Nehemias 8 - Ti Biblia (1973)

Ibasa ni Esdras ti linteg iti umili. Matungpal ti fiesta dagiti tabernaculo.

¹ Ket amin a tattao naguornongda a cas maymaysa a tao idiay nalawa a disso nga adda idi iti sango ti ruangan ti danum; ket nagsaoda ken Esdras nga escriba tapno yegna ti libro ti linteg ni Moises, nga imbilin ni Jehova iti Israel.

² Ket ni Esdras a padi inyegna ti linteg iti sango ti gimong, dagiti lallaki man ken babbai agpadpada, ken amin a nacabalin a dumngeg a macaawat, iti umuna nga aldaw ti maicapito a bulan.

³ Ket binasana idiay, iti sango ti nalawa a disso nga adda idi iti sango ti ruangan ti danum manipud iti agsapa agingga iti matoon, iti saclang dagiti lallaki ken babbai, ken dagidiay macabalin nga umawat; ket dagiti pagdengngeg dagiti amin a tattao siiimdengda idi iti libro ti linteg.

⁴ Ket nagtacder ni Esdras nga escriba iti rabaw ti maysa a pulpito a cayo, nga inaramidda a maipaay iti gacat; ket iti sikiganna nagtacder da Matitias, Sema, Anias, Urias, Helcias, ken Maasias, iti macanawan; ket iti macatigid, da Padaia, Misael, Malkias, Hasum, Hasbadana, Zacarias, ken Mesullam.

⁵ Ket ni Esdras inucradna ti libro iti imatang dagiti amin a tattao (ta adda idi iti ngatoen, dagiti amin a tattao); ket idi nga isu ti inucradna, nagtacder amin a tattao.

⁶ Ket ni Esdras impadayawna ni Jehova, a dackel a Dios; ket insungbat ti amin a tattao, Sapay coma Sapay coma, a binuyog ti panangingatoda cadagiti im-imada: ket inrucnoyda dagiti ol-oloda, ket nagcararagda ken Jehova a sidudumogda iti daga.

⁷ Casta met da Jesua, Bani, Sarabias, Jamin, Accub, Sebetai, Odias, Maasias, Calita, Azarias, Josabad, Hanan, Pelaia, ken dagiti Levitas, impaawatda ti linteg cadagiti tattao; ket nagtacder dagiti tattao cadagiti dissoda.

⁸ Ket binasada iti libro, iti linteg ti Dios, a silalawag; ket intedda ti cababagasna cas naawatanda iti panagbasa.

⁹ Ket ni Nehemias, a gobernador idi, ken ni Esdras a padi nga escriba ken dagiti Levitas, a nangisuro cadagiti tattao, kinunada cadagiti amin a tattao, Daytoy nga aldaw isu ti nasantoan ken Jehova a Diosyo; dicay agdung-aw, wenno dicay agsangit. Ta amin a tattao nagsangit, idi a nangngegda dagiti sasao ti linteg.

¹⁰ Idin kinunana cadacuada, Incay iti dalanyo, mangancayo iti nalucmeg, ken uminumcayo iti nasam-it, ket ibaonyo dagiti apag iti daydiay a di-naisaganaan ti uray aniaman; ta daytoy nga aldaw isu ti nasantoan iti Apotayo: dicay mapaldaang; ta ti rag-o ni Jehova isu ti pigsayo.

¹¹ Iti casta pinagulimec dagiti Levitas amin dagiti tattao, a kinunada, Agtalnacayo, ta ti aldaw nasantoan; dicay mapaldaang.

¹² Ket amin dagiti tattao napanda iti dalanda tapno mangan, ken uminum ken ibaonda dagiti apag, ken agaramidda iti dackel a ragsac, agsipud ta naawatanda dagiti sasao a naipalawag cadacuada.

¹³ Ket iti maicadua nga aldaw dagiti pangoloen dagiti balbalay dagiti amma dagiti amin a tattao, dagiti papadi, ken dagiti Levitas, timmaripnongda ken Esdras nga escriba, tapno imdenganda met laeng dagiti sasao ti linteg.

¹⁴ Ket nasaracanda a naisurat iti linteg, no casano ti imbilin idi ni Jehova iti pannacaaramat ni Moises, nga agnaed coma dagiti annac ti Israel cadagiti sapaw iti fiesta ti maicapito a bulan;

¹⁵ Ket isu ti ipalawagda ken iwarragawagda coma cadagiti amin nga il-ili, ken, idiay Jerusalem, a cunaenda, Rumuarcayo agingga iti bantay, ket mangyegcayo cadagiti sangsanga ti olivo, ken sangsanga ti olivo nga atap, ken sangsanga ti mirto, ken sangsanga ti palma, ken sangsanga dagiti narucbos a caycayo, tapno agaramidtayo cadagiti sapaw, a cas naisurat.

¹⁶ Iti casta rimmuar dagiti tattao, ket nagisangpetda, ket isuda met laeng nagaramidda cadagiti sapaw, tunggal maysa iti rabaw ti atep ti balayna, ken cadagiti paraangan da, ken cadagiti paraangan ti balay ti Dios, ken idiay nalawa a disso ti ruangan ti danum, ken idiay nalawa a disso ti ruangan ni Efraim.

¹⁷ Ket amin a gimong dagidiay a rimmuar manen a naggapu iti pannacacayaw nagaramidda cadagiti sapaw, ket nagnaedda cadagiti sapaw: ta nanipud cadagiti al-aldaw ni Josue nga anac a lalaki ni Nun agingga iti daydi nga aldaw, dagiti annac ti Israel saanda nga inaramid ti casta. Ket adda idi dackel unay a ragsac.

¹⁸ Casta met iti inaldawaldaw, manipud iti umuna nga aldaw agingga iti maudi nga aldaw, isu nagbasa iti libro ti linteg ti Dios. Ket isuda nagfiestada bayat iti pito nga aldaw; ket iti maicawalo nga aldaw isu idi ti maysa a nadaeg a gimong, a mayalubog iti annuruten.