Mikias 7 - Ti Biblia (1973)

Ti Dios isu ti paggapuan ti silaw ken pacaisalacanan.

¹ Asiac pay! ta siac caslaac iti daydi panangpurosda cadagiti bungbunga a masapa, cas ti panagban-a iti uvas ti panagapit: awan ti raay a macan; ti cararuac tarigagayanna ti umuna a higos a naloom.

² Ti nasingpet a tao natayen iti daga, ket awan ti siasinoman a nalinteg cadagiti tattao: isuda amin agsanebda iti dara; isuda aganupda tunggal maysa iti cabsatna babaen ti maysa a bateng.

³ Dagiti im-imada sigagagetda tapno aramidenda ti dakes; ti principe agdawat, iti sagut ket ti ocom sisasagana a masucsucan; ket ti dackel a tao, isawangna ti dakes a tarigagay ti cararuana; castoy ti panagtitinnulong ti panangabelda.

⁴ Ti caimbagan cadacuada casla calunay; ti calilintegan dacdakes ngem ti alad a siit; ti aldaw dagiti pagbanbantayem, ti met laeng pannacasucnalmo dimtengen; ita mariribucdanto.

⁵ Saancayo nga agtalec iti carruba; dicayo icabil ti talecyo iti gayyem; annadam dagiti ruangan ti ngiwatmo iti daydiay agidda iti saclotmo.

⁶ Ta ti anac a lalaki iccatenna ti dayaw ti ama, ti anac a babai tumacderto a bumusor iti inana, ti manugang a babai a bumusor iti catugangana a babai; dagiti cabusor ti maysa a tao isuda dagiti cabbalayna met laeng.

⁷ Ngem no maipapan caniac, cumitaacto ken Jehova; agpannurayacto iti Dios ti pacaisalacanac; ti diosco denggennacto.

⁸ Dica agragsac iti maibusor caniac, O cabusorco; no matuangac, bumangonacto; no agtugawac iti sipnget, ni Jehova isunto ti silaw caniac.

⁹ Ituredconto ti pungtot ni Jehova, ta siac nagbasolac iti maibusor kencuana, agingga iti isakitna ti panggepco ken salacnibannac ti panangocomna: iruarnacto iti lawag ket makitacto ti kinalintegna.

¹⁰ Calpasanna isu makitanto ti cabusorco, ket ti bain abbonganna daydiay a nagcuna caniac, Sadino ti yan ni Jehova a Diosmo? Dagiti matac makitadanto ti tarigagayco kencuana; ita isu mabaddecto cas iti pitac cadagiti lansangan.

¹¹ Aldaw a panangibangon cadagiti bacudmo! iti dayta nga aldaw daydiay naikeddeng mayadayunto.

¹² Iti dayta nga aldaw umaydanto kenca manipud iti Asiria ken cadagiti ciudad ti Egipto, ken manipud iti Egipto agingga met laeng iti Carayan, ken manipud baybay agingga iti baybay, ken manipud bantay agingga iti bantay.

¹³ Nupay casta, ti daga langalangto maipuon cadagiti agnaed kencuana, maipuon iti bunga dagiti gapuananda.

¹⁴ Taraonam ti ilim iti sarucodmo, ti pangen ti pagtawidan, isuda nga agnaed nga agwaywayas, iti bakir iti tengnga ti Carmelo: mapaarabda coma idiay Basan ken Galaad, cas cadagiti al-aldaw idi punganay.

¹⁵ Cas cadagiti al-aldaw nga iruruarmo iti daga ti Egipto ipakitacto cadacuada dagiti nacascasdaaw a banbanag.

¹⁶ Dagiti nasnacion makitadanto ket mabainandanto cadagiti amin a bilegda; icabildanto ti imada iti ngiwatda; dagiti lapayagda agtulengdanto.

¹⁷ Dildilandanto ti tapoc cas maysa nga uleg; cas cadagiti aguy-uyas iti daga rumuardanto nga agpigpigerger cadagiti nailet a dissoda; umaydanto a sibubuteng ken Jehova a Diostayo ket mabutengdanto gapu kenca.

¹⁸ Siasino ti dios a cas kenca, a mamacawan ti kinadangkes, ken palabasenna ti salungasing ti tidda ti pagtawidenna? isu saanna a taginayonen ti pungtotna iti agnanayon, ta pagayayatanna iti kinamanagayat.

¹⁹ Isu caasiannatayto manen; baddekennanto dagiti kinadakestayo; ket ipurruacmonto amin dagiti basbasolda cadagiti caadalman ti baybay.

²⁰ Tungpalemto ti pudno ken Jacob, ken ti kinamanagayat ken Abraham, isu nga insapatam cadagiti ammami nanipud cadagidi al-aldaw idi punganay.