Nehemias 11 - Ti Biblia (1973)

Lista dagiti nagnaed idiay Jerusalem. Dagiti sabsabali a disdisso a nanaedan.

¹ Ket nagnaed dagiti pangpangoloen dagiti tattao idiay Jerusalem naggiginnasat met ti matda cadagiti tattao, tapno iyegda ti maysa cadagiti sangapulo nga agtaeng idiay Jerusalem a ciudad a nasantoan, ken ti maminsiam cadagiti sabali nga il-ili.

² Ket binendicionan ti umili dagiti amin a lallaki a siaayat a nangipaay cadagiti bagida met laeng nga agtaeng idiay Jerusalem.

³ Dagitoy isuda idi dagiti pangoloen ti provincia a nagnaed idiay Jerusalem: ngem cadagiti il-ili ti Juda nagnaed ti tunggal maysa iti cucuana cadagiti il-ilida, cayatna a sawen, ti Israel, dagiti papadi, ken dagiti Levitas, ken dagiti Netineos, ken dagiti annac dagiti ad-adipen ni Salomon.

⁴ Ket idiay Jerusalem nagnaed dagiti dadduma cadagiti annac ni Juda, ken cadagiti annac ni Benjamin. Cadagiti annac ni Juda: ni Ataias nga anac a lalaki ni Uzias, nga anac a lalaki ni Zacarias, nga anac a lalaki ni Amarias, nga anac a lalaki ni Sefatias, nga anac a lalaki ni Mahalaleel, cadagiti annac ni Fares;

⁵ Ken ni Maasias nga anac a lalaki ni Baruc, nga anac a lalaki ni Colhoze, nga anac a lalaki ni Hazaias, nga anac a lalaki ni Adaias, nga anac a lalaki ni Joiarib, nga anac a lalaki ni Zacarias, nga anac a lalaki ni Seloni.

⁶ Amin dagiti annac ni Fares a nagnaedda idiay Jerusalem uppat a gasut innem a puloda ket walo a lallaki a mamaingel.

⁷ Ket dagitoy dagiti annac a lallaki ni Benjamin: ni Salu nga anac a lalaki ni Mesullam, nga anac a lalaki ni Joed, nga anac a lalaki ni Padaias, nga anac a lalaki ni Colaias, nga anac a lalaki ni Maaseias, nga anac a lalaki ni Utiel, nga anac a lalaki ni Jesaia.

⁸ Ket iti sumaganad kencuana ni Gabbai, ni Sallai, siam a gasut duapuloda ket walo.

⁹ Ket ni Joel nga anac a lalaki ni Zecri isu idi ti agimatang cadacuada; ket ni Juda nga anac a lalaki ni Assenua isu idi ti maicadua a pangolo ti ciudad.

¹⁰ Cadagiti papadi: ni Jedaias, nga anac ni Joiarib, ni Jakin,

¹¹ Ni Seraias nga anac ni Helcias, nga anac a lalaki ni Mesullam, nga anac a lalaki ni Sadoc, nga anac a lalaki ni Meraiot, nga anac a lalaki ni Ahitub, nga agturay iti balay ti Dios,

¹² Ken dagiti cacabsatda a nagaramid ti aramid iti balay, walogasut duapuloda ket dua; ken ni Adaias nga anac a lalaki ni Jeroham, nga anac a lalaki ni Pelalias, nga anac a lalaki ni Amsi nga anac a lalaki ni Zacarias, nga anac a lalaki ni Fasur, nga anac a lalaki ni Malkias.

¹³ Ken dagiti cacabsatna, a pangpangoloen dagiti balbalay dagiti amma, duagasut uppat a puloda ket dua; ken ni Amasai nga anac a lalaki ni Azarael, nga anac a lalaki ni Azai, nga anac a lalaki ni Mesillemot, nga anac a lalaki ni Immer,

¹⁴ Ken dagiti cacabsatda, dagiti lallaki a mannacabalin ken maingel, sangagasut duapuloda ket walo. Ket ti agaywan cadacuada isu idi ni Zabdiel, nga anac a lalaki ni Hedolim.

¹⁵ Ket cadagiti Levitas: ni Semaias, nga anac a lalaki ni Hassub, nga anac a lalaki ni Azricam, nga anac a lalaki ni Hasabias, nga anac a lalaki ni Buni;

¹⁶ Ken da Sabetai ken Josabad, cadagiti pangoloen dagiti Levitas, nga agimatang idi cadagiti annongen iti ruar ti balay ti Dios;

¹⁷ Ken ni Matanias nga anac a lalaki ni Mica, nga anac a lalaki ni Zabdi, nga anac a lalaki ni Asaf, nga isu idi ti pangolo a mangrugi iti panagyaman iti cararag, ket ni Bacbucias, ti maicadua cadagiti cacabsatna; ken ni Abda nga anac a lalaki ni Samua, nga anac a lalaki ni Galal, nga anac a lalaki ni Gedutun.

¹⁸ Amin dagiti Levitas idiay nasantoan a ciudad duagasut walopuloda ket uppat.

¹⁹ Maysa pay dagiti agaywan iti ruangan, da Accub, Talmon, ken dagiti cacabsatda, a nagbantay cadagiti ruangan, sangagasut pitopuloda ket dua.

²⁰ Ket ti matda iti Israel, cadagiti papadi, cadagiti Levitas, addada idi cadagiti amin nga il-ili ti Juda tunggal maysa iti tawidna.

²¹ Ngem dagiti Netineos nagnaedda idiay Ofel: ket da Siha ken Gispa isuda idi ti pangoloen cadagiti Netineos.

²² Ti agaywan met cadagiti Levitas idiay Jerusalem isu idi ni Uzzi nga anac a lalaki ni Bani, nga anac a lalaki ni Hasabias, nga anac a lalaki ni Mattanias, nga anac a lalaki ni Mica, cadagiti annac a lallaki ni Asaf, dagiti cumacanta, iti annongen iti balay ti Dios.

²³ Ta adda idi maysa a bilin a naggapu iti ari a maipapan cadacuada, ken maysa a nakedngan a taraon a maipaay cadagiti cumacanta, cas masapul iti tunggal aldaw.

²⁴ Ket ni Petahias nga anac a lalaki ni Mesezabel, cadagiti annac ni Zera nga anac a lalaki ni Juda, adda idi iti panangidalan ti ari cadagiti amin a panggep a maipapan iti umili.

²⁵ Ket maipanggep cadagiti purpuroc, agraman cadagiti taltalonda, dadduma cadagiti annac ni Juda nagnaedda idiay Cariat-arbe ken cadagiti il-ilina, ken idiay Dibon ken cadagiti il-ilina, ken idiay Jecabseel ken cadagiti purpurocna,

²⁶ Ken idiay Jesua, ken idiay Molada, ken idiay Bet-pelet,

²⁷ Ken idiay Hasar-sual, ken idiay Beer-seba ken cadagiti il-ilina,

²⁸ Ken idiay Siclag, ken idiay Mecona ken cadagiti il-ilina,

²⁹ Ken idiay En-rimmon, ken idiay Serea, ken idiay Jermut,

³⁰ Zanoa, Adullam, ken cadagiti purpurocda, Lakis ken cadagiti taltalonna, Azeca ken cadagiti il-ilina. Iti casta nagpacarsoda nanipud iti Beer-seba agingga ti lobong ti Hinnom.

³¹ Dagiti annac ni Benjamin met nagnaedda manipud Gaba nga agtuloy, idiay Micmas ken Aia, ken idiay Bet-el ken cadagiti il-ilina,

³² Idiayi Anatot, Nob, Anania,

³³ Hazor, Rama, Gittaim,

³⁴ Hadid, Seboim, Neballat,

³⁵ Lod, ken Ono, a lobong dagiti nalaing nga agar-aramid.

³⁶ Ket cadagiti Levitas, dagiti dadduma cadagiti pannacadasdasig iti Juda naitiponda idi iti Benjamin.