San Mateo 28 - Ti Biblia (1973)

Ti panagungar.

¹ Idi ngalay ti aldaw a panaginana idi madama a bumigat ti umuna nga aldaw ti lawas, immayda Maria Magdalena ken daydi sabali a Maria a cumita iti tanem.

² Ket adtoy simro ti maysa a dackel a gingined; ta maysa nga angel ti Apo bimmaba manipud langit, ket idi a dimteng, tinulidna daydi bato ket nagtugaw iti rabawna.

³ Ket daydi langana cas la kimat, ket daydi cawesna napudaw a cas la nieve.

⁴ Ket gapu iti butengda kencuana dagiti agbanbantay, nagpigergerda, ket natdada a cas la natay.

⁵ Ket simmungbat di angel ket kinunana cadagiti babbai: Dicay agbuteng: ta ammoc a sapsapulenyo ni Jesus, daydi nailansa iti cruz.

⁶ Awan ditoy; ta nagungaren a cas kinunana cadacayo. Umaycayo, kitaenyo ti disso a nacaitanemanna.

⁷ Ket incay a di agtactac ket ibagayo cadagidi adalanna a nagungaren cadagiti natay ket adtoy mapan iti masangoananyo idiay Galilea; idiay makitayonto; ket adtoy, naibagacon cadacayo.

⁸ Ket pimmanawda iti tanem a sibubuteng, ken sirarag-o unay, ket napanda a nagtartaray, a mangted ti damag cadagiti adalan.

⁹ Ket adtoy, Ni Jesus sinabetna ida a cuncunana: Cumablaawac cadacayo ket immasidegda, ket inaracupda dagiti sacsacanna ket nagdaydayawda kencuana.

¹⁰ Idin kinuna ni Jesus cadacuada: Dicay agbuteng: incayo, ibagayo cadagiti cacabsatco a mapanda idiay Galilea, ket idiay makitadacto.

Ti damag a nagwara cadagiti Judio.

¹¹ Ket idi mapmapanda, adtoy dadduma cadagiti nagbantay, napanda iti ciudad, ket impacaammoda cadagiti panguloen dagiti papadi ti isu-amin a napasamac.

¹² Ket dagitoy, idi addada a nakiurnong cadagidi lallacay, ken idi nacapagnunumodan, iniccanda ti adu a pirac dagiti soldado.

¹³ A insursuroda ida: Cunaenyo: Dagiti adalanna immayda iti rabii ket tinacawda idi addacami a matmaturog.

¹⁴ Ket no daytoy mangngegto ti gobernador, isu ti casaominto ket dacami ti macaammo cadacayo.

¹⁵ Gapuna innalada daydi pirac, ket inaramidda cas naisuro cadacuada; ket daytoy a sao naiwara cadagiti Judio agingga ita nga aldaw.

Ti panagparang ni Jesus idiay Galilea.

¹⁶ Ngem dagiti sangapulo ket maysa nga adalan napanda idiay Galilea idiay bantay a tinudingan ni Jesus cadacuada.

¹⁷ Ket idi nakitada, nagdaydayawda kencuana: ngem dagiti dadduma nagduaduada.

¹⁸ Ket immasideg ni Jesus cadacuada, ket kinasaona ida, a cuncunana: Isu-amin a pannacabalin naited caniac idiay langit ken iti rabaw ti daga.

¹⁹ Incayo ngarud, ket pagbalinenyo nga adadalan dagiti amin a nacion, a bautizaranyo ida iti nagan ni Ama, ken ti Anac, ken ti Espiritu Santo:

²⁰ Nga insursuroyo cadacuada nga aywananda dagiti isu-amin a banag nga inbilinco cadacayo: Ket adtoy, addaac cadacayo nga agnanayon agingga iti panungpalan ti lubong.