Nehemias 4 - Ti Biblia (1973)

Ti aramid macatawaan gapu cada Sanballat ken Tobias. Ti ibubusor dagiti cabusor. Dagiti sagana dagiti agbangon.

¹ Ngem naaramid nga idi nangngeg ni Sanballat a bangbangonenmi idi ti bacud nacaunget ken nagpungtot iti dackel, ket rinabrabacna dagiti Judios.

² Ket nagsao iti sango dagiti cacabsatna ken ti buyot ti Samaria, ket kinunana, Ania ti ar-aramiden dagitoy nacapsut a Judios? papigsaendanto aya dagiti bagbagida? agidatondanto? magibusandanto aya iti maymaysa nga aldaw? pagungarenda aya dagiti batbato nga iruar iti gabsuon ti tinumec, idinto ta mauramda?

³ Ket adda idi ni Tobias nga Ammonita iti dennana, ket kinunana, Uray ti bangbangonenda, no umuli ti maysa a zorra, rebbaennanto ti bacudda a kinavite.

⁴ Timudem, O Diosmi, ta mau-yuyawcami: ket ibaw-ingmo ti panangumsida iti rabaw ti oloda met laeng, ket itdem ida a maysa a samsam idiay daga ti pannacacayaw;

⁵ Ket dica abbongan ti kinadangcocda, ket dica bay-an a mapunas ti basolda iti sangoanam; ta ginargaridaca nga agpungtot iti sango dagiti agbangon.

⁶ Iti casta binangonanmi ti bacud; ket amin a bacud napagsisilpu idi agingga iti caguddua ti catayagna: ta ti umili addaan maysa a nakem tapno agaramid.

⁷ Ngem naaramid nga idi a da Sanballat, ken Tobias, ken dagiti Arabes, ken dagiti Ammonitas, ken dagiti Asdoditas nangngegda a ti pannacatarimaan dagiti bacud ti Jerusalem agtultuluy idi, ken mangrugin a masullatan idi dagiti gutgutbaw, nagpungtotda ngarud unay;

⁸ Ket nagtutulagda amin a sangcatipon tapno umayda ket gumubatda a maibusor iti Jerusalem, ken mangriribuc kencuana.

⁹ Ngem nagcararagcami iti Diosmi, ket nangisaadcami iti agbantay a maibusor cadacuada iti aldaw ken rabii, a maipoon cadacuada.

¹⁰ Ket ti Juda kinunana, Ti pigsa dagiti agaw-awit cadagiti aw-awiten agcapuy, ket adda adu a tidda; iti casta a ditoy macabael a mangbangon iti bacud.

¹¹ Ket kinuna dagiti cabusormi, Didanto ammo, didanto makita, agingga iti macastrectayo iti tengngada, ken mapatay ida, ken mapasardeng ti aramid.

¹² Ket naaramid idi a dagiti Judios nga agnaed iti dennada immayda, kinunada cadacami iti naminpulo a daras, a naggapu cadagiti amin a disdisso, Rebbengyo ti agsubli cadacami.

¹³ Gapuna nga insaadco cadagiti cababaan unay a paset ti disso iti licudan ti bacud, cadagiti disso a nalayang, insaadco idiay dagiti tattao a mayannurot cadagiti familiada agraman cadagiti campilan, picpica, ken ba-baida.

¹⁴ Ket kimmitaac, ket timmacderac, ket kinunac cadagiti natacneng, ken cadagiti turayen, ken iti matda nga umili, Dicayo agbuteng cadacuada lagipenyo ti Apo, a dackel ken nacakigkigtot, ket makigubatcayo a maipaay cadagiti cacabsatyo, annacyo a lallaki, ken annacyo a babbai, assawayo a babbai, ken balbalayyo.

¹⁵ Ket naaramid, idi a naammoan dagiti cabusormi a naipacaammo cadacami, ken ti Dios pinaawanna ti patigmaanda, nagsublicami amin iti bacud, tunggal maysa iti aramidna.

¹⁶ Ket naaramid nanipud iti daydi a tiempo, a ti caguddua dagiti ad-adipenco nagaramidda iti aramid, ket ti cagudduada iniggamanda dagiti pica, dagiti calasag, ken dagiti bai, ken dagiti cabal; ket adda dagiti turayen iti licudan iti amin ti balay ni Juda.

¹⁷ Dagiti nangbangon idi bacud ken dagiti nagawit cadagiti aw-awiten nagimetda met laeng; tunggal maysa ti maysa nga imana nangaramid iti aramid, ket ti sabali nagiggem iti igamna:

¹⁸ Ket dagiti agbangon, tunggal maysa adda idi ti campilanna a naibarikes iti siketna, ket iti casta nagbangonda. Ket ti agpaguni iti tororot adda idi iti dennac.

¹⁹ Ket kinunac cadagiti natacneng, ken cadagiti turayen ken iti matda a tattao, Ti aramid dackel ken atiddug, ket masinasinatayo iti rabaw ti bacud, ti maysa adayu iti sabili:

²⁰ Iti uray aniaman a disso a pacangeganyo iti aweng ti tororot, tumiponcayo idiay cadacami; ti Diostayo makigubatto a maipaay cadatayo.

²¹ Iti casta nagaramidcami idi aramid: ket ti cagudduada nagiggem cadagiti pica manipud iti sumingising ti bigat agingga iti lumgac dagiti bitbitwen,

²² Casta met idi met laeng a tiempo kinunac cadagiti tattao, Tunggal maysa agraman adipenna agtaeng coma iti uneg ti Jerusalem, tapno isuda coma ti guardia cadacami, ken agtrabajo iti aldaw.

²³ Iti casta uray siac, uray dagiti cacabsatco, uray dagiti ad-adipenco, uray dagiti lallaki a guardia a simmurot caniac, awan cadacami ti nangiccat cadagiti cawesmi, tunggal maysa napan agraman igamna iti danum.