Nehemias 12 - Ti Biblia (1973)

Dagiti papadi ken Levitas a nakidateng ken Zorobabel. Ti pannacaidaton ti bacud ti Jerusalem. Dagiti annuruten a maipaay iti panagservi ti templo.

¹ Dagitoy isuda dagiti papadi ken dagiti Levitas a nakipagsang-at cada Zorobabel nga anac a lalaki ni Salatiel, ken Jesua: da Saraias, Jeremias, Esdras,

² Amarias, Malluc, Hattus,

³ Secanias, Rehum, Meremot,

⁴ Addo, Gineto, Abias,

⁵ Miamin, Maadias, Bilga,

⁶ Semaias, Joiarib, Jedaias,

⁷ Sallum, Amoc, Helcias, Jedaias. Dagitoy isuda idi dagiti pangoloen dagiti papadi ken dagiti cacabsatda cadagidi al-aldaw ni Jesua.

⁸ Maysa pay dagiti Levitas: da Jesua, Binui, Cadmiel, Serebias, Juda, ken Matanias, nga isu idi ti pangolo iti panagyaman, isu ken dagiti cacabsat.

⁹ Casta met da Bacbukias, ken Uno addada idi iti sangoanan dagiti cacabsatda a mayalubog iti annongda.

¹⁰ Ket ni Jesua pinutotna ni Joiakim ket ni Joiakim pinutotna ni Eliasib, ket ni Eliasib pinutotna ni Joiada,

¹¹ Ket ni Joiada pinutotna ni Jonatan, ket ni Jonatan pinutotna ni Jaddua.

¹² Ket cadagiti al-aldaw ni Joiakim dagiti papadi a pangoloen dagiti balbalay dagiti amma isuda idi: ken Seraias, ni Meraias; ken Jeremias, ni Jananias;

¹³ Ken Esdras, ni Mesullam; ken Amarias, ni Johanan;

¹⁴ Ken Melicai, ni Jonatan; ken Sebanias, ni Jose;

¹⁵ Ken Harim, ni Adna; ken Meraiot, ni Helcai;

¹⁶ Ken Iddo, ni Zacarias; ken Ginneton, ni Mesullam;

¹⁷ Ken Abias, ni Zecri; ken Miniamin, ken Moadias, ni Piltai;

¹⁸ Ken Bilga, ni Sammua; ken Semaias, ni Jonatan;

¹⁹ Ken Joiarib, ni Matenai; ken Jedaias, ni Uzzi;

²⁰ Ken Sellai, ni Callai; ken Amoc, ni Eber;

²¹ Ken Helcias, ni Hasabias; ken Jedaias, ni Natanael.

²² Ti maipapan cadagiti Levitas, cadagidi aldaw da Eliasib, Joiada, Johanan, ken Jaddua, naisuratda idiay dagiti pangoloen dagiti balbalay dagiti amma; casta met dagiti papadi, iti panagari ni Dario a Persiano.

²³ Dagiti annac a lallaki ni Levi, dagiti pangoloen dagiti balbalay dagiti amma, naisuratda iti libro dagiti cronicas, agingga cadagiti aldaw ni Johanan nga anac a lalaki ni Eliasib.

²⁴ Ket dagiti pangoloen dagiti Levitas: da Hasabias, Serebias, ken Jesua nga anac a lalaki ni Cadmiel, agraman cadagiti cacabsatda iti sangoananda, tapno agdayaw ken agyamanda a mayalubog iti bilin ni David a lalaki ti Dios nga agbantayda iti batangda.

²⁵ Da Mathanias, Bacbukias, Obadias, Mesullam, Talmon, ken Accub, isuda idi dagiti agbantay iti ruangan nga agaywan cadagiti balbalay a pagrikepan dagiti ruruangan.

²⁶ Dagitoy naaddada cadagiti aldaw ni Joakim, nga anac a lalaki ni Jesua, nga anac a lalaki ni Josedac, ken cadagidi al-aldaw da Nehemias a gobernador, ken ni padi Esdras nga escriba.

²⁷ Ket idi pannacaidaton ti bacud ti Jerusalem sinapulda dagiti Levitas cadagiti amin a disdissoda, tapno iyegda ida idiay Jerusalem, tapno salimetmetanda ti pannacaidaton iti ragsac, cadagiti panagyaman agpadpada, ken iti panagcanta, agraman piangpiangpiang, salsalterio, ken ar-arpa.

²⁸ Ket dagiti annac a lallaki dagiti cumacanta naguornongda, a naggapu iti tanap iti aglicmut iti Jerusalem, ken castamet manipud cadagiti purpuroc dagiti Netofatitas;

²⁹ Casta met nanipud Bet-galgal, ken naggapu cadagiti taltalon ti Gabaa ken Azmabet: ta dagiti cumacanta imbangonda cadacuada dagiti purpuroc a naglicmut iti Jerusalem.

³⁰ Ket ginugoranda dagiti bagbagida dagiti papadi ken dagiti Levitas; ket ginugoranda dagiti tattao, ken dagiti ruruangan, ken ti bacud.

³¹ Idin inyulic dagiti pangoloen ti Juda iti rabaw ti bacud, ket nangdutocac iti dua a dackel a pangen nga agyaman ken aglibut; a ti maysa napan iti macanawan iti rabaw ti bacud nga agturong iti ruangan ti pagiblengan.

³² Ket simmurot cadacuada da Osaias, ken ti caguddua dagiti pangpangoloen ti Juda,

³³ Ken da Azarias, Esdras, Mesullam,

³⁴ Juda, Benjamin, Semaias, ken Jeremias.

³⁵ Ken dadduma cadagiti annac a lallaki dagiti papadi a sitatangguyobda: ni Zacarias nga anac a lalaki ni Jonatan, nga anac a lalaki ni Semaias, nga anac a lalaki ni Matanias, nga anac a lalaki ni Micaias, nga anac a lalaki ni Zacur, nga anac a lalaki ni Asaf;

³⁶ Ken dagiti cacabsatna, da Semeias, Azarael, Milalai, Gilelai, Maia, Natanael, Juda, ken Hanani, a siiiggemda cadagiti arwaten ti musica ni David a lalaki ti Dios; ket ni Esdras nga escriba adda iti sangoda.

³⁷ Ket iti ruangan ti ubbog, ken iti aglinteg iti sangoda, immulida cadagiti tuctucad ti ciudad ni David, idiay sang-atan ti bacud, iti ngato ti balay ni David, agingga met laeng iti ruangan ti danum nga agpadaya.

³⁸ Ket ti sabali a pangen dagidiay a nagyaman napanda sinabet ida, ket simmurotac cadacuada, a cadduac ti caguddua dagiti tattao, iti rabaw ti bacud, iti ngato ti torre dagiti horhorno, agingga met laeng iti acaba a bacud,

³⁹ Ken iti ngato ti ruangan ni Efraim, ken iti daan a ruangan, ken iti ruangan ti ican, ken iti ruangan ti torre ni Hananeel, ken ti torre ni Hamat, agingga met laeng iti ruangan dagiti carcarnero: ket nagtacderda a siiintec iti ruangan ti guardia.

⁴⁰ Iti casta nagtacder dagiti nagcadua a pangen dagidiay a nagyaman idiay balay ti Dios, ket siac, ken ti caguddua dagiti agturay a caduac;

⁴¹ Ket dagiti papadi, Eliakim, Maaseias, Miniamin, Micais, Elioenai, Zacarias, Hananias, sitatangguyobda;

⁴² Ken da Maaseias, Semaias, Eleazar, Uzzi, Johanan, Melkias, Elam, ken Ezer. Ket nagcanta iti natbag dagiti cumacanta, caduada ni Israhia nga agaywan cadacuada.

⁴³ Ket nangipaayda cadagiti dadackel a sacrificio idi nga aldaw, ket nagrag-oda; ta pinagrag-o ida ti Dios iti dackel a rag-o; ket nagrag-o met dagiti babbai ken dagiti ubbing: iti casta a ti rag-o ti Jerusalem nangeg idi iti adayu unay.

⁴⁴ Ket daydi nga aldaw nadutocan dagiti lallaki nga agaywan cadagiti sagsagumbi a maipaay cadagiti gamgameng, maipaay cadagiti datdaton a maitayag, maipaay cadagiti umuna a bungbunga, ken maipaay cadagiti apagcapullo, tapno urnongenda cadacuada, cas mayalubog cadagiti aw-away dagiti il-ili, dagiti apag a nadutocan gapu iti linteg a maipaay cadagiti papadi ken cadagiti Levitas: ta nagrag-o ti Juda a maipaay cadagiti papadi ken cadagiti Levitas a nagtalinaed.

⁴⁵ Ket sinalimetmetanda ti incumit ti Diosda, ken ti panangaluad ti panaggugor, ket casta ti inaramid dagiti cumacanta ken dagiti agaywan iti ruangan cas mayannurot iti bilin ni David, ken ni Salomon nga anacna.

⁴⁶ Ta cadagidi al-aldaw da David ken Asaf idi ugma adda idi maysa a pangolo dagiti cumacanta, ken dagiti cancanta a pagdayaw ken pagyaman iti Dios.

⁴⁷ Ket amin nga Israel cadagiti al-aldaw ni Zorobabel, ken cadagiti aldaw ni Nehemias, intedda dagiti apag dagiti cumacanta ken dagiti agaywan iti ruangan, cas nasapul iti tunggal aldaw: ket inlasinda cadagidiay ti naipaay cadagiti Levitas: ket dagiti Levitas inlasinda cadagidiay ti naipaay cadagiti annac a lallaki ni Aaron.