San Mateo 8 - Ti Biblia (1973)

Pannacaagas ti maysa nga agcucutel.

¹ Ket idi a simmalog iti bantay, simmuratda kencuana dagiti adu a tattao.

² Ket adtoy, ti maysa nga agcucutel immay ket nagrucbab kencuana a cuncunana: Apo, no pagayatam coma, mabalinnac a dalusan.

³ Ket inunnatna ti imana ket sinagidna a kinunana kencuana, cayatco, madalusanca coma. Ket naigiddato a daydi cucutelna napunas.

⁴ Ket ni Jesus kinununa kencuana: Kitaem, ta dica ibaga iti uray siasino; ngem inca, agparangca iti sacerdote ket idatonmo ti sagut nga imbilin ni Moises tapno pacakitaanda.

Ti Centurion a taga Capernaum.

⁵ Ket idi simrec idiay Capernaum, immay kencuana ti maysa a Centurion a nagpacpacaasi kencuana,

⁶ A cuncunana: Apo, ti ubingco adda a naidalit idiay balay a di macagunay, ket matoocan unay.

⁷ Ket ni Jesus kinunana kencuana: Umayacto ket paimbagec.

⁸ Ket simmungbat di Centurion, ket kinunana: Apo, saanac a maicari nga umawat kenca iti uneg ti balayco; ngem saoem laeng ti sao ket ti ubingco umimbagto.

⁹ Ta siac pay idinto a taoac laeng iti babaen ti turay addaanac solsoldado iti babaen ti turayco: ket cunac itoy maysa: Inca, ket mapan, ket iti sabali: Umayca, ket umay: ket iti ubingco: Aramidem daytoy, ket aramidenna.

¹⁰ Ket idi a ni Jesus, nangngegna daytoy nagsiddaaw, ket kinunana cadagiti sumursurot kencuana: Pudno cunac cadacayo, nga uray iti Israel diac nacasarac ti castoy a cadackel ti pammati.

¹¹ Ket cunac cadacayo nga adu dagiti umayto nga aggapu iti daya ken laud, ket makicatugawdanto ken Abraham ken Isaac ken ni Jacob iti pagarian ti langit.

¹² Ngem dagiti anac ti pagarian maibel-lengdanto iti sipnget iti ruar: idiay addanto panagdung-aw ken panagngaretnget dagiti ngipen.

¹³ Ket ni Jesus kinunana idi Centurion: Incan, ket cas iti panamatim maaramid coma kenca. Ket daydi ubing naimbagan idi met la nga horas.

Ti catugangan a babai ni Pedro.

¹⁴ Ket idi immay ni Jesus iti balay ni Pedro, nakitana ni catuganganna a babai nga aggorigor a naidalit iti pagidaan.

¹⁵ Ket sinagidna ti ima daydi babai, ket ti gorigor pimmanaw kencuana: ket isu bimmangon, ket nagservi kencuana.

¹⁶ Ket idi malemen, inyegda kencuana dagiti adu a nagun-gan dagiti sairo; ket pinaruarna dagiti sairo iti sao, ket pinaimbagna dagiti amin nga masacsakit idi.

¹⁷ Tapno matungpal ti sinao ni mammadto nga Isaias, a cuncunana: Isu met laeng innalana dagiti sacsakittayo, ket inawitna dagiti anannayentayo.

No casano ti isusurot ket Jesus.

¹⁸ Idi a ni Jesus nakitana dagidi adu a tattao iti licmutna imbilinna nga umalisda iti sabali a bangir.

¹⁹ Ket immasideg ti maysa nga escriba, ket kinunana, kencuana: Mannursuro, surutencanto uray sadino ti papanam.

²⁰ Ket ni Jesus cunana kencuana: Dagiti musang addaanda cadagiti rucrukib, ket dagiti tumatayab iti tangatang addaanda cadagiti umumoc; ngem ti Anac ti tao awanan iti pangisaadanna ti ulona.

²¹ Ket ti sabali cadagiti adalanna kinunana kencuana: Apo, palubusannac ta innac pay coma iponpon ni amac.

²² Ngem ni Jesus cunana kencuana: Surutennac; bay-am a dagiti natay itanemda dagiti minatayda.

Ni Jesus pagtalnaenna ti baguio.

²³ Ket isu idi a simrec iti maysa a barangay, dagiti adalanna simmurotda kencuana.

²⁴ Ket adtoy napasamac iti baybay ti dackel a baguio, iti casta a ti barangay masabsabuagan cadagiti dalluyon; ngem isu matmaturog idi.

²⁵ Ket dagidi adalanna, immasidegda kencuana ket riniingda a cuncunada: Apo, isalacannacami, mapucawtayon!

²⁶ Ket ni Jesus cunana cadacuada: Apayapay agbutengcayo, O dacayo a bassitan pammati? Idin, bimmangon ket inatipana dagidi angin ken di baybay, ket naglinac unay.

²⁷ Ket dagiti tattao nagsiddaawda a cuncunada: Ania a cababalin ti tao daytoy, ta uray dagiti angin ken ti baybay agtulnogda kencuana?

Dagiti Gadareno a nagun-gan ti sairo.

²⁸ Ket idi dimteng iti sabali nga igid, iti daga dagiti Gadareno, immayda simmabet kencuana dagiti dua a nagun-gan dagiti sairo a rimmuarda idi cadagiti tanem, a naglausan ti uyongda nga awan ti macaitured a lumabas idi a dalan.

²⁹ Ket adtoy, nagickisda a cuncunada: Sica Anac ti Dios. Ania tibibiangmi kenca? Immayca ditoy tapno parigatennacami iti dina pay tiempo?

³⁰ Ket adda idi iti adayu cadacuada ti maysa nga arban ti adu a babuy nga agar-arab.

³¹ Ket dagiti sairo nagdawatda kencuana, a cuncunada: No pagtalawennacami, ibaonnacami idiay arban ti babuy.

³² Ket kinunana cadacuada: Incayo. Ket rimmuarda, ket napanda iti arban ti babuy: ket adtoy, amin ti arban ti babuy nagtappuacda a sidadarasudos iti maysa a teppang iti baybay, ket natayda cadagiti danum.

³³ Ket dagiti agtaraken cadagiti babuy, timmarayda; ket idi napanda iti ciudad, sinaritada amin, ken ti napasamac cadagiti nagun-gan dagiti sairo.

³⁴ Ket adtoy, amin nga umili rimmuar a simmabet ken Jesus; ket idi nakitada, nagdawatda kencuana a pumanaw coma cadagiti beddengda.