San Mateo 24 - Ti Biblia (1973)

Ti cascasaba a padto: Ti pangrugian dagiti ladingit.

¹ Ket rimmuar ni Jesus idiay Templo, ket mapmapan iti dalan ket dagiti adalanna immayda tapno ipakitada kencuana dagiti patpatacder ti Templo.

² Ngem isu simmungbat, ket kinunana cadacuada: Dicay makita amin dagitoy a banag? Pudno cunac cadacayo, awanto ti matda ditoy a maysa a bato iti rabaw ti maysa a dinto marba.

³ Ket isu idi adda nga agtutugaw iti rabaw ti Bantay dagiti Olivo, dagiti adalan immasidegda kencuana nga isisuda, a cuncunada: Ibagan cadacami, caanonto ti pannacaaramid dagitoy? ket anianto ti pagilasinan iti iyaaymo, ken iti panungpalan toy lubong?

⁴ Ket ni Jesus simmungbat, ket kinunana cadacuada: Kitaenyo ta awan coma ti mangulbod cadacayo.

⁵ Ta adunto dagiti umay iti naganco, nga agcuncuna: Siac ti Cristo; ket adunto dagiti ulbodenda.

⁶ Ket macangngegcayto cadagiti gubgubat, ken damdamag ti gubgubat; kitaenyo ta dicay aglagaw; ta masapul a maaramid dagitoy; ngem saan pay nga isu ti panungpalan.

⁷ Ta tumacderto ti nacion a bumusor iti sabali a nacion, ti pagarian a bumusor iti sabali a pagarian: ket addanto bisbisin ken gingined iti nadumaduma a disso.

⁸ Ngem amin dagitoy a banbanag isuda ti pangrugian dagiti ladingit.

⁹ Iti dayta iyawatdacayto iti rigat, ket papatayendacayto; ket guraendacayto dagiti amin a nacion a gapu iti naganco.

¹⁰ Ket iti dayta adunto dagiti maitibcol, ken agpipinnadakesto ti maysa ken maysa; ket aggugurangguranto ti maysa ken maysa.

¹¹ Ket adunto dagiti saan a pudno a mammadto tumacderdanto ket ulbodendanto dagiti adu.

¹² Ket agsipud ta agadunto ti kinadakes, ti ayat dagiti adu lumamiisto.

¹³ Ngem ti agtalinaed agingga iti panungpalan maisalacanto.

¹⁴ Ket daytoy evangelio ti pagarian maicascasabanto iti amin a lubong tapno mangpanecnec cadagiti isu-amin a nacion; ket iti casta umayton ti panungpalan.

Ti cascasaba a padto (canayon): Ti dackel a tooc.

¹⁵ Intono ngarud no makitayo ti kinarimon a mamagwalwalang a sitatacder iti nasantoan a disso, a cas insao ni Daniel a mammadto, (ti bumasa, awatenna coma),

¹⁶ Mapanda coma dagiti adda idiay Judea agcamang cadagiti banbantay;

¹⁷ Ket ti adda idi tuctuc ti balay, saan coma a bumaba a mangala ti uray ania idiay balayna;

¹⁸ Ket ti adda iti talon, saan nga agsubli coma a mangala ti cagayna.

¹⁹ Ngem asi pay dagiti adda a masicog, ken dagiti agtagibi cadagita nga aldaw.

²⁰ Agdawdawatcayo ngarud, nga ti panagtalawyo saan coma nga iti calam-ecna, wenno iti aldaw a panaginana.

²¹ Ta addanto dackel a rigat, nga nanipud idi punganay ti lubong aginga ita, awan pay casta a napasamac, ket awanto metten iti uray caano.

²² Ket no dagita nga aldaw saanda coma a napaababa, awan coma ti lasag a maisalacan; ngem gapu cadagiti napili dagita nga aldaw mapaababadanto.

²³ Iti casta no ti siasinoman a tao agsaonto cadacayo: Adtoy ti Cristo, wenno: Adda ditoy; dicayto patien.

²⁴ Ta tumacderdanto dagiti saan a pudno a Cristo, ken dagiti saan a pudno a mammadto, ket mangipakitadanto cadagiti dadackel a pagilasinan ken datdatlag tapno mangisiasida coma no mabalin, uray pay cadagiti napili.

²⁵ Adtoy, siac imbagac nga impacpacauna cadacayo.

²⁶ No cunaendanto ngarud cadacayo: Adtoy, adda ditoy let-ang; dicay mapmapan; wenno: Adtoy cadagiti caunegan a sisiled; dicay patien.

²⁷ Ta cas iti kimat a rummuar iti daya, ket makita a sumilap agingga iti laud, castanto met ti yaay ti Anac ti tao.

²⁸ Uray sadino nga yan ti bagi a natay, aguurnongdanto met idiay dagiti agila.

Ti cascasaba a padto (canayon); Ti iyaay ti Anac ti tao.

²⁹ Ket maigiddatonto iti calpasan ti rigat cadagita nga aldaw, a ti init agsipngetto, ket ti bulan dinto aglawag, ket dagiti bitbituen matnagdanto manipud langit, ket dagiti pannacabalin dagiti langlangit mapakintayegdanto:

³⁰ Ket iti casta agparanto ti pagilasinan ti Anac ti tao iti langit; ket agdungawto dagiti amin a tribu ti daga, ket makitadanto ti Anac ti tao nga umay iti rabaw dagiti ulep ti langit, nga adda pannacabalin ken dackel a gloriana.

³¹ Ket ibaonnanto dagiti angelna a buyugan ti napigsa nga uni ti trompeta, ket urnongendanto dagiti pinilina, cadagiti uppat nga angin, manipud iti maysa nga ungto ti langit agingga iti bangir.

Ti cascasaba a padto (canayon): Balacad tii panagsalucag.

³² Ita iti cayo ti higos ti pagsursuroanyo iti pangngarigna: Intono ti sangana gumanusen, ket patubboenna dagiti bulbulong, ammoyo a ti ticag asideg metten.

³³ Castacayo met inton makitayo amin dagitoy, ammoenyo, nga isu asidegen cadagiti ruangan.

³⁴ Pudno cunac cadacayo, a dinto pay lumabas daytoy a caputotan, maaramidton amin dagitoy a banag.

³⁵ Ti langit ken daga mapucawdanto ngem dagiti saoc didanto bumurong.

³⁶ Ngem ti maipapan iti dayta nga aldaw ken horas, awan ti macaammo na caanonto uray pay dagiti angel ti langit, uray pay met toy Anac, no di laeng ni Ama.

³⁷ Ket cas cadagiti aldaw ni Noe, castanto ti yaay toy Anac ti tao.

³⁸ Ta cas cadagiti aldaw nga casangoanan ti layus, addada a mangmangan ken umininum, mangasasawa ken makias-asawa agingga iti aldaw ti iseserrec ni Noe idi daong.

³⁹ Ket dida naawatan agingga iti yaay ti layus, ket inyayusna ida amin; castanto ti yaay toy Anac ti tao.

⁴⁰ Iti casta addanta dua a lallaki iti talon: ti maysa maalanto, ket ti sabali mabatinto:

⁴¹ Addanto dua a babai nga aggilgiling iti paggilingan: ti maysa maalanto, ket ti sabali mabatinto.

⁴² Agsalucagcayo ngarud, ta dicay ammo no ania nga aldaw ti iyaayto ti Apoyo.

⁴³ Ngem ammoenyo daytoy, a no ti ama ti sangacabbalayan naammoanna coma no ania nga horas ti iyaay ti mannanacaw, nagpuyat coma, ket dina coma impalubos a nabutbutan ti balayna.

⁴⁴ Gapuna addacay met coma a sisasagana; ta inton horas a dicay ipagpagarup toy Anac ti tao umayto.

Ti cascasaba a padto (canayon): Pangngarig dagiti dua nga adipen.

⁴⁵ Siasino ngarud ti adipen a mapagtalcan ken naannad, nga incabil ni apona nga agaywan iti sangacabbalayanna tapno iccanna ida ti taraon no pannacaipaayna?

⁴⁶ Nagasat daydiay nga adipen, nga masaracanto ni apona, inton umay a casta ti aramidenna.

⁴⁷ Pudno cunac cadacayo, nga icabilnanto nga agaywan cadagiti amin a gamengna.

⁴⁸ Ngem no ti adipen a dakes cunaennanto iti pusona: Ni apoc mabayag pay nga umay;

⁴⁹ Ket rugiannanto a cabcabilen dagiti padana nga adipen ken makipangan ken makiinum cadagiti managbartec;

⁵⁰ Umayto ti apo daydiay nga adipen iti aldaw a dina panangururay, ken iti horas a dina ipagpagarup.

⁵¹ Ket saplitennanto ket ipatonanto ti yanna a mairaman cadagiti managinsisingpet: idiay addanto ti panagsangit ken ti panagngaretnget dagiti ngipen.