Nehemias 3 - Ti Biblia (1973)

Dagiti pannacasarita ti aramid cadagiti ruangan ken iti bacud.

¹ Idin timmacder ni Eliasib a nangato a padi agraman cadagiti cacabsatna a papadi, ket binangonda ti ruangan dagiti carnero; isu ti sinantificarda, ket impatacderda dagiti ruanganna; agingga met laeng iti torre ti Hammea isu sinantificarda agingga iti torre ni Hananeel.

² Ket ti dumna kencuana binangon dagiti lallaki ti Jerico. Ket ti dumna cadacuada binangon ni Zacur nga annac a lalaki ni Imri.

³ Ket ti ruangan ti ican binangon dagiti annac a lallaki ni Hassenaa insaadda dagiti taricayona, ken impatacderda dagiti ruanganna; dagiti pamalunetanna, dagiti balunetna.

⁴ Ket ti dumna cadacuada tinarimaan ni Meremot nga annac a lalaki ni Urias, nga anac a lalaki ni Hackoz. Ket iti dumna cadacuada tinarimaan ni Mesullam nga anac a lalaki ni Berekias, nga anac a lalaki ni Mesezabeel. Ket ti dumna cadacuada tinarimaan ni Sadoc nga anac a lalaki ni Baana.

⁵ Ket ti dumna cadacuada tinarimaan dagiti Tecoitas; ngem dagiti natacnengda saanda nga insaad dagiti lengngesda iti aramid ti apoda.

⁶ Ket ti daan a ruangan tinarimaan da Joiada nga anac a lalaki ni Pasea ken Mesullam nga anac a lalaki ni Besodias; incabilda dagiti taricayona, ken impatacderda dagiti ruanganna, ken dagiti pamalunetanna ken dagiti balunetna.

⁷ Ket ti dumna cadacuada tinarimaan da Melatias a Gabaonita, ken Jadon a Meronotita, a lallaki ti Gabaon, ken ti Mizpa, a biang ti trono ti gobernador iti ballasiw ti Carayan.

⁸ Ti dumna kencuana tinarimaan ni Uzziel nga anac a lalaki ni Harhaia dagiti mammanday iti balitoc. Ket ti dumna kencuana tinarimaan ni Hananias a maysa cadagiti manangaramid iti bangbanglo, ket pinatibkerda ti Jerusalem agingga met laeng iti acaba a bacud.

⁹ Ket ti dumna cadacuada tinarimaan ni Repaias nga anac a lalaki ni Hur, nga agturay iti guddua ti sacup ti Jerusalem.

¹⁰ Ket tidumna cadacuada tinarimaan ni Jedaias nga anac a lalaki ni Harumof, iti sangoanan ti balayna. Ket ti dumna kencuana tinarimaan ni Hattus nga anac a lalaki ni Hosbanias.

¹¹ Da Melkias nga anac a lalaki ni Harim, ken Hasub nga anac a lalaki ni Pahat-moab, tinarimaanda ti sabali a paset, ken ti torre dagiti horno.

¹² Ket ti dumna kencuana tinarimaan ni Sallum nga anac a lalaki ni Halohes, nga agturay iti guddua ti sacup ti Jerusalem, isu ken dagiti annacna a babbai.

¹³ Ti ruangan ti lobong tinarimaan ni Hanun, ken dagiti agnaed iti Zanoa: isu ti binangonda, ken impatacderda dagiti ruanganna, dagiti pamalunetanna, ken dagiti balunetna, ken sangaribu a casico iti bacud agingga iti ruangan ti ibleng.

¹⁴ Ket ti ruangan ti ibleng tinarimaan ni Malkias nga anac a lalaki ni Recab, nga agturay iti sacup ti Bet-haccerem; isu ti binangonna, ken impatacderna dagiti ruanganna, dagiti pamalunetanna, ken dagiti balunetna.

¹⁵ Ket ti ruangan ti ubbog tinarimaan ni Sallum nga anac a lalaki ni Col-hoce, a turayen iti sacup ti Mizpa; isu ti binangonna, ken inabbonganna, ken impatacderna dagiti ruanganna, dagiti pamalunetanna, ken dagiti balunetna, ken ti bacud ti tangke ti Sela iti denna ti minuyongan ti ari, agingga met laeng cadagiti tucad a sumalog manipud iti ili ni David.

¹⁶ Iti calpasanna tinarimaan ni Nehemias nga anac a lalaki ni Azbuc, a turayen iti guddua ti sacup ti Betsur, agingga iti disso iti sangoanan dagiti tantanem ni David, ken agingga iti tangke a naaramid idi, ken agingga iti balay dagiti mamaingel a lallaki.

¹⁷ Iti calpasanna tinarimaan dagiti Levitas, ni Rehum nga anac a lalaki ni Bani. Ti dumna kencuana tinarimaan ni Asabias, a turayen iti guddua ti sacup ti Ceila a maipaay iti sacupna.

¹⁸ Iti calpasanna tinarimaan dagiti cacabsatda, ni Bavvai nga anac a lalaki ni Henadad, turayen iti guddua ti sacup ti Ceila.

¹⁹ Ket ti dumna kencuana tinarimaan ni Ezer nga anac a lalaki ni Jesua, nga agturay ti Mizpa, iti sabali a paset, iti sangoanan ti sang-atan agingga iti nacapenpenan dagiti igam idiay pagsicoan ti bacud.

²⁰ Iti sumaganad kencuana tinarimaan a siraragut unay ni Baruc, nga anac a lalaki ni Zacai iti sabali a paset, manipud iti pagsicoan ti bacud agingga iti ruangan ti balay ni Eliasib a nangato a padi.

²¹ Iti sumaganad kencuana tinarimaan ni Meremot nga anac a lalaki ni Urias nga anac a lalaki ni Hackoz iti sabali a paset, manipud iti ruangan ti balay ni Eliasib agingga met laeng iti ungto ti balay ni Eliasib.

²² Ket iti sumaganad kencuana tinarimaan dagiti papadi, dagiti lallaki ti Tanap.

²³ Iti sumaganad cadacuada tinarimaan da Benjamin ken Hasub iti sangoanan ti balayda. Iti sumaganad cadacuada tinarimaan ni Azarias nga anac a lalaki ni Maasias nga anac a lalaki ni Ananias iti denna ti bucodna a balay.

²⁴ Iti sumaganad kencuana tinarimaan ni Binnui nga anac a lalaki ni Henadad iti sabali a paset, manipud iti balay ni Azarias agingga iti pagsicoan ti bacud, ken iti suli.

²⁵ Ni Palal nga anac a lalaki ni Uzai tinarimaanna ti sangoanan ti pagsicoan ti bacud, ken ti torre nga agtacder manipud iti nangatngato a balay ti ari, nga adda iti paraangan ti guardia. Iti sumaganad kencuana tinarimaan ni Pedaia nga anac a lalaki ni Paros.

²⁶ (Dagiti Netineos nagnaedda idiay Ofel, agingga iti disso a sangoanan ti ruangan ti danum nga agpadaya, ken ti torre nga agtacder.)

²⁷ Iti sumaganad kencuana dagiti Tecoitas tinarimaanda iti sabali a paset, iti sangoanan ti dackel a torre nga agtacder, ken agingga iti bacud ti Ofel.

²⁸ Iti ngato ti ruangan ti cabayo tinarimaan dagiti papadi, tunggal maysa iti sangoanan ti bucodna a balay.

²⁹ Iti sumaganad cadacuada tinarimaan ni Sadoc nga anac a lalaki ni Immer iti sangoanan ti bucodna a balay. Ket iti sumaganad kencuana tinarimaan ni Semaias nga anac a lalaki ni Secanias, nga agaywan ti akindaya a ruangan.

³⁰ Iti sumaganad kencuana tinarimaan da Hananias nga anac a lalaki ni Selemias, ken Anun a maicanem nga anac a lalaki ni Salaf, iti sabali a paset. Iti sumaganad kencuana tinarimaan ni Mesullam nga anac a lalaki ni Barakias iti sangoanan ti sagumbina.

³¹ Iti sumaganad kencuana tinarimaan ni Melkias a maysa cadagiti mammanday iti balitoc agingga iti balay dagiti Netineos, ken dagiti agtagtagilaco iti sangoanan ti ruangan nga Hammifkad, ken agingga iti sang-atan iti suli.

³² Ket iti nagbaetan ti sang-atan iti suli ken ti ruangan dagiti carnero tinarimaan dagiti mammanday iti balitoc ken dagiti agtagtagilaco.