San Mateo 5 - Ti Biblia (1973)

Ti cascasaba iti bantay: dagiti naimbag a gasat.

¹ Ket idi nakitana dagiti adu a tao, immuli iti bantay; ket idi nacatugaw immay kencuana dagiti adalanna.

² Ket nangrugi a nagsao nga insurona ida, a cuncunana:

³ Nagasat dagiti napanglaw iti pakinakemda; ta cucuada ti pagarian ti langit.

⁴ Nagasat dagiti agladingit; ta maliuliwadanto.

⁵ Nagasat dagiti naemma; ta tawidendanto ti daga.

⁶ Nagasat dagiti mabisin ken mawaw iti kinalinteg; ta mapnecdanto.

⁷ Nagasat dagiti manangngaasi; ta lacamendanto ti asi.

⁸ Nagasat dagiti nadalus ti pusoda; ta makitadanto ti Dios.

⁹ Nagasat dagiti mamagcacappia; ta managandanto anac ti Dios.

¹⁰ Nagasat dagiti maidadanes a maipoon iti kinalinteg; ta cucuada ti pagarian ti langit.

¹¹ Nagasatcayo intono lalaisendacayo ket idadanesdacayo, ket pagsasaoandacayo ti amin a kita ti dakes gapu caniac, nga agulbodda.

¹² Agragsaccayo ken agrag-ocayo la unay; ta ti gonggonayo dackel sadi langit: ta casta met ti panangidadanesda cadagidi mammadto a nagbiag nga immununa ngem dacayo.

Ti cascasaba idiay bantay (canayon): Dagiti adalan isuda ti asin ti daga ken ti silaw ti lubong.

¹³ Dacayo ti asin ti daga; ngem no ti asin timmamnayen. Anianto ti pangasin kencuana? Awanen ti capapaayanna, no di maibel-leng iti ruar ket baddekenen dagiti tao.

¹⁴ Dacayo ti silaw ti lobong: ti maysa nga ili a naisaad iti rabaw ti maysa a turod, saan a mabalin nga ilemmeng.

¹⁵ Ket saan met a gangatan dagiti tao ti maysa a silaw ket sa icabil iti siroc ti maysa a salop, no di ket iti pagsilawan, ket lawaganna dagiti isu-amin nga adda iti balay.

¹⁶ Casta coma ti panaglawag ti silawyo iti sangoanan dagiti tao; tapno makitada dagiti naimbag nga aramidyo, ket dayawenda coma ni Amayo nga adda sadi langit.

Ti cascasaba idiay bantay (canayon): Ti pannacatungpal ti linteg ken dagiti sinao dagiti mammadto.

¹⁷ Dicay pagarupen nga immayac a mangdadael iti linteg wenno cadagiti mammadto: saanac nga immay a mangdadael, no di ket mangtungpal.

¹⁸ Ta ti kinapudnona cunac cadacayo, nga aginga ti mapucaw ti langit ken daga, uray la coma no maysa a jota wenno tulnec, dinto mapucaw iti linteg, aginga ti isu-amin matungpalda.

¹⁹ Gapuna uray siasino a mangsalungasingto iti maysa cadagitoy bilin a cababassitan, ken mangisuro ti casta cadagiti tattao, managanto ti bassit unay idiay pagarian ti langit; ngem uray siasino nga mangaramid ken mangisuronto cadacuada, isu managanto ti dackel iti pagarian ti langit.

²⁰ Ta siac cunac cadacayo a no ti kinalintegyo saanto a dacdackel ngem ti kinalinteg dagiti escriba ken Fariseo, ni caanoman dicayto sumrec iti pagarian ti langit.

²¹ Nangngegyo a naisao cadagiti immununa: Dica mamapatay; ket siasinoman a mamapatayto, agpeggadto iti pannacaocom;

²² Ngem cunac cadacayo, nga uray siasino a gumura iti cabsatna, agpeggadto iti pannacaocom; ket uray siasino nga agcunanto iti cabsatna; Ong-ong, agpeggadto iti pangocoman; ket uray siasino nga agcunanto kencuana: Awan nakemmo, agpeggadto iti infierno nga apuy.

²³ Ngarud no agidatdatagca ti datonmo iti altar, ket idiay malagipmo a ni cabsatmo adda aniaman kencuana a maibusor kenca,

²⁴ Panawam sadiay ti datonmo iti sangoanan ti altar, ket inca makicappia nga umuna pay ken cabsatmo, ket calpasanna umayca ket igayatmon ti datonmo.

²⁵ Makicappiaca iti madaras iti caringgormo, no addaca pay laeng a maicuyog kencuana iti dalan; di la ket ta maaramid a ti cabusormo iyawatnaca iti ocom, ket ti ocom iyawatnaca iti alcaide, ket maipisocca iti pagbaludan.

²⁶ Pudno cunac kenca, a dicanto rumuar sadiay, aginga ti mabayadam ti camaudianan a maravilis.

²⁷ Nangngegyo a naisao: Dica makiabig iti saanmo nga asawa.

²⁸ Ngem siac cunac cadacayo, nga uray siasino a mangmatmat iti maysa a babai tapno gartemanna, nakiabigen kencuana iti pusona.

²⁹ Ket, no ta matam a makincanawan isu ti mangted kenca ti pacaitibcolan, isu suatem, ket ibel-lengmo: ta nasaysayaat kenca a mapucaw ti maysa cadagiti camcamengmo, ngem ti isu-amin a bagim maibel-leng iti infierno.

³⁰ Ket no ta imam a makincanawan isu ti pacaitibcolam, isu ti putdem ket ibel-lengmo: ta naimimbag kenca a mapucaw ti maysa cadagiti camcamengmo, a saan ket a ti isu-amin a bagim mapan iti infierno.

³¹ Casta met a naisao: uray siasinoman a mamagtalaw iti asawana a babai, itedna kencuana ti surat ti pinagsina.

³² Ngem siac cunac cadacayo, a ti mamagtalaw iti asawana a babai, nga saan met a maipoon iti pannakiabig, aramidenna a mannakiabig a babai; ket siasinoman a mangasawanto iti napagtalaw a babai, macabasol iti pannakiabig.

³³ Nangngegyo met a naisao cadagiti immun-una: Dica agsapata iti ulbod; no di ket tungpalemto dagiti sapatam iti Apo.

³⁴ Ngem siac cunac cadacayo: dicay agsapata a pulos, uray gapu iti langit, ta isu ti naarian a tugaw ti Dios;

³⁵ Uray gapu iti daga, ta isu pagbatayan dagiti sacsacana; uray gapu iti Jerusalem, ta isu ti ili ti dackel nga Ari.

³⁶ Uray gapu iti ulom dicanto agsapata, ta dica macaaramid iti uray maymaysa a booc a puraw man wenno nangisit.

³⁷ Castoy ngarud ti panagsaoyo: Wen, wen; Saan, saan; ta ti suroc dagitoy, nagtaud iti dakes.

³⁸ Nangngegyo a naisao: Mata supapacan iti mata, ket ngipen, ti ngipen.

³⁹ Ngem siac cunac cadacayo: Dicay sarangten ti dakes; no di ket ti uray siasino a tumungpa iti pingpingmo a macanawan, iparangmo pay kencuana ti bangir.

⁴⁰ Ket no adda agpanggep a mangbangon ti ringgor kenca ket alaenna ti pagan-anaymo, bay-am nga alaenna pay ti cagaymo.

⁴¹ Ket siasinoman a mangpilit kenca a mapan iti maysa a milla, cumuyogca kencuana iti dua.

⁴² Iccam ti agdawat kenca; ket ti agtarigagay nga bumulod kenca, isu ti dica tal-licudan.

⁴³ Nangngegyo a naisao: Ayatem ti caarrobam ket guraem ti cabusormo.

⁴⁴ Ngem siac cunac cadacayo: Ayatenyo dagiti cabusoryo, ket icarcararaganyo dagiti mangidadanes cadacayo:

⁴⁵ Tapno annacnacayo ni Amayo nga adda sadi langit, ta paruarenna ti initna cadagiti dakes ken cadagiti naimbag ket pagtudoenna cadagiti nalinteg ken nakil-lo.

⁴⁶ Ta no ayatenyo dagiti agayat cadacayo. Ania ti magungunayo? Saan a casta aya ti aramiden met dagiti agsingsingir ti buis?

⁴⁷ Ket no dagiti cacabsatyo laeng ti cablaawanyo. Ania ti nacaiyadaddaan ti aramidyo ngem cadagiti dadduma? Saan a casta aya ti aramiden met dagiti Gentil?

⁴⁸ Agimbagcayo ngarud, nga awan pagcuranganna, a cas ken Amayo a nailangitan nga awan pagcuranganna.