Mikias 4 - Ti Biblia (1973)

Dagiti maudi nga al-aldaw a natalna.

¹ Ngem cadagiti maud-udi nga al-aldaw maaramidto, a ti bantay ti balay ni Jehova maipasdecto iti toctoc dagiti banbantay, ket isu maitan-octo iti tapaw dagiti turturod; ket dagiti il-ili agayusdanto kencuana.

² Ket adu a nacion mapandanto a cunaenda, Umaycayo, ket umulitayo iti bantay ni Jehova, ken iti balay ti Dios ni Jacob; ket isuronatayto cadagiti dalanna, ket magnatayto cadagiti danana. Ta idiay Sion rumuarto ti linteg, ken ti sao ni Jehova nga aggapu iti Jerusalem;

³ Ket isu mangocomto iti tengnga dagiti adu nga il-ili, ket ikeddengnanto ti maipanggep cadagiti nabileg a nasnacion iti adayu: ket pitpitendanto dagiti campilanda a tadtadem ti arado, ken dagiti gayangda a comcompay a pagpucan; ti nacion saannanto nga ilayat ti campilan a maibusor iti sabali a nacion, ket didanto met sursuruenen ti gubat.

⁴ Ngem agtugawdanto tunggal maysa a tao iti siroc ti cayona nga uvas ken iti siroc ti cayona nga higos; ket awanto ti mangpabuteng cadacuada: ta ti ngiwat ni Jehova dagiti buybuyot sinaona.

⁵ Ta amin dagiti il-ili magnada tunggal maysa iti nagan ti diosna; ket magnatayto iti nagan ni Jehova a Diostayo iti agnanayon nga awan inggana.

⁶ Iti dayta nga aldaw, cuna ni Jehova, tiptiponecto dagidiay pilay, ken urnongecto dagidiay napagtalaw, ken dagidiay pinaglidayco;

⁷ Ket pagbalinecto daydi pilay a tidda, ken daydi naibelleng iti adayu maysa a nabileg a nacion; ket ni Jehova agturayto cadacuada idiay bantay Sion manipud ita agingga iti agnanayon.

⁸ Ket sica, O torre ti arban, turod ti anac a babai ti Sion, kenca umayto, wen, ti immuna a pagturayan umayto, ti pagarian ti anac a babai ti Jerusalem.

⁹ Ita apay nga agriawca iti natbag? Awan aya ti ari kenca, natay aya ti mammalacad, a dagiti ut-ut immay kenca a cas iti babai nga agpasical?

¹⁰ Agtuocca, ken agrigatca a mangipasngay, O anac a babai ti Sion, a cas babai nga agpasical; ta ita rumuarcanto iti ili, ket agnaedcanto iti away, ket dumtengcanto agingga met laeng iti Babilonia: idiay maispalcanto; idiay subbotennacanto ni Jehova iti ima dagiti cabusormo.

¹¹ Ket ita adu a nacion nagtitiponda a bumusor kenca, nga agcuna, Isu matulawan coma, ket ti matatayo makitana coma ti tarigagaytayo iti Sion.

¹² Ngem saanda nga ammo dagiti panpanunot ni Jehova, ket dida met maawatan ti balacadna; ta inurnongna ida cas cadagiti pinongo iti pagtaltagan.

¹³ Bumangonca, ket agtaltagca, O anac a babai ti Sion; ta aramidec ti saram a landoc, ket aramidec dagiti cucom a gambang; ket pisangpisangemto ti adu nga il-ili: ket idatonconto ti samsamda ken Jehova, ket ti sanicuada iti Apo ti amin a lubong.