Mikias 1 - Ti Biblia (1973)

Maicari a dusa ti Israel ken Juda gapu iti kinakil-loda ken kinasukirda.

¹ Ti sao ni Jehova a dimteng ken ni Mikias a Morasti cadagidi al-aldaw da Jotam, Acaz, ken Ezekias, nga ar-ari ti Juda, isu a nakitana a maipapan iti Samaria ken Jerusalem.

² Dumngegcayo, dacayo il-ili, dacayo amin; ipangagmo, O daga, ken amin ti naglas-ud kencuana: ket ni Apo Jehova coma ti sacsi a maibusor cadacayo, ti Apo manipud iti nasantoan a templona.

³ Ta, adtoy, ni Jehova agparang manipud iti yanna, ket bumabanto, ket agpayatto cadagiti nangato a disso ti daga.

⁴ Ket dagiti banbantay malunagdanto iti babaenna, ket dagiti lobong marengngatdanto, a cas iti allid iti sango ti apuy, cas dandanum a maibuyat iti maysa a derraas.

⁵ Ta ti salungasing ni Jacob isu ti puon amin daytoy, ken gapu cadagiti basbasol ti balay ti Israel. Ania ti salungasing ni Jacob? saan nga iti Samaria? ket ania dagiti nangato a disdisso ti Juda? saanda aya a ti Jerusalem?

⁶ Gapuna aramidecto ti Samaria a cas maysa a bonton iti talon, ken cas disdisso a pagmulaan cadagiti uvas; ket ibuyatconto dagiti batbatona iti lobong, ket pagparangecto dagiti pamuonna.

⁷ Ket amin dagiti kinitikitan a ladawan kencuana malasanglasangdanto, ket amin dagiti abangna mauramto iti apuy, ket amin dagiti didiosenna racrakecto; ta iti abang ti balangcantis inurnongna ida, ket iti abang ti balangcantis agsublidanto.

⁸ Daytoy ti gapuna nga agunnoyacto ken agdung-awacto; magmagnaac a sioucsub ken silamolamo; aramidecto ti panagdung-aw a cas cadagiti chacal, ken panagunnoy a cas cadagiti avestruz.

⁹ Ta dagiti sugsugatna saanda a maagasan; ta isu dimteng agingga met laeng iti Juda; isu dumanon agingga iti ruangan ti ilic, iti Jerusalem met laeng.

¹⁰ Dicayo ibaga idiay Gat, saancayo nga agsangit a pulos: idiay Beth-leafra gimmamerac iti tapuc.

¹¹ Agpucawca, O agnaed iti Safir, iti kinalamolamo ken bain: ti agnaed iti Saanan saan a rimmuar; ti panagdung-aw ti Beth-esel alaennanto cadacayo ti pagsadaganna.

¹² Ta ti agnaed ti Marot urayenna a sigagagar unay ti imbag, ta ti dakes bumaba manipud ken Jehova agingga iti ruangan ti Jerusalem.

¹³ Ipacom ti lugan iti napartac a cabayo, O agnaed iti Lakis: isu ti nangrugianan ti basol iti anac a babai ti Sion; ta dagiti salungasing ti Israel nasaracda kenca.

¹⁴ Gapuna sica ipaaymonto ti maysa a pacalaglagipan a sagut ken Mareset-gat: dagiti balbalay ni Aczib isudanto ti banag a mangallilaw cadagiti ar-ari ti Israel.

¹⁵ Yegconto pay laeng kenca, O agnaed iti Maresa, daydiay nga agtagicuanto kenca: ti dayag ti Israel dumtengto agingga met laeng iti Adullam.

¹⁶ Agcalvoca, ken agpukisca a maipuon cadagiti annac ti ragsacmo: palawaem ti calvom a cas iti aguila; ta pinanawandaca ket napanda iti pannacacayaw.