Nehemias 6 - Ti Biblia (1973)

Dagiti sicap da Sanballat, Tobias, ken Gesem. Malpas ti bacud. Ti sicap ni Tobias.

¹ Ket naaramid idi naidamag cada Sanballat, Tobias, ken Gesem nga Arabe, ken iti matda cadagiti cabusormi, a nabangoncon ti bacud, ken awanen ti gutbaw kencuana (nupay no agingga met laeng idi a tiempo diac pay impatacder dagiti ruangan cadagiti pagsercan),

² A nagbaonda caniac da Sanballat, ken Gesem, a kinunada, Umayca, agsasaractayo coma iti maysa cadagiti purpuroc iti tanap ti Ono. Ngem pinanggepda nga aramiden caniac iti dakes.

³ Ket nangibaonac cadacuada cadagiti babaonen, a kinunac, Agar-aramidac iti maysa a dackel nga aramid iti casta diac mabalin ti sumalog: apayapay a sumardeng coma ti aramid bayat ti panangbay-ac ket sumalogac agingga cadacayo?

⁴ Ket nagbaonda caniac iti naminpat a daras a cas itoy; ket sinungbatac ida a mayannurot iti isu met laeng a wagas.

⁵ Idin imbaon caniac ni Sanballat ti adipenna iti casta met laeng a wagas iti maicalima a daras agraman maysa a silulucat a surat iti imana,

⁶ Isu a nacaisuratan ti castoy, Naidamag cadagiti nasnacion, ket nasao ni Gasmu, a sica ken dagiti Judios panggepenyo ti umalsa; iti dayta a gapu bangbangonem ti bacud: ket sica coma ti arida, a mayannurot cadagitoy a sasao.

⁷ Ket nangdutocca met cadagiti mammadto a mangasaba iti maipapan kenca dita Jerusalem, a cunada, Adda maysa nga ari iti Juda: ket ita maidamagto iti ari a mayannurot cadagitoy a sasao. Gapuna ita nga umayca ket agbibinnalacadtayo coma a sangsangcatipon.

⁸ Idin nagbaonac kencuana, a kinunac, Awan ti casta a banag a maaramid cas ti saoem, ngem pinarbom ida a nagtaud dita pusom met laeng.

⁹ Ta isuda amin pagbutngendacam coma, a cunaenda, Cumapsutto dagiti im-imada iti aramid ket dinto malpas, Ngem ita, O Dios, papigsaem dagiti im-imac.

¹⁰ Ket immuliac iti balay ni Semaias nga anac a lalaki ni Dalaias nga anac a lalaki ni Metabeel isu a nabalud idi; ket kinunana, Agtitipontayo coma idiay balay ti Dios iti uneg ti templo, ket punitantayo coma dagiti ruangan ti templo: ta umaydanto a mangpatay kenca; wen, umaydanto iti rabii a mangpapatay kenca.

¹¹ Ket kinunac, Ti lalaki a cas caniac agtaray coma? ket asino ti adda idiay, nga idinto a cas caniac sumrec coma iti templo tapno ispalenna ti biagna? Diacto sumrec.

¹² Ket inamirisco, ket, adtoy, isu saan nga imbaon ti Dios; no di ket binalicasna daytoy a padto a maibusor caniac: ket isu tinangdanan da Tobias ken Sanballat.

¹³ Maipaay itoy a panggep natangdanan idi, tapno agbutengac coma, ket aramidec ti casta, ken agbasolac, ken tapno addaanda coma iti banag a maipaay iti maysa a dakes a damag, tapno maumsidac coma.

¹⁴ Lagipem, O Diosco, da Tobias ken Sanballat a mayannurot cadagitoy aramidda, ken casta met ken mammadto a babbai a Noadias, ken dagiti matda cadagiti mammadto, a mamagbuteng coma caniac.

¹⁵ Iti casta nalpas ti bacud idi maicaduapulo ket lima nga aldaw ti bulan ti Elul, bayat iti limapulo ket dua nga aldaw.

¹⁶ Ket naaramid, idi a nangngeg dayta dagiti amin a cabusormi, nga amin dagiti nacion nga addada idi iti sibaymi, nagbutengda, ket napalidayda unay cadagiti matada met laeng; ta naawatanda a daytoy nga aramid naaramid idi a gapu iti Dios.

¹⁷ Maysa pay cadagidi nga al-aldaw impaw-it dagiti natacneng ti Juda dagiti adu a surat ken Tobias, ket dagiti sursurat ni Tobias immay cadacuada.

¹⁸ Ta adu idi iti Juda ti nagsapata kencuana, agsipud ta isu idi ti manugang a lalaki ni Secanias nga anac a lalaki ni Ara; ket ni Johanan nga anacna a lalaki inasawana ti anac a babai ni Mesullam nga anac a lalaki ni Berekias.

¹⁹ Casta met nga insaoda iti sangoc dagiti naimbag nga aramidna, ket indamagda kencuana dagiti sasaoc. Ket ni Tobias nagibaon cadagiti sursurat a pamagbutengna caniac.