San Mateo 26 - Ti Biblia (1973)

Ti panagtutulag dagiti sacerdote.

¹ Ket naaramid nga idi nalpas ni Jesus amin dagitoy a sao, kinunana cadagiti adalanna:

² Ammoyo nga iti calpasan ti dua nga aldaw umay ti Pascua, ket ti Anac ti tao mayawat tapno mailansa iti cruz.

³ Idin dagiti panguloen dagiti sacerdote, ken dagiti panglacayen dagiti umili naggigimongda iti palacio ti cangatoan a padi, a managan Caifas;

⁴ Ket ninumoda a tiliwen ni Jesus a sicapan ken papatayda.

⁵ Ngem kinunada: Saan nga iti bayat ti fiesta, di la ket ta adda mabangon a riri cadagiti umili.

Ti panangrabii idiay Betania.

⁶ Ket idi adda ni Jesus idiay Betania, idiay balay ni Simon nga agcucutel.

⁷ Immasideg kencuana ti maysa a babai a nangyeg ti maysa a vaso nga alabastro, napno ti unguento a napateg unay; ket imparucpocna iti ulo ni Jesus idi adda a sisasango iti panganan.

⁸ Ngem dagiti adalan, idi nakitada daytoy, nagrurodda nga agcuncuna: Ania ti capapayan daytoy a panagdadael?

⁹ Ta daytoy nga unguento nabalin coma a nalaco iti nangina, ket maited cadagiti napanglaw.

¹⁰ Ngem ni Jesus, idi nadlawna daytoy, kinunana cadacuada: Apayapay alimutengenyo daytoy babai? ta nasayaat ti inaramidna caniac.

¹¹ Ta agnanayon nga adda cadacayo dagiti napanglaw; ngem siac saan nga agnanayon nga addaac cadacayo.

¹² Ta iti panangiparucpocna itoy nga unguento iti bagic, inaramidna tapno isagananac iti pannacaitanem.

¹³ Pudno cunac cadacayo nga uray sadino a pacaicascasabaan daytoy nga evangelio iti isu-amin a lubong, masaritanto met ti inaramid daytoy a babai a pacalaglagipan kencuana.

Ti pateg ti liput.

¹⁴ Idin, ti maysa cadagiti sangapulo ket dua, daydi managan ti Judas Iscariote, napan cadagiti turayen dagiti papadi.

¹⁵ Ket kinunana: Ania ti cayatyo nga ited caniac, tapno isu iyawatyo cadacayo? Ket indiayada kencuana ti tal-lo pulo a bagi ti pirac.

¹⁶ Ket nanipud idin nagsapul ti nasayaat a pamayan a panangyawatna cadacuada.

Ti camaudianan a Pascua: ti nasantoan a panangrabii.

¹⁷ Ket idi umuna nga aldaw ti di linevaduraan a tinapay immay dagiti adalan ken Jesus, a cuncunada: Adino ti cayatmo a pangisaganaanmi iti panganam ti pascua?

¹⁸ Ket kinunana: Incayo idiay ciudad iti maysa a tao, ket cunayo kencuana: Ti mannursuro cunana: Ti aldawco asidegen; umayac ditoy balaymo a mangrambac ti pascua agraman cadagiti adalac.

¹⁹ Ket dagiti adalan inaramidda cas imbilin cadacuada ni Jesus, ket insaganada ti pascua.

²⁰ Ket idi mumalemen, isu adda a sisasango iti panganan agraman cadagidi sangapulo ket dua nga adalan.

²¹ Ket idi mangmangan, kinunana cadacuada: Pudno cunac cadacayo, a ti maysa cadacayo iyawatnacto.

²² Ket naglidayda iti dackel unay: ket rinugian ti tunggal maysa a kinuna kencuana: Siac aya, Apo?

²³ Ket isu simmungbat, ket kinunana: Dayta mangicabil ti imana iti pinggan a nakilanglang caniac, daytoy ti mangyawatto caniac.

²⁴ Toy anac ti tao mapan a pudno cas iti adda a naisurat kencuana: ngem, asi pay dayta tao a gapu kencuana maiyawatto toy Anac ti tao! naimbag coma iti dayta a tao no saan coma a nayanac.

²⁵ Idin simmungbat ni Judas, daydi nangyawat idi kencuana; ket kinunana: Siac aya, Mannursuro? Cuna kencuana ni Jesus, Nasaomon.

²⁶ Ket idi mangmanganda, ni Jesus nangala ti maysa a tinapay, ket binendicionanna, ket pinisina, ket intedna cadagiti adalan, ket kinunana: Alaenyo, canenyo; daytoy isu ti bagic.

²⁷ Ket nangala ti maysa nga copa; ket nagyaman ket isu intedna cadacuada, a cuncunana: Uminumcayo amin iti daytoy;

²⁸ Ta daytoy isu ti darac iti Baro a tulag, isu a maibuyat gapu cadagiti adu, a maipaay iti pannacaiccat dagiti basbasol.

²⁹ Ta cunac cadacayo, a manipud ita diacto uminumen itoy bunga ti uvas, agingga iti aldaw a pannakiinumco cadacayo iti baro iday pagarian ni Amac.

³⁰ Ket idi nacantadan ti maysa nga himno, napanda idiay Bantay dagiti Olivo.

Mapaltiingan ni Pedro.

³¹ Idin ni Jesus kinunana cadacuada; Dacay amin maitibcolcayto caniac itoy a rabii; ta adda a naisurat: Cabilecto ti pastor, ket mawarawaradanto dagiti carnero ti arban.

³² Ngem iti calpasan ti panagungarco innacto iti sangoananyo idiay Galilea.

³³ Ngem ni Pedro simmungbat, ket kinunana kencuana: No maitibcoldanto amin kenca, siac, uray caano diacto maitibcol.

³⁴ Ni Jesus kinunana kencuana: Pudno cunac kenca, a daytoy a rabii, dinto pay agtaraoc ti cawitan mailibacnacto iti mamitlo.

³⁵ Cuna kencuana ni Pedro: Uray pay no masapul a matayac a maicanunong kenca dicanto ilibac. Ket amin dagiti adalan casta met ti kinunada.

Ni Jesus idiay Getsemani.

³⁶ Idin dumteng ni Jesus agraman cadacuada iti maysa a minuyungan a managan Getsemani; ket kinunana cadagiti adalanna: Agtugawcayo ditoy, iti bayat ti ipapanco idiay nga agcararag.

³⁷ Ket incuyogna kencuana ni Pedro ken dagiti dua nga anac ni Zebedeo, ket nangrugi a nagladingit ket nagtotooc unay.

³⁸ Idin ni Jesus cunana cadacuada: Ti cararuac silaladingit unay agingga iti ipapatay: agbaticay ditoy, ket makipagpuyatcay caniac.

³⁹ Ket nagna pay bassit iti masangoanan, ket inrucnoyna ti rupana ket nagcararag a cuncunana: Ama, no mabalin lumabas coma caniac daytoy a copa; ngem saan a cas iti cayatco, no di cas iti cayatmo.

⁴⁰ Ket immay cadagiti adalanna, ket nasaracanna ida a matmaturog; ket kinunana ken Pedro: Casano? Saanyo a mabalin ti makipagpuyat caniac iti maysa nga horas?

⁴¹ Agpuyatcayo ken agcararagcayo, tapno dicay sumrec iti pannacasulisog; pudno a ti nakem adda a sireregta ngem ti lasag nacapuy.

⁴² Napan manen, iti maicadua, ket nagcararag a kinunana: O Ama, no daytoy a copa saanna a mabalin ti lumbes, no di isu inumec, maaramid coma ti pagayatam.

⁴³ Ket idi immay manen nasaracanna ida a matmaturog; ta dagiti matada addada nga agcurcuridemdem.

⁴⁴ Ket idi pinanawanna ida manen, napan ket nagcararag iti maicatlo, nga inulitna manen dagiti met la a sao.

⁴⁵ Idin immay cadagiti adalan ket cunana cadacuada: Maturogcayon ket aginanacayo: adtoy, ti horas asidegen, ket toy Anac ti tao mayawat cadagiti imima dagiti managbasol.

⁴⁶ Tumacdercayo, intayon; adtoy, asideg daydiay mangyawaten caniac.

Pannacatiliw ni Jesus.

⁴⁷ Ket idi madama pay laeng nga agsasao, adtoy, ni Judas, maysa cadagiti sangapulo ket dua, immay: ket kimmuyog kencuana ti adu unay a tao a nagtagicampilan ken nagtagipang-or, iti biang dagiti turayen dagiti papadi ken panglacayen dagiti umili.

⁴⁸ Ket daydi mangyawat kencuana iniccanna ida ti maysa a pagilasinan, a cunana: No asino ti agepac daydiay isunto; isu tiliwenyo.

⁴⁹ Ket dagus nga immasideg ken Jesus, ket kinunana kencuana: Cablaawanca, Mannursuro; ket inagcanna.

⁵⁰ Ket ni Jesus kinunana kencuana: Gayyem, tungpalem ti panggepmo. Idin dimtengda ket iniggamanda ni Jesus ket tiniliwda.

⁵¹ Ket adtoy, maysa cadagiti adda a naicuyog ken Jesus inunnatna ti imana, ket inasutna ti campilanna, ket sinugatna ti tagabu ti cangatoan a padi, ket piningasanna ti maysa a lapayagna.

⁵² Idin ni Jesus cunana kencuana: Ipulangmo ta campilanmo iti calubanna; ta isu-amin dagiti mangaramat iti campilan mataydanto iti campilan.

⁵³ Wenno pagarupem aya a diac mabalin ti agdawat ken Anac, ket isu, ita met laeng, iccannacto ti nasuroc a sangapulo ket dua a legion dagiti angel?

⁵⁴ Ngem casanonto ngarud ti pannacatungpal dagiti Sursurat, a masapul a maaramid ti castoy?

⁵⁵ Idi nga horas kinuna ni Jesus cadagiti adu a tao: Immawaycayo aya a nagtagicampilan ken nagtagipang-or a mangtiliw caniac cas bumusor iti maysa a tulisan? Cadagiti isu-amin nga aldaw nagtugtugawac idiay Templo a mangisursuro, ket didac tiniliw.

⁵⁶ Ngem amin daytoy naaramid, tapno matungpal dagiti Sursurat dagiti mammadto. Idin dagiti amin nga adalan isu pinanawanda, ket nagtalawda.

Ni Jesus iti sangoanan ti Senedrin, wenno cangatoan a pangocoman dagiti Judio.

⁵⁷ Ket dagiti nangtiliw ken Jesus impanda ken Caifas, a cangatoan a padi isu a nacaurnongan dagiti escriba ken dagiti lallacay.

⁵⁸ Ket ni Pedro isu sursurutenna idi iti adayu aginga iti paraangan ti cangatoan a padi; ket idi simrec iti uneg, nakicatugaw cadagiti adipen, tapno makitana ti pagbanaganna.

⁵⁹ Ket dagiti turayen dagiti papadi ken ti isu-amin a concilio agsapsapulda ti tiri a pangsacsi a macadadael ken Jesus tapno iyawatda ken patay;

⁶⁰ Ngem awan ti nasaracanda, uray adu dagiti saan a pudno a sacsi a nagparang. Ngem iti camaudiananna, adda dua nga immay.

⁶¹ A nagcuna: Daytoy kinunana; Adda pannacabalinco a mangrebba iti Templo ti Dios, ken mangbangon manen kencuana iti tal-lo nga aldaw.

⁶² Ket timmacder ti cangatoan a padi, ket kinunana kencuana: Awan ti sungbatmo? Ania ti sacsian dagitoy a macadadael kenca?

⁶³ Ngem ni Jesus saan a naguni. Idin daydi cangatoan a padi kinunana kencuana: Isapatam, gapu iti Dios a sibibiag, nga ibagam cadacami, no sica ti Cristo nga Anac ti Dios.

⁶⁴ Ni Jesus cunana kencuana: Sinaomon: Ket cunac pay cadacayo nga iti masangoanan makitayonto toy Anac ti tao nga agtugaw iti macanawan ti Pannacabalin nga umay iti rabaw dagiti ulep ti langit.

⁶⁵ Idin daydi cangatoan a padi pinigisna dagiti pagananayna a cuncunana: Nagtabbaaw: Ania ti pacasapulantayo cadagiti sacsi? Adtoy, ita nangngegyo ti tabbaaw.

⁶⁶ Ania ti panagcunayo? Simmungbatda, ket kinunada: Isu maicari iti pannacapapatay.

⁶⁷ Idin tinupraanda ti rupana ket tinungtungpada; ket dagiti dadduma sinulongda,

⁶⁸ A cuncunada: Padtoannacami, sica, Cristo: Asino ti nangcabil kenca?

Ni Pedro ilibacna ni Jesus.

⁶⁹ Idin, ni Pedro adda nga agtutugaw iti ruar idiay paraangan, ket immasideg kencuana ti maysa nga adipen a babai, a cuncunana: Ket sica nakicuycuyogca met ken Jesus a taga Galilea.

⁷⁰ Ngem isu naglibac iti sangoananda amin, a cuncunana: Diac ammo dayta cunam.

⁷¹ Ket idi rimmuar iti ruangan, nakita ti sabali a babai; ket kinunana cadagiti adda sadiay: Daytoy adda met idi a makicuycuyog ken Jesus a Nazareno.

⁷² Ket naglibac manen a nagsapata: Diac amammo dayta a tao.

⁷³ Ket idi nalabes bassit, immasideg dagiti agtatacder, ket kinunada ken Pedro: Pudno a sica maysaca met cadacuada, ta uray ti panagsasaom ipadlawnaca,

⁷⁴ Idin nangrugi a naglunod, ken nagsapapata, a cunana: Diac amammo dayta a tao. Ket naigiddato a nagtaraoc ti maysa a cawitan.

⁷⁵ Ket nalagip ni Pedro daydi sao nga imbaga ni Jesus: dintopay agtaraoc ti cawitan, ilibacnacto a mamitlo. Ket rimmuar ket nagsangit iti nasaem unay.