Nahum 1 - Ti Biblia (1973)

Ti kinaimbag ken kinainget ni Jehova.

¹ Ti awit ti Ninive. Ti libro ti sirmata ni Nahum nga El-koshita.

² Ni Jehova naimon a Dios ken managibales: ni Jehova bumales ken mapunno iti unget; ni Jehova bumales cadagiti cabusorna, ket ipenpenna ti ungetna a maipaay cadagiti cabusorna.

³ Ni Jehova natanang nga agpungtot, ken dackel iti pannacabalin, ket uray casano dinanto ipalawag nga awanan basol ti nacabasol: ni Jehova adda dalanna iti alipugpog, ken bagio, ket dagiti ul-ulep isuda dagiti tapuc dagiti sacana.

⁴ Isu ungtanna ti baybay, ket pagmagaenna, ket patiananna dagiti isu-amin a carayan: ti Basan aglaylay, ken ti Carmelo; ket ti sabong ti Libano aglaylay.

⁵ Dagiti banbantay agkintayegda kencuana, ket dagiti turturod agrunawda; ket ti daga agcal-luyon iti saclangna, wen, ti lubong, ken isu-amin nga agnaed kencuana.

⁶ Siasino aya ti macabalin nga agintec iti saclang ti pungtotna? ket siasino aya ti macabalin nga agtalinaed iti rungsot ti pungtotna? Ti ungetna maibuyat a cas apuy, ket dagiti batbato maburacda a mawarawara a gapu kencuana.

⁷ Ni Jehova naimbag, maysa a sarikedked iti aldaw ti riribuc; ket ammona dagidiay nga agcamang kencuana.

⁸ Ngem babaen ti maysa a napigsa unay a layus paggibusennanto ti dissona, ket camatennanto dagiti cabusorna ingana iti sipnget.

⁹ Ania ti sicatenyo a maibusor ken ni Jehova? Isu paggibusennanto; ti tuoc dinto bumangon iti maicadua a daras.

¹⁰ Ta agcacamet a cas cadagiti sisiit, ken cas nabartec iti panaginumda, isuda maibusdan a matalipupus a cas iti namaga a nagparaspasan.

¹¹ Adda rimmuar kenca a maysa a mangisicat iti dakes a maibusor ken ni Jehova, nga agipatigmaan iti kinadakes.

¹² Castoy ti cuna ni Jehova: Uray no addaanda coma iti naananay a pigsa, ken casta met nga aduda coma, nupay casta mapucandanto met laeng, ket isu aglasatto. Uray no pinarigatca idi, dicanto parigaten manen.

¹³ Ket ita bungtolecto ti sangolna manipud kenca, ket gursutecto dagiti baludmo, a pagcaduaen.

¹⁴ Ket ni Jehova nagbilin a maipapan kenca, nga uray caano iti naganmo awanton ti maimula: manipud iti balay dagiti didiosmo pucanecto ti ladawan a kinitikitan ken ti ladawan a sinucog; aramidecto ti tanemmo; ta sica nadangkesca.

¹⁵ Adtoy, iti rabaw dagiti banbantay dagiti sacsaca daydiay a mangyeg cadagiti damdamag a naimbag, a nangipablaac iti cappia! Ngilinem dagiti fifiesta, O Juda, tungpalem dagiti carcarim; ta daydiay managdacdakes saanton a lumabas kenca: isu maikisap.