San Mateo 6 - Ti Biblia (1973)

Ti cascasaba idiay bantay (canayon)—Ti pananglimos, ti panagcararag, ti panagayunar.

¹ Agannadcayo ta saancayo nga agaramid iti kinalintegyo iti sangoanan dagiti tao, tapno pagpasindayawyo: ta no saan, awan ti gungunayo ken Amayo nga adda sadi langit.

² Ngarud intono manglimosca, dicanto pagunien ti tangguyob iti sangoanam, a cas iti aramiden dagiti aginsisingpet cadagiti sinagoga ken cadagiti calcalsada, tapno madayawda cadagiti tattao. Pudno cunac cadacayo: Inawatdan ti gungunada.

³ Ngem sica intono manglimosca, saan coma a maammoan ti macatigidmo ti aramiden ti macanawanmo;

⁴ Tapno ti limosmo nalimed: ket ni Amam a macakita iti nalimed, gungunaannacanto.

⁵ Ket intono agcararagcayo, saancay a cas cadagiti managinsisingpet; ta isuda ayatenda ti agcararag cadagiti sinagoga, ken cadagiti lanlansangan dagiti daldalan a sitatacder, tapno makita ida dagiti tattao. Pudno cunac cadacayo: Inawatda ti gungunadan.

⁶ Ngem sica, inton agcararagca, sumrecca iti siledmo, ket inton nairikepen ti ruangan, agcararagca ken Amam nga adda iti nalimed: ket ni Amam a macakita iti nalimed gungunaannacanto.

⁷ Ngem iti panagcararagyo dicay aramaten dagiti awan capapayanna a panangulit-ulit, a cas ti aramiden dagiti Gentil; a panunutenda a maipangagdanto, gapu cadagiti adu a sasaoda.

⁸ Dicay ngarud tuladen ida; ta ni Amayo ammona no aniada dagiti masapulyo no dicay pay dawaten kencuana.

⁹ Dacayo, ngarud, agcararagcayo a castoy: Amami, nga addaca sadi langit, madaydayaw coma ti Naganmo.

¹⁰ Umay coma ti pagariam. Maaramid coma ti pagayatam cas sadi langit casta met ditoy daga.

¹¹ Itedmo cadacam ita ti taraonmi iti inaldaw.

¹² Ket pacawanennacami cadagiti ut-utangmi, a cas met panamacawanmi cadagiti nacautang cadacami.

¹³ Ket dinacam iyeg iti pannacasulisog, no di ket isalacannacami iti dakes.

¹⁴ Ta no pacawanenyo dagiti tao cadagiti pammaldaangda, pacawanennacayto met ni Amayo a nailangitan.

¹⁵ Ngem no saanyo a pacawanen dagiti tattao cadagiti pammaldaangda, ni Amayo dinacayto met pacawanen cadagiti pammaldaangyo.

¹⁶ Ket intono agayunarcayo, saancay a cas la cadagiti managinsisingpet a naliday ta baliwanda ti rupada, tapno agparangda a nagayunar cadagiti tattao. Pudno cunac cadacayo: Inawatda ti gungunada.

¹⁷ Ngem sica, inton agayunarca, lanaam ti ulom ket agdiramosca;

¹⁸ Tapno di maiparang cadagiti tattao nga agayunarca, no di ken Amam nga adda iti nalimed: ket ni Amam, a macakita iti nalimed, gungunaannacanto.

Ti cascasaba idiay bantay (canayon): Ti gupit idiay langit ti mata a nadalus: dagiti dua nga Apo; ti agawa iti panagbiag.

¹⁹ Saancayo nga agurnong cadagiti gupgupit nga agpaay cadacayo ditoy daga, isu a ti sanga ken ti lati dadaelenda ida, ken isu a dagiti mannanacaw calienda ket tacawenda;

²⁰ Ngem agurnongcayo cadagiti gupgupit sadi langit, isu a ti sanga ken ti lati dida dadaelen ken isu a dagiti mannanacaw dida calien ken tacawen:

²¹ Ta no adino ti yan ti gupityo, addanto met idiay ti pusoyo.

²² Ti pagsilawan ti bagi isu ti mata: gapuna, no ti matam nadalusto, amin a bagim nalawagto.

²³ Ngem no ti matam dakes, amin a bagim nasipngetto: no ti silaw ngarud nga adda kenca nacudrep, Nagdackelan ket ti sipngeten!

²⁴ Awan ti tao a macabalin nga agservi iti dua nga appo; ta guraennanto ti maysa ket ayatennanto ti sabali, wenno sumurotto iti maysa ket umsienna ti sabali: dicay mabalin ti agservi iti Dios ken iti kinabacnang.

²⁵ Gapuna cunac cadacayo: Dicay naagawa iti maipaay iti biagyo, no ania ti canenyonto wenno ania ti inumenyonto; ket uray ti bagiyo, no ania ti icawesyonto: Saan aya a nangnangrona ti biag ngem iti pagtaraon, ken ti bagi ngem iti cawes?

²⁶ Imutectecanyo dagiti tumatayab ti langit, a dida agmula, dida agani ket dida agurnong cadagiti camcamalig: ket ni Amayo a nailangitan taraonanna ida: Saancayo aya a napatpateg unay ngem isuda?

²⁷ Ngem. Asino cadacayo ti macabalin, a gapu iti panagagawana a mabalinna a nayonan ti sangcasico ti rucod ti catayagna?

²⁸ Ket ti maipapan iti pagan-anay. Apayapay naagawacayo? Usigenyo dagiti lirlirio iti talon, no casano ti panagdackelda: saanda nga agaramid ket dida met mambi;

²⁹ Ngem cunac cadacayo, nga uray pay ni Salomon agraman ti isu-amin a kinadayagna, saan a nacawesan a cas iti maysa cadacuada.

³⁰ Ket no ti Dios casta ti panangawesna iti root cadagiti cataltalonan nga ita agbiag, ket inton bigat maisungrod iti dalican. Saan aya a nangnangrona a dacayo ti cawesannanto, O dacayo a bassitan pammati?

³¹ Dicay ngarud agagawa a cuncunayo: Ania ti canenminto, wenno ania ti inumenminto, wenno ania ti pagpagan-anayminto?

³² Ta dagiti Gentil ipangpangronada a sapulen amin dagitoy a banbanag a ni Amayo a nailangitan ammona ti pannacasapulyo amin cadagitoy.

³³ Ngem birukenyo nga umuna ti pagarian ti Dios ken ti kinalintegna, ket isu-amin dagitoy a banbanag mainayondanto cadacayo.

³⁴ Saancayo ngarud nga agagawa iti maipay iti aldaw a sumaganad ta ti aldaw a sumaganad agawaannanto ti maipaay kencuana: Umdas ti dakes nga adda iti tunggal aldaw.