Nehemias 5 - Ti Biblia (1973)

Patalgedan ni Nehemias ti panacaawan ti panagpaanac.

¹ Idin bimmangon ti maysa a dackel nga ickis dagiti tattao ken dagiti assawada a babbai a maibusor cadagiti cacabsatda a Judios.

² Ta adda idi dagiti nagcuna, Dacami, dagiti annacmi a lallaki ken babbai, aducami: gumun-odtayo coma iti trigo, tapno canentayo coma ken agbiagtayo.

³ Adda met idi dadduma a nagcuna, Dacami isalsaldami dagiti taltalonmi, ken cauvuvasanmi, ken balbalaymi: gumun-odtayo coma iti trigo, a maipoon iti bisin.

⁴ Adda met idi dagiti nagcuna, Bimmulodcami iti cuarta a maipaay iti pagpabuis ti ari insaldami dagiti taltalonmi ken cauvuvasanmi.

⁵ Nupay casta ita ti lasagmi cas la iti lasag dagiti cacabsatmi, dagiti annacmi cas cadagiti annacda: ket, adtoy, pabagenmi dagiti annacmi a lallaki ken babbai tapno maadipenda, ket dadduma cadagiti annacmi a babbai nabag-endan; awan ti mabalinmi a pangarayat; ta dagiti sabali a tattao icutanda dagiti taltalonmi ken dagiti cauvuvasanmi.

⁶ Ket nacaungetac unay idi nangngegco ti ickisda ken dagitoy a sasao.

⁷ Idin inimtuudco caniac met laeng, ket nakisubangac cadagiti natacneng ken cadagiti turayen, ken kinunac cadacuada, Dacayo birukenyo ti paanac, tunggal maysa iti cabsatna. Ket inyarayatco ti maysa a dackel a gimong a maibusor cadacuada.

⁸ Ket kinunac cadacuada, Datayo a cas iti cabaelantayo sinubbottayo idi dagiti cacabsattayo a Judios, a nalaco idi cadagiti nasnacion, ket ilacoyo pay aya dagiti cacabsatyo, ket mailacoda cadacayo? Idin nagtalnada, ket dida nacasarac iti maysa a sao.

⁹ Kinunac met, Ti banag nga aramidenyo saan a naimbag: dicayo rebbeng aya iti magna iti panagbuteng iti Dios, a maipoon iti panangumsi dagiti nasnacion a cabusortayo?

¹⁰ Ket siac met, cacabsatco ken ad-adipenco, pabulodac ida iti cuarta ken trigo. Agdawatac cadacayo, bay-antayo coma daytoy a panagpaanac.

¹¹ Dawatec cadacayo isubliyo, cadacuada itoy met laeng nga aldaw dagiti taltalonda, dagiti cauvuvasanda, dagiti inol-olivaanda, ken dagiti balbalayda, casta met ti apagcasangagasut ti pirac, ken ti trigo ti baro nga arac, ken ti lana, a siningiryo cadacuada.

¹² Idin kinunada, Isubliminto cadacuada, ket dicamto agdawat iti aniaman cadacuada; casta ti aramidenminto, cas met laeng iti saoem. Idin inayabac dagiti papadi, ket innalac ti maysa a sapata cadacuada, tapno agaramidda a mayannurot itoy a cari.

¹³ Casta met a winagwagco ti sabocco, ket kinunac, Casta ti panangwagwag ti Dios iti tunggal tao manipud iti balayna, ken manipud iti trabajona, a di mangtungpal itoy a cari; castoy met laeng ti pannacaiwagwagna, ken pannacaongaongna. Ket ti amin a gimong kinunana, Sapay coma, ket dinaydayawda ni Jehova. Ket inaramid dagiti tattao a mayannurot itoy a cari.

¹⁴ Maysa pay nanipud iti tiempo a pannacadutocco a gobernadora iti daga ti Juda, nanipud iti maicaduapulo a tawen agingga met laeng iti maicatlopulo ket dua ni ari Artaxerxes, cayatco a sawen sangapulo ket dua a tawen, Siac ken dagiti cacabsatco dicami nangan iti tinapay ti gobernador.

¹⁵ Ngem dagiti naggobernador nga immununa ngem siac pinaawitanda dagiti tattao, ket nagalada cadacuada iti tinapay ken arac, sabali laeng ti uppat a pulo a siclo a pirac; wen, dagiti met laeng ad-adipenda nagturayda cadagiti tattao: ngem diac inaramid iti casta, a gapu iti panagbuteng iti Dios.

¹⁶ Wen, intuloyco met iti aramid daytoy a bacud, dicami gimmatang iti aniaman a daga: ket amin dagiti ad-adipenco naguornongda idiay a maipaay iti aramid.

¹⁷ Maysa pay iti lamesaanco, adda idi sangagasut ket limapulo a lallaki cadagiti Judios ken cadagiti turayen sabali laeng dagidiay immay cadacami a naggapu cadagiti nacion a nai licmut cadacami.

¹⁸ Ti naisagana idi a maipaay iti maysa nga aldaw maysa idi a vaca ken innem a napili a carnero; casta met dagiti tumatayab a naisaganada a maipaay caniac, ket maminpinsan bayat iti sangapulo nga aldaw ti kinaadu dagiti amin a kita ti arac: nupay casta iti amin daytoy diac nagdawat iti tinapay ti gobernador, agsipud ta nadagsen idi ti kinabag-en iti rabaw daytoy nga umili.

¹⁹ Lagipennac, O Diosco, a maipaay iti imbag, amin ti inaramidco a maipaay itoy nga umili.