San Mateo 9 - Ti Biblia (1973)

Ti saan a macagunay a taga Capernaum.

¹ Ket simrec ni Jesus iti barangay, bimmal-lasiw ket simrec iti ilina.

² Ket adtoy, inyegda kencuana ti maysa a di macagunay a naidalit iti pagiddaan: ket idi a makita ni Jesus ti pammatida, kinunana idi saan a macagunay: Manginanamaca, anac; dagiti basbasolmo mapacawanda.

³ Ket adtoy, dadduma cadagiti escriba kinunada iti nakemda: Daytoy a tao agtabbaaw.

⁴ Ket idinto nga ammo ni Jesus dagiti panunutda, kinunana: Apay-apay agpanunutcay ti dakes cadagiti puspusoyo?

⁵ Ta. Ania ti nalaclaca, ti panagcuna: Dagiti basbasolmo mapacawanda, wenno ti panagcuna: Tumacderca ket magnaca?

⁶ Ngem tapno maammoanyo a ti Anac ti tao adda pannacabalinna ditoy daga a mamacawan cadagiti basbasol, (idin cunana iti saan a macagunay:) Bumangonca, alaem ta iddam, ket inca idiay balaymo.

⁷ Ket isu bimmangon ket napan iti balayna.

⁸ Ket dagiti adu a tao, idi nakitada daytoy, nagbutengda ket dinaydayawda ti Dios a nangted ti castoy a pannacabalin cadagiti tao.

Pannacaawis ni Mateo.

⁹ Ket idi pimmanaw ni Jesus sadiay, nakitana ti maysa a tao managan ti Mateo, nga adda a situtugaw iti pagsingiran ti buis, ket kunana kencuana: Surutennac. Ket timmacder ket simmurot kencuana.

¹⁰ Ket napasamac nga idi adda a situtugaw iti panganan idiay balay, adtoy dagiti adu nga agsingsingir ti buis ken managbasol, immayda, ket nakisangoda ken Jesus agraman cadagiti adalanna.

¹¹ Ket dagiti Fariseo, idi nakitada daytoy, kinunada cadagiti adalanna: Apayapay makipangan ti manursuro cadacayo cadagiti agsingsingir ti buis ken cadagiti managbasol?

¹² Ngem idi nangngegna daytoy, kinunana: Dagiti nacaradcad awan ti pacasapulanda iti mangngagas, no di dagiti masakit.

¹³ Ngem incayo, ngarud, ket adalenyo no ania ti cayatna a saoen daytoy Asi ti calicagumac ket saan a daton; ta saanac nga immay nga agayab cadagiti nalinteg, no di ket cadagiti managbasol.

Ti panagayunar.

¹⁴ Idin immasideg kencuana dagidi adalan ni Juan a cuncunada: Apayapay a dacami ken dagiti Fariseo agayunarcami a masansan, ket dagiti adalam dida agayunar?

¹⁵ Ket ni Jesus kinunana cadacuada: Mabalin aya nga dagiti makiboda agpanesda no adda pay laeng cadacuada ti novio? Ngem umaydanto dagiti aldaw, a ti novio maiccatto cadacuada, ket iti casta agayunardanton.

¹⁶ Ket awan ti tao a mangitacup ti lupot a dipay napes-acan iti pagan-anay a daan; ta iti casta intono cumsenen ti naitacup, rumsua a lumawlawa ti pigisna.

¹⁷ Ket dida met icabil ti baro nga arac cadagiti supot a lalat a daan; ta no casta, dagiti lalat bumtacda ket ti arac maibel-leng, ket madadael dagiti lalat; ngem icabilda ti arac a baro cadagiti lalat a baro, ket mataginayonda a dua.

Ti babai a masakit iti panagbulos ti dara; ti anac a babai ni Jairo.

¹⁸ Idi sasaoenna dagitoy cadacuada, adtoy immay ti maysa a panguloen ket nagrucbab kencuana a cuncunana: Tay anacco a babai capatpatayna; ngem umayca cadi ket ipataymo ti imam kencuana, ket agbiagto.

¹⁹ Ket timmacder ni Jesus, ket simmurot kencuana, agraman dagiti adalanna.

²⁰ Ket adtoy ti maysa a babai a masakit iti panagbulos ti dara iti sangapulo ket dua a tawenen, immasideg iti licudanna ket sinagidna ti pingir di pagan-anayna;

²¹ Ta kinunana iti nakemna: No mabalinco coma a sagiden uray laeng ti pagan-anayna, mapaimbagacto.

²² Ket ni Jesus timmaliaw, a kimmita kencuana ket kinunana: Manginanamaca, anac; ti pammatim pina-imbagnaca. Ket di babai napaimbag nanipud idi nga horas.

²³ Ket idi dimteng ni Jesus iti balay daydi panguloen, nakitana dagiti agtoctocar cadagiti flauta, ken dagiti tao nga agarariwawa,

²⁴ Kinunana: Wayaanyo ti pagnaan: ta ti balasang saan a natay, ngem matmaturog. Ngem kinatawaanda nga lalaisen.

²⁵ Ket idi naparuaren dagiti tattao simrec ni Jesus ket iniggamanna ti ima di balasang; ket timmacder.

²⁶ Ket daytoy nagracurac iti isu-amin daydiay a daga.

Pannacaagas dagiti dua a bulsec ken maysa nga umel.

²⁷ Ket idi pimmanaw ni Jesus sadiay, simmurotda kencuana dagiti dua a bulsec nga agpucpuccawda a cuncunada: Caasiannacami, O! Anac ni David.

²⁸ Ket idi nacastrec iti maysa a balay, immasidegda kencuana dagidi bulsec; ket ni Jesus cunana cadacuada: Patienyo a mabalinco nga aramiden daytoy? Cunada kencuana: Wen, Apo,

²⁹ Idin sinagidna dagiti matada, a cuncunana: Cas iti pammatiyo, maaramid coma cadacayo.

³⁰ Ket dagiti matada nalucatanda. Ket ni Jesus imbilinna cadacuada iti nairut, a cunana: Kitaenyo ta awan coma ti macaammo.

³¹ Ngem rimmuarda ket inwarada ti damagna iti isu-amin daydiay a daga.

³² Ket idi madamada a rummuar, adtoy, inyegda kencuana ti maysa a tao nga umel a nagun-gan ti sairo.

³³ Ket idi a naparuaren ti sairo, di umel nagsao; ket dagiti tattao nagsiddaawda a cuncunada: Uray caano saan pay a nakita ti castoy ditoy Israel.

³⁴ Ngem dagidi Fariseo kinunada: Gapu ti pannacabalin ti pangulo dagiti sairo, paruarenna dagiti sairo.

Ti anien ken dagiti agani.

³⁵ Ket ni Jesus linawlawna dagiti amin nga il-ili ken purpuroc a nangisursuro cadagiti sinagogada, ken nangicascasaba ti naimbag a damag ti pagarian, ket pinapaimbagna amin a sakit ken amin a kita ti anannayen.

³⁶ Ket idi nakitana dagiti adu unay a tattao, simnec ti asina cadacuada; gapu ta nalidayda ken nawarawarada a casda la carcarnero nga awan ti pastorda.

³⁷ Idin cunana cadagiti adalanna: Pudno a ti anien adu; ngem bassitda dagiti agani.

³⁸ Dawatenyo ngarud iti Apo ti anien, tapno mangibaon coma cadagiti agani iti paganianna.