Nahum 2 - Ti Biblia (1973)

Ti pannacarba ti Ninive maikeddeng.

¹ Daydiay a mangburburac simmang-at a maibusor kenca: aywanam ti sarikedked, bantayam ti dalan, pakirdem dagita lomom, papigsaem unay ta pannacabalinmo.

² Ta ni Jehova pabaroenna ti kinatan-oc ni Jacob, a cas ti kinatan-oc ti Israel, ta dagiti agibuybuyat imbuyatda ida, ket dinadaelda dagiti santac ti uvasda.

³ Ti calasag dagiti maingel a lallakina napalabaga, dagiti natured a lallalki addaanda iti escarlata: dagiti luglugan agraniag iti paslepda iti aldaw ti panagsaganana, ket dagiti cipres a gaygayang iwaradiwadda.

⁴ Dagiti luglugan agpeggesda cadagiti daldalan; agtarayda cadagiti nalawa a daldalan; nga agsublisubli: ti langada cas la cadagiti aluten a sidadarang; agtarayda a cas la kimat.

⁵ Isu malagipna dagiti natatacnengna: isuda agtibcolda iti pannagnada; agdarasda a mapan iti bacudna, ket ti abbong maisagana.

⁶ Dagiti ruangan dagiti carcarayan maluctanda, ket ti palacio marunaw.

⁷ Ket isu nakedngan: isu malucaisan, maipan iti ruar; ket dagiti tagabuna a babbai agsainnecdanto a cas iti timec dagiti calapati, a dandanugenda dagiti barucongda.

⁸ Ngem ti Ninive nanipud idi ugma isu cas la ban-aw ti danum: nupay casta agtalawda. Aginteccayo, aginteccayo, ipuccawda; ngem awan ti tumaliaw a cumita.

⁹ Alaenyo ti sinamsam a pirac, alaenyo ti sinamsam a balitoc; ta awan ti patingga ti sanicua, ti dayag ti isu-amin a naimnas nga alicamen.

¹⁰ Isu maongaongan, ken maugutan, ken walangwalang; ket ti puso matunaw, ket dagiti tumtumeng agtitimogda, ket ti tuoc adda cadagiti isu-amin a lomo, ket dagiti ruprupa cadacuada amin nabessagda.

¹¹ Sadino ti taeng dagiti leon, ken ti panganan dagiti urbon a leon, a pagnaan ti leon ken ti leon a cabaian,, ti urbon ti leon, ket awan ti namagbuteng cadacuada?

¹² Ti leon ginisgisna a pinispisi ti umdas nga agpaay cadagiti urbonna, ken nangbeckel iti maipaay cadagiti cabayanna a leon, ket pinusecna dagiti gucayabna iti tinucmaanna, ken ti pagtaenganna iti panagagaw.

¹³ Adtoy, a maibusorac kenca, cuna ni Jehova dagiti buybuyot, ket uramecto iti asuc dagiti lugluganna, ket ti campilan alun-unennanto dagiti urbonmo a leon; ket pucawecto ta tinucmaam iti daga, ket ti timec dagiti babaonem dinto mangeganen.