bagbagimi, ken cadagiti vacvacami cas pagayatanda, ket dacami naparigatcami iti napalalo.

³⁸ Ket nupay casta gapu amin cadagitoy agaramidcami iti maysa a nalagda a tulag, ket isu ti isuratmi; ket dagiti pangoloenmi, dagiti Levitasmi, ken dagiti papadimi isaadda ti tanda kencuana.