San Mateo 4 - Ti Biblia (1973)

Ti pannacasairo ni Jesus.

¹ Idin ni Jesus naipan iti Espiritu idiay let-ang, tapno sulisugen ti diablo.

² Ket idi a nagayunar iti uppat a pulo nga aldaw ken uppat a pulo a rabii, calpasanna nagbisin.

³ Ket immay Kencuana ti mannulisog ket kinunana kencuana: No sica ti Anac ti Dios, ibilinmo a dagitoy bato agbalinda a tinapay.

⁴ Ngem Isu, simmungbat, ket kinunana: Adda a naisurat. Saan laeng a ti tinapay ti pagbiagto ti tao, no di ket ti isu-amin a sao a rummuar iti ngiwat ti Dios.

⁵ Idin daydi diablo impanna iti nasantoan a ciudad, ket insaadna iti rabaw ti cangatoan ti Templo.

⁶ Ket kinunana kencuana: No sica ti Anac ti Dios, tumappuacca manipud ditoy aginga iti baba; ta adda a naisurat: Isu ibilinnanto cadagiti angelna ti maipapan kenca, ket sacruyendacanto cadagiti imimada, amangan la ket ta maitibcol ta sacam iti bato.

⁷ Ni Jesus kinunana kencuana: Adda met a naisurat, Dicanto sulisugen ti Apo a Diosmo.

⁸ Di diablo impanna manen iti maysa a bantay a natayag unay, ket impakitana kencuana dagiti isu-amin a pagpagarian ti lubong ken ti dayagda.

⁹ Ket kinunana kencuana: Amin dagitoy itdecto kenca no agrucbabca nga agdayaw caniac,

¹⁰ Idin ni Jesus kinunana kencuana: Pumanawca, Satanas: ta adda a naisurat: Agdaydayawca iti Apo a Diosmo ket isu ti pagserviamto laeng.

¹¹ Idin di diablo pinanawannan; ket adtoy, dagiti angel dimtengda ket nagservida kencuana.

Ni Jesus idiay Galilea; dagiti immun-una nga adalan.

¹² Ngem idi nangngeg ni Jesus a ni Juan adda a nabalud, nagsubli idiay Galilea;

¹³ Ket pinanawanna ti Nazaret, dimteng ken nagnaed idiay Capernaum, nga adda iti igid ti baybay, cadagiti nagbeddengan ti Zabulon ken ti Neftaili,

¹⁴ Tapno matungpal ti sinao ni mammadto nga Isaias, a cuncunana;

¹⁵ Ti daga ti Zabulon, ken ti daga ti Neftali, Iti dinna ti baybay, iti labes ti Jordan, Galilea dagiti Gentil;

¹⁶ Dagiti umili a nagtugaw cadagiti sipnget, Nacakitada ti dackel a lawag; Ket dagiti nagtugaw iti disso ken linong ni patay, Ti silaw linawaganna ida.

¹⁷ Nanipud idin rinugian ni Jesus ti nangascasaba ken nagcuna: Agbabawicayo, ta ti pagarian ti langit asidegen.

¹⁸ Ket idi a nagnagna ni Jesus iti dinna ti baybay ti Galilea, nakitana ti dua nga agcabsat, ni Simon a managan Pedro, ken ni Andres a cabsatna, a mangitintinnag ti maysa nga iket iti baybay, ta dumadaclisda;

¹⁹ Ket cunana cadacuada: Umaycay sumurot caniac, ket pagbalinencayto a dumadaclis cadagiti tao,

²⁰ Ket dagus a pinanawanda dagiti iket, ket simmurotda kencuana.

²¹ Ket idi nagtuloy a nagna nakitana ti dua pay nga agcabsat, ni Santiago nga anac ni Zebedeo, ken ni Juan a cabsatna, iti barangay agraman ken Zebedeo nga amada, a tartarimaanenda dagiti iketda; ket inayabanna ida.

²² Ket dagus a pinanawanda di barangay ken ni amada, ket simmurotda kencuana.

²³ Ket ni Jesus linawlawna ti amin a Galilea, a nangisursoro cadagiti sinagogada, ken nangicascasaba ti evangelio ti pagarian, ket nangpapaimbag cadagiti amin a kita ti sakit ken amin a kita ti an-annayen cadagiti umili.

²⁴ Ket nadinamag iti amin a Siria; ket inyegda kencuana dagiti isu-amin nga masacsakit, dagiti kinapet ti nadumaduma a sacsakit ken rigrigat, ken dagiti nagun-gan dagiti sairo, ken dagiti adda bulanbulanenda, ken dagiti di macagunay, ket pinaimbagna ida.

²⁵ Ket simmurotda kencuana dagiti dadackel a bonggoy ti tao a naggapuda iti Galilea ken Decapolis, ken Jerusalem ken Judea ken iti labes ti Jordan.