San Mateo 7 - Ti Biblia (1973)

Ti cascasaba idiay bantay (canayon): Ti panagipato a di panunuten; saan a maited dagiti nasantoan a banag cadagiti aso: ti panagtalinaed iti panagcararag: ti ruangan a nailet; dagiti saan a pudno a mammadto: denggen ken aramiden.

¹ Dicay agipato tapno dicayo maipato.

² Ta iti panangipato nga aramidenyo, casta met ti pannacaipatoyonto ket ti rucod a pangrucodyo, isu met ti pacarucodanyonto.

³ Ket. Apayapay matmatam ti puling nga adda iti mata ni cabsatmo, ket dica mabigbig ti pasanggir nga adda iti matam met laeng?

⁴ Wenno. Casano ti panagcunamto ken cabsatmo: Agurayca, iccatec ita matam ti puling, ket adtoy, ti maysa a pasanggir iti matam?

⁵ Managinsisingpet! umuna pay nga iccatem ti pasanggir iti matam, ket iti casta macakitacanto a nalawag iti panangiccatmo ti puling iti mata ni cabsatmo.

⁶ Saanyo nga ited ti nasantoan cadagiti aso, ket saanyo met nga idisso dagiti perlasyo iti sangoanan dagiti babuy; di la ket ta payatpayatenda ida cadagiti sacsacada, ket sangoen dacayo a gusabgusaban.

⁷ Agdawatcayo, ket maiccancayto; agsapulcayo ket macasaraccayto: umawagcayo ket mailucatancayto.

⁸ Ta ti siasinoman nga agdawat umawat; ket ti agsapul macasarac; ket ti umawag mailuctanto.

⁹ Asino ti tao nga adda cadacayo, a no ti anacna dumawatto coma ti tinapay, isu iccannanto ti maysa a bato?

¹⁰ Wenno no numawatto coma ti maysa nga ican, isu ti iccannanto ti maysa nga uleg?

¹¹ Ngarud no dacayo, idinto a dakescayo, ammoyo ti mangted cadagiti nasayat a sagsagut cadagiti annacyo, Saan aya a nangnangrona pay ni Amayo nga adda sadi langit, a mangtedto cadagiti nasayaat a banbanag cadagiti agdawat kencuana?

¹² Gapuna, amin dagiti banbanag a cayatyonto nga dagiti tattao aramidenda coma cadacayo, casta met ti aramidenyo cadacuada; ta daytoy isu ti linteg ken ti sinao dagiti mammadto.

¹³ Sumreccayo iti ruangan a nailet; ta acaba ti ruangan, ken nalawa ti dalan a mangiturong iti pacadadaelan, ket adu dagiti sumrec kencuana.

¹⁴ Ta nailet ti ruangan ken akikid ti dalan a mangiturong iti biag ket nataccon dagiti macasarac kencuana.

¹⁵ Agaluadcayo cadagiti naulbod a mammadto nga umayda cadacayo a nacacawes a cas la carnero, ngem iti unegda loboda a narawet.

¹⁶ Mailasinyonto ida gapu cadagiti bungbungada. Adda aya uvas a maala cadagiti calcalunay, wenno higos cadagiti cascasumba?

¹⁷ Iti casta, tunggal cayo a nasayaat, mangted bunbunga a nasayaat, ngem ti cayo a dakes, mangted bungbunga a dakes.

¹⁸ Ti nasayaat a cayo saanna a mabalin ti mangted bungbunga a dakes, casta met ti cayo a dakes di met macaited ti bungbunga a nasayaat.

¹⁹ Tunggal cayo a saan a mangted ti bunga a nasayaat, mapucan ket maisungrod iti apuy.

²⁰ Iti casta mailasinyonto ida gapu cadagiti bungbungada.

²¹ Saan a ti tunggal maysa nga agcuna caniac; Apo, Apo, sumrecto iti pagarian ti langit; no di ket ti mangaramid ti pagayatan ni Amac nga adda sadi langit.

²² Adunto dagiti agcuna caniac iti daydiay nga aldaw: Apo, Apo, saancami aya a nagipadto iti naganmo, ket iti naganmo pinaruarmi dagiti sairo ket iti naganmo nagaramidcami cadagiti adu a datdatlag?

²³ Ket siac ipalgacconto cadacuada: uray caano dicayo naam-ammo! umadayucayo caniac, dacayo nga agararamid ti dakes!

²⁴ Siasinoman ngarud a dumngeg cadagitoy a saoc ket aramidenna ida, maipadisto iti maysa a tao a manakem a binangonna ti balayna iti rabaw ti bato:

²⁵ Ket nagtinnag ti tudo, ket immay dagiti laylayus ket nagangin, ket nagdissooranda daydi a balay; ket saan a natuang, ta nabangon iti rabaw ti bato.

²⁶ Ket amin a macangngeg cadagitoy a saoc ket saanna ida nga aramiden, maipadisto iti maysa a tao a maag, a binangonna ti balayna iti rabaw ti darat.

²⁷ Ket nagtinnag ti tudo, ket immay dagiti laylayus ket nagangin, ket nagdissooranda daydi a balay; ket natuang ket dackel ti pannacarbana.

²⁸ Ket idi a ni Jesus nalpasnan dagitoy a sao, dagiti adu a tao nagsiddaawda iti isursurona.

²⁹ Ta insursurona ida a cas la adda pannacabalinna, ket saan a cas cadagiti escriba.