Mikias 5 - Ti Biblia (1973)

Ti pannacayanac ni Cristo maipadto.

¹ Ita urnosem ti bagim met laeng cadagiti buybuyot, O anac a babai dagiti buybuyot; isu nanglacub ti maibusor cadatayo; cabilendanto iti pingping ti ocom ti Israel iti maysa a sarucod.

² Ngem sica, Belen Efrata, sica a bassitca cadagiti rinibribu ti Juda, kenca rumuarto ti maysa nga umay caniac nga agbalin nga agturay iti Israel; a dagiti iruruarna nanipudda idi ugma, nanipud iti kinaagnanayon.

³ Gapuna a yawatnanto ida, agingga iti pannawen daydiay nga agpasical macapasngay; calpasanna ti tidda cadagiti cacabsatna agawiddanto cadagiti annac ti Israel.

⁴ Ket isu tumacderto, ket taraonannanto ti pangenna iti pigsa ni Jehova, iti dayag ti nagan ni Jehova a Diosna: ket mataginayondanto: ta iti casta isu dackelto agingga cadagiti pungto ti daga.

⁵ Ket daytoy a lalaki isunto ti talnatayo. Intono ti Asirio umayto iti dagatayo, ken intono bumaddec cadagiti palaciotayo, ibangontayto a bumusor kencuana pito a pastor, ken walo a panguloen a lallaki.

⁶ Ket dadaelendanto ti daga ti Asiria iti campilan, ken ti daga ni Nimrod cadagiti pagsercanna: ket isu ruc-atannatayto iti Asirio, intono isu umay iti dagatayo, ken intono bumaddec iti sacup ti beddengtayo.

⁷ Ket ti tidda ni Jacob addanto iti tengnga dagiti adu nga il-ili cas linnaaw nga aggapu ken Jehova, cas cadagiti arbis iti rabaw ti root, a saanda nga urayen ti tao, ket di met aguray cadagiti annac dagiti tattao.

⁸ Ket ti tidda ni Jacob addanto cadagiti nasnacion, iti tengnga dagiti adu nga il-ili, cas maysa a leon iti tengnga dagiti an-animal iti bakir, cas maysa nga urbon a leon cadagiti pangen ti carnero: isu, a no lumasat, mangbaddec ken mangpisangpisang, ket awan ti siasinoman a mangruc-at.

⁹ Ti imam maitayag coma iti ngatoen dagiti cabusormo, ket amin dagiti cabusormo, madadaeldanto coma.

¹⁰ Ket maaramidto iti dayta nga aldaw, cuna ni Jehova, a dadaelecto dagiti cabayom iti tengngam, ken dadaelecto dagiti luganmo.

¹¹ Ket dadaelecto dagiti il-ili ti dagam, ket rebbaecto amin dagiti sarikedkedmo.

¹² Ket dadaelecto dagiti kinamanagsalamangca iti imam; ket awanton ti mammuyonmo:

¹³ Ket dadaelecto dagiti kinitikitam a ladladawan ken dagiti monmon iti tengngam; ket saanmonton a pagrucbaban ti aramid dagiti im-imam;

¹⁴ Ket parutecto dagiti Asheram iti tengngam; ket dadaelecto dagiti il-ilim.

¹⁵ Ket aramidecto ti pannagbales babaen ti unget ken pungtot cadagiti nacion a saan a nangipangag.