Mikias 3 - Ti Biblia (1973)

Dagiti dakes a papadi, mammadto, ken agturturay maidarumda.

¹ Ket kinunac, Idawatco a dumngegcayo, dacayo pangpangulo ni Jacob, ken agtuturay iti balay ti Israel: saanyo aya a rebbeng nga ammoen ti kinajusticia?

² Dacayo a gumura iti imbag, ket ayatenyo ti dakes; nga agawenyo ti cudilda cadacuada, ken ti lasagda cadagiti tultulangda;

³ Canenyo met ti lasag ti umilic, ket lapgisenyo ti cudilda cadacuada, ket bungtolenyo dagiti tultulangda, ken reddekenyo ida, a cas maipaay iti banga, ken cas lasag iti uneg ti caldero.

⁴ Iti casta umawagdanto ken Jehova, ngem saannanto a sungbatan ida; wen, ilingednanto ti rupana cadacuada iti dayta a pannawen, a cas mayanatup iti panagaramidda iti dakes cadagiti gapuananda.

⁵ Castoy ti sinao ni Jehova maipapan cadagiti mammadto a pagbawingenda iti ilic; isuda a cumagatda cadagiti ngipenda, ken ipuccawda, Talna; ket iti daydiay a saan a mangpisuc cadagiti ngiwatda, mangisaganada pay iti gubat a maibusor kencuana:

⁶ Gapuna rabiinto cadacayo, nga iwanto to sirmatayo; ket nasipngetto cadacayo, a dicayto agipadles; ket ti init bumabanto iti rabaw dagiti mammadto, ket ti aldaw nangisitto iti ngatoda.

⁷ Ket dagiti mannacakita iti masacbayan maibabaindanto, ket dagiti mammadles mariribucdanto; wen, isuda amin abbongandanto dagiti bibigda; ta awan ti sumungbat ti Dios.

⁸ Ngem no maipapan caniac, napnoac iti pannacabalin babaen ti Espiritu ni Jehova, ken panangocom, ken bileg, a mangipalawag ken Jacob iti salungasingna, ken iti Israel iti basolna.

⁹ Denggenyo daytoy, dawatec cadacayo, pangpangulo iti balay ni Jacob, ken agturturay iti balay ti Israel, a cagurayo ti kinajusticia, ken pagkilloenyo ti amin a kinalinteg.

¹⁰ Ibangonda ti Sion iti dara, ken ti Jerusalem iti kinadakes.

¹¹ Dagiti pangulona mangocomda gapu iti gunguna, ket dagiti papadina mangisuroda gapu iti tangdan, ket dagiti mammadtona agipadlesda maipuon iti pirac; ket nupay casta agsanggirda ken Jehova, a cunada, Awan aya ni Jehova iti nagtengngaantayo? awan ti dakes nga umayto cadatayo.

¹² Gapuna, maipuon cadacayo ti Sion maaradonto a cas talon, ket ti Jerusalem agbalinto a bonbonton, ket ti bantay ti balay a cas cadagiti nangato a disso ti cabakiran.