San Mateo 25 - Ti Biblia (1973)

Ti kascasaba a padto (canayon): Pangngarig dagiti sangapulo a babbalasang.

¹ Ti pagarian ti langit maipadisto ngarud cadagiti sangapulo a babbalasang, nga innalada dagiti pagsilawanda, ket rimmuarda nga sumabet iti asawa a lalaki.

² Ket lima cadacuada ti naampang, ket lima dagiti manakem.

³ Ta dagiti naampang, idi innalada dagiti pagsiliwanda, saanda a nangicuyog iti lana;

⁴ Ngem dagidi manakem nangicuyogda ti lana cadagiti vasoda agraman cadagiti pagsilawanda.

⁵ Idi ngarud nagbayag daydi novio, nagdungsada amin, ket nacaturogda.

⁶ Ngem iti tengnga ti rabii, adda maysa nga puccaw, a cuncunana Adtoy ti novio: Rummuarcayo a sumabet kencuana.

⁷ Idin amin dagiti babbalasang timmacderda ket tinarimaanda dagiti pagsilawanda.

⁸ Ket dagiti naampang kinunada cadagiti manakem: Iccandacami iti lanayo, ta dagiti pagsilawanmi maiddepdan.

⁹ Ngem dagiti manakem simmungbatda a cuncunada: Tapno di agcurang ti maipaay cadacami ken cadacayo, incayo cadagiti aglaco ket gumatangcayo ti maipaay cadacayo.

¹⁰ Ket idi napanda gimmatang, dimteng ti asawa; ket dagiti adda a nacasagana, simrecda a kimmuyog kencuana iti pagbodaan ket ti ruangan napunitan.

¹¹ Idin immay metten dagiti dadduma a babbalasang nga agcuncuna: Apo, Apo, ilucatandacami.

¹² Ngem simmungbat, ket kinunana: Pudno cunac cadacayo: Saancay nga amammo.

¹³ Agsalucagcay ngarud, ta dicay ammo ti aldaw ken horas.

Ti cascasaba a padto (canayon): Pangngarig dagiti talento.

¹⁴ Ta cas iti maysa a tao, nga mapan iti sabali a daga, inayabanna dagiti adipenna, ket inyawatna cadacuada dagiti cucuana.

¹⁵ Ket intedna iti maysa ti lima a talento, intedna iti sabali ti dua, ket iti sabali intedna ti maysa; iti tunggal maysa cas iti cabaelanna; ket sa napan iti viaje.

¹⁶ Dagus a daydi immawat ti lima a talento, napan ket pinagsapulna, ket nacagunguna ti sabali a lima a talento.

¹⁷ Casta met daydi immawat ti dua a talento, nacagunguna ti sabali a dua a talento.

¹⁸ Ngem daydi immawat ti maysa, napan, ket kinutcutna ti daga, ket inlemmengna daydi pirac ni apona.

¹⁹ Idi nalabes ti adu nga aldawen, immay daydi apo dagiti adipen ket inayabanna ida a kinacuenta.

²⁰ Idi nagparang daydi immawat ti lima a talento, nangyeg ti sabali pay a lima a talento, a cuncunana; Apo, lima a talento ti inyawatmo caniac; adtoy, nacagungunaac ti sabali a lima a talento.

²¹ Ni apona kinunana kencuana: Naimbag, adipen a nalaing ken mapagtalcan; napagtalcanca iti bassit, isaadcanto nga agaywan iti adu; makipagragsacca iti Apom.

²² Daydi met immawat ti dua a talento, nagparang ket kinunana: Apo, dua a talento ti intedmo caniac; adtoy, nacagungunaac ti sabali a dua a talento.

²³ Ni apona kinunana kencuana: Naimbag, adipen a nalaing ken mapagtalcan: napagtalcanca iti bassit, isaadcanto nga agaywan iti adu: makipagragsacca iti apom.

²⁴ Ket dimteng met daydi immawat ti maysa a talento, ket kinunana. Apo, amammoc, a taoca a nainget nga aganica iti dica nagmulaan, ket agacupca iti dica nagipuruacan.

²⁵ Gapuna nagbutengac, ket napanac ket inlemmengco ti talentom iti daga: Adtoy, alaem ti cucuam.

²⁶ Ngem simmungbat di apona, ket kinunana kencuana: Adipen a managdacdackes ken nasadut, ammom nga aganiac iti diac nagmulaan, ket agacupac iti diac nagipuruacan:

²⁷ Sica, rebbengmo coma ngarud nga inyawat ti piracco cadagiti managsucat ti pirac, tapno ita ta umayac, awatec coma ti cucuac agraman gunguna.

²⁸ Iccatenyo ngarud kencuana ti talento, ket itdenyo iti addaan ti sangapulo a talento.

²⁹ Ta iti tunggal maysa nga addaan, maiccanto pay, ket addanto kinawadwad kencuana: ngem ti awanan, uray dayta adda kencuana, maiccatto pay.

³⁰ Ket ti adipen nga awan capapayanna, ibel-lengyo iti sipnget ti ruar: idiay addanto ti panagsangit ken panagngaretnget dagiti ngipen.

Ti cascasaba a padto (panungpalan): Ti biag nga agnanayon ken dagiti dusa nga agnanayon.

³¹ Ngem intono ti Anac ti tao umayto agraman iti dayagna, ken amin dagiti angel maicuyog kencuana, isu ti panagtugawnanto iti trono ti gloriana.

³² Ket iti sangoananna, maurnongto dagiti isu-amin a nacion; ket paglalasinenanto dagiti maysa ken maysa cadagiti tao, a cas iti pastor ilasinna dagiti carnero cadagiti calding.

³³ Ket isaadnanto dagiti carnero iti macanawanna, ket dagiti calding iti macatigidna.

³⁴ Iti dayta cunaento ti ari cadagiti adda iti macanawanna: Umaycayo, bendito ni Amac, tawidenyo ti pagarian a naisagana cadacayo nanipud idi pannacabangon ti lubong:

³⁵ Ta nagbisinac, ket iniccandac ti canen; nagwawac, ket iniccandac ti inumen; naggangannaetac, ket pinagdagusdac,

³⁶ Lamolamoac, ket kinawesandac; nagsakitac, ket kinablaawandac; naggianac idiay pagbaludan ket immaycayo caniac.

³⁷ Iti casta sumungbatto kencuana dagiti nalinteg, a cuncunada: Apo, Caano ti pannacakitami kenca a mabisbisinan ket tinaraonandaca, wenno mawaw ket iniccandaca ti inumen?

³⁸ Ken, Caano ti pannacakitami kenca a ganganaet, ken pinagdagusdaca; wenno lamolamo ket kinawesandaca?

³⁹ Ken, Caano ti pannacakitami kenca a masakit, wenno idiay pagbaludan ket immaycam kenca?

⁴⁰ Ket sumungbatto ti Ari ket cunaenna cadacuada: Pudno cunac cadacayo, a gapu ta inaramidyo iti maysa cadagitoy canunumoan cadagitoy cacabsatco, inaramidyo met caniac.

⁴¹ Ket cunaennanto met cadagiti adda iti macatigidna: Umadayocayo caniac, nailunod, incay iti apuy nga agnanayon, a naisagana iti diablo ken cadagiti angelna.

⁴² Ta nagbisinac, ket didac iniccan ti canen, nagwawac ket didac pinainum;

⁴³ Naggangannaetac, ket didac pinagdagus; lamolamoac, ket didac kinawesan; masakitac ken addaac iti pagbaludan, ket didac sinarungcaran;

⁴⁴ Iti dayta sumungbatdanto met nga agcuncuna: Apo, Caano ti pannacakitami kenca a mabisbisinan, wenno mawaw wenno gangannaet, wenno lamolamo, wenno masakit, wenno idiay pagbaludan, ket didaca nagservian?

⁴⁵ Iti casta, sumungbatto cadacuada, nga agcuncuna: Pudno cunac cadacayo, gapu ta dicay inaramid iti maysa cadagiti canunumoan cadagitoy, dicay met inaramid caniac.

⁴⁶ Ket dagitoy mapandanto iti dusa nga agnanayon; ngem dagiti nalinteg iti biag nga agnanayon.