Nahum 3 - Ti Biblia (1973)

Ti pannacarba ti Ninive maikeddeng ken maipalawag ti pannacadadaelna a matalipupus.

¹ Asi pay ti ili a nadara! isu a napno cadagiti kinaulbod ken panagrabsut; ti panagagaw saan a pumanaw.

² Ti waneswes ti baut, ken ti daranudor ti panagcaradacad dagiti pilpilid, ken dagiti cabcabayo nga agburang-it, ken dagiti luglugan nga agsaltec,

³ Ti sumalta iti cabayo, ken ti sumileng a campilan, ken ti gumilap a pica, ken ti kinaadu ti napapatay, ken ti dackel a gabsuon dagiti bangcay, ket awan ti patingga dagiti bangcay; isuda agtibcolda cadagiti bangbangcay;

⁴ Agsipud ti kinaadu ti pannakicamalala ti napintas a balangcantis, ti apo a babai dagiti kinamammoyon, a mangilaco cadagiti nasnacion a gapu iti pannakicamalalana, ken famfamilia a gapu cadagiti kinamammoyonna.

⁵ Adtoy, siac maibusorac kenca, cuna ni Jehova dagiti buybuyot, ket lucaisacto dagita cainmo dita sangoanan ti rupam; ket ipanayagconto cadagiti nasnacion ta kinalamolamom, ken cadagiti pagarian ta pannacabainmo.

⁶ Ket ipurruacconto ti nacaarariec a kinarugit kenca, ket aramidenca a naalas, ken ipabuyacanto.

⁷ Ket maaramidto, nga isu-amin a cumita kenca italawandacanto, ket cunana, Ti Ninive walangwalang: siasino ti mangdung-awto kencuana? sadino ti pagbirucacto cadagiti mangliwliwa kenca?

⁸ Nasaysayaatca aya ngem iti Noamon a naisaad iti nagtengngaan dagiti carcarayan, nga adda dandanum iti aglicmut kencuana; a ti sarikedkedna baybay, ket baybay ti bacudna?

⁹ Ti Etiopia ken ti Egipto isuda idi ti pigsana, ket awan idi patinggana: ti Put ken ti Libia isuda idi ti cabadangmo.

¹⁰ Nupay casta isu naipanaw, napan iti pannacacayaw; dagiti ububbing nga annacna naipurruacna a naredreddec iti oloanan dagiti isu-amin a lansangan; ket naggiginnasanggasatda nga agpaay cadagiti natacneng a lallalkina, ket amin dagiti natan-oc a lallakina a nareppetda cadagiti cawcawar.

¹¹ Sica met mabarteccanto; sica met mailemmengcanto; sica met agbiruccanto iti sarikedked a gapu iti cabusor.

¹² Isu-amin dagiti sarikedkedmo cacasdanto la iti cayo ti higos iti umuna a maloom a higos; a no magungunda, matnagda iti ngiwat ti mangan.

¹³ Adtoy, dagiti tattaom iti nagtengngaam isuda dagiti babbai; dagiti ruangan ti dagam silulucatda cadagiti cabusormo: ti apuy linamutna dagiti balunetmo.

¹⁴ Sumacdoca ti danum a maipaay iti panaglacub; papigsaem ta sarikedkedmo; inca iti pila, ken payatpayatem ti lupac; papigsaem ti horno ti ladrillo.

¹⁵ Idiay ikisapnacanto ti apuy; ti campilan dadaelennacanto; manglamutto kenca cas la iti lucton; umaduca ala a cas iti lucton; umaduca a cas iti dudon.

¹⁶ Sica pinaadum dagiti agbaniaga nga adaduda ngem cadagiti bitbitwen ti langit: ti lucton mangdadael, ket agtalaw.

¹⁷ Dagiti piprincipem casda la dudon, ket dagiti panguloem cacasda la pangen ti lucton nga agpacarso cadagiti dardarecdec iti aldaw a nalam-ec, ngem no ti init sumingising agtalawda, ket ti dissoda saan a malasin no sadino ti yanda.

¹⁸ Dagiti pastormo agdungsada, O ari ti Asiria; dagiti natacnengmo addada iti panaginana; dagiti tattaom maiwarada cadagiti banbantay, ket awan ti mangurnong cadacuada.

¹⁹ Awan ti macaagas ta tuocmo; ta sugatmo naut-ut; isu-amin a macangeg ti damag a maipapan kenca pagsipatenda dagiti im-imada maipuon kenca; ta siasino aya ti di naglasatan iti cancanayon ta kinadakesmo?