San Mateo 3 - Ti Biblia (1973)

Ni Juan a Bautista.

¹ Ket cadagiti nga aldaw immay ni Juan a Bautista a nangascasaba iti let-ang ti Judea, a cuncunana:

² Agbabawicayo; ta ti pagarian ti langit asidegen,

³ Ta daytoy isu daydi sinao ni mammadto nga Isaias a cuncunana: Timec ti maysa nga agao-awag iti let-ang: Isaganayo ti dalan ti Apo, Palintegenyo dagiti danana.

⁴ Ket ni Juan met laeng adda pagananayna idi a dutdot ti camello, ken maysa a barikes a lalat a nailicmut iti siketna ket ti taraonna idi dagiti dudon ken diro.

⁵ Idin rimmuar a napan kencuana ti taga Jerusalem ken amin a taga Judea ken amin a taga arubayan ti Jordan;

⁶ Ket nabautizaranda kencuana idiay carayan Jordan nga ipudpudnoda dagiti basbasolda.

⁷ Ngem idi nakitana dagiti adu cadagidi Fariseo ken Saduceo nga um-umay iti pammautizarna, kinunana cadacuada: Dacayo caputotan dagiti carasaen. Asino ti namalacad cadacayo a pumanaw iti pungtot nga umayto?

⁸ Agaramidcay ngarud cadagiti bunga a maicari iti panagbabawi;

⁹ Ket dicay panunuten iti unegyo met laeng a cunayo; Adda ni Abraham a pannaca-amami: ta cunac cadacayo a ti Dios mabalinna ti mamangon cadagiti annac ken Abraham uray pay cadagitoy bato.

¹⁰ Ket itan ti wasay naicabilen iti ramut dagiti caycayo tunggal cayo ngarud a di mangted ti nasayaat a bunga, mapucan ket maisungrod iti apuy.

¹¹ Siac kinapudnona, bautizarancayo iti danum a maipaay iti panagbabawi; ngem dayta umay sumaruno caniac adadda ti pannacabalinna ngem siac; dagiti zapatos daytoy saanac a maicari nga agiggem; isu bautizarannacayto iti Espiritu Santo ken apuy.

¹² Ti paidna adda iti imana ket sapridannanto a nalaing ti pagbayoanna; ket urnungennanto ti trigona iti camaligna, ket puurannanto ti garami iti apuy a di maiddep.

Pannacabautizar ni Jesus.

¹³ Idin ni Jesus nanipud Galilea aginga ti Jordan napan ken Juan tapno pabautizaran kencuana.

¹⁴ Ngem ni Juan cayatna coma idi a tipden a cuncunana: Siac masapulco ti pabautizaran kenca. Ket sica umayca caniac?

¹⁵ Ngem idi simmungbat ni Jesus, kinunana kencuana: Anamungam ita; ta casta ti maipaay cadatayo a panangtungpal ti amin a kinalinteg. Idin inanamunganna.

¹⁶ Ket ni Jesus, idi nalpas a nabautizaran, dagus a simmang-at nanipud iti danum; ket adtoy; dagiti langlangit nalucatanda kencuana, ket nakitana ti Espiritu ti Dios a bumabbaba a cas la calapati ket umumay kencuana.

¹⁷ Ket adtoy ti maysa a timec a nanipud cadagiti langlangit a cuncunana: Daytoy ti Anacco a dungdungngoec, Isu a pacapnecac unay kencuana.