Mikias 6 - Ti Biblia (1973)

Ti pannakisuppiat ni Jehova iti ilina.

¹ Denggenyo ita ti cuna ni Jehova: Tumacderca, makisuppiatca iti sangoanan dagiti banbantay, ket dagiti turturod denggenda coma ti timecmo.

² Denggenyo, O dacayo banbantay, ti panangsuppiat ni Jehova, ket dacayo nabileg a pamuon ti daga; ta ni Jehova, adda pannakisuppiatna iti ilina, ket isu makisuppiatto iti Israel.

³ O ilic, ania aya ti inaramidco kenca? ket sadino ti nangbannogac kenca? Panecnecam ti maibusor caniac.

⁴ Ta inaonca iti daga ti Egipto, ket sinubbotca iti balay ti pannacaadipen; ket imbaonco iti sangoanam da Moises, Aaron, ken Miriam.

⁵ O ilic, lagipem no ania ti insicat ni Balac nga ari ti Moab, ken no ania ti insungbat kencuana, ni Balaam nga anac ni Beor; lagipem ti manipud Sittim agingga ti Gilgal, tapno maammoan dagiti nalinteg a gapuanan ni Jehova.

⁶ Ania ti itugotconto iti saclang ni Jehova, ket agrucnoyac iti saclang ti nangato a Dios? umayac coma aya iti sangoananna agraman datdaton a mapuuran, ken ururbon a vaca nga agtawen iti maysa?

⁷ Maay-ayonto aya ni Jehova cadagiti rinibu a carcarnero a lallaki, wenno iti sangapulo ribu a carcarayan ti lana? Itedconto aya ti inaunac nga anac gapu iti salungasingco, ti bunga ti bagic gapu iti basol ti cararuac?

⁸ Imparangna kenca, O tao, daydiay naimbag; ket ania aya ti iparebbeng ni Jehova kenca, no di laeng ti agaramid a sililinteg, ken iti kinamanangngaasi ken pannagna a sipapacumbaba iti Diosmo?

⁹ Ti timec ni Jehova agpuccaw iti ili, ket ti tao a masirib makitananto ti naganmo: denggenyo ti sarucod, ken daydiay nangdutoc kencuana.

¹⁰ Adda pay laeng aya gupgupit ti kinadakes iti balay ti nadangkes, ken nacurang a sucatan a macarimon?

¹¹ Nadalusacto aya no addaanac cadagiti dakes a titimbengan, ken iti supot dagiti mangallilaw a panimbeng?

¹² Ta dagiti nabacnang a tattao kencuana napnoda iti ranggas, ket dagiti agnaed idiay nagsaoda cadagiti ulbod, ket ti dilada mangallilaw cadagiti ngiwatda.

¹³ Gapuna a siac met sinugatca iti nasaem a sugat; inaramidca a walangwalang gapu cadagiti basbasolmo.

¹⁴ Mangancanto, ngem dicanto mapnec; ket ti kinakirang addanto iti tengngam; ket mangidulincanto, ngem dicanto macaurnong; ket ti maidulinmo yawatconto iti campilan.

¹⁵ Agmulacanto, ngem dicanto agapit; agibaddeccanto cadagiti olivo ngem saancanto nga agsapsapo iti lana, ken ti uvas ngem dicanto uminum iti arac.

¹⁶ Ta dagiti bilbilin ni Omri masalimetmetda, ket amin dagiti ar-aramid ti balay ni Acab, ket dacayo magnacayo cadagiti balbalacadda; tapno aramidenca a langalang, ket dagiti agnaed idiay sanamtic; ket awitenyonto ti pannacaibabain ti ilic.