San Mateo 23 - Ti Biblia (1973)

Ni Jesus babalawenna dagiti escriba ken Fariseo.

¹ Idin nagsao ni Jesus cadagiti adu a tao, ken cadagiti adalanna,

² A cuncunana: Dagiti escriba ken dagiti Fariseo agtugawda iti palangca ni Moises:

³ Isu-amin ngarud nga ibagadanto cadacayo, aywananyo ken aramidenyo; ngem dicay agaramid a cas cadagiti aramidda; ta agsaoda ket dida agaramid.

⁴ Ta mangreppetda cadagiti awit a nadagsen ken narigat nga awiten, ket ipabaclayda cadagiti tao; ngem isuda dida cayat a garawen cadagiti ramayda.

⁵ Ngem amin dagiti aramidda aramidenda, tapno makita dagiti tao, ta yacabada dagiti filacteria ket iyatiddugda dagiti barayubay dagiti pagananayda,

⁶ Ket ayatenda dagiti nagundawayan a saad cadagiti ramrambac ken dagiti nagundayawan a pagtugawan cadagiti sinagoga.

⁷ Ken dagiti luglugay cadagiti plaza, ken managan Rabbi cadagiti tattao.

⁸ Ngem saancay coma a managan ti Rabbi; ta maymaysa laeng ti mannursuroyo, ket dacay amin agcacabsatcayo.

⁹ Ket awan ti naganenyo ti amayo itoy rabaw ti daga; ta maymaysa ti Amayo, isu nga adda sadi langit.

¹⁰ Ket dicay met coma managan ti manangidaldalan, ta maymaysa ti manangidalanyo nga isu ni Cristo.

¹¹ Ngem ti cadackelan cadacayo, isunto ti agserservi cadacayo.

¹² Ket siasinoman nga agpasindayaw maipababanto; ket siasinoman nga agpacumbaba maitanocto.

¹³ Ngem, asicayo pay escriba ken Fariseo, a managinsisingpet! ta punitanyo ti pagarian ti langit a maicaniwas cadagiti tattao; ta dicay sumrec ket dagiti mapan sumrec, dicay palubosan ida.

¹⁴ (Asicayo pay escriba ken Fariseo a managinsisingpet! ta alun-unenyo dagiti balbalay dagiti balbalo a babbai ket ti pambaryo aglualocayo ti atitiddag a cararag: gapu itoy awatenyonto ti dacdackel a pannacadusa.)

¹⁵ Asicayo pay, escriba ken Fariseo, a managinsisingpet! ta lawlawenyo ti baybay ken daga tapno macaalacayo ti maysa a sumurot cadacayo; ket no mapasurotyon pagbalinenyo; a maicari iti infierno a mamindua nga adadda pay ngem dacayo.

¹⁶ Asicayo pay dacayo manangidaldalan a bulsec! nga agcuna: Siasinoman nga agsapatanto gapu iti Templo, awan ti aniaman: ngem siasinoman nga agsapatanto gapu iti balitoc ti Templo, macautang.

¹⁷ Dacayo a maag ken bulbulsec. Ta ania ti nangnangrona ti balitoc wenno ti Templo a mangsantificar iti balitoc?

¹⁸ Ket: Siasinoman nga agsapatanto gapu iti altar, awan ti aniaman; ngem ti agsapatanto gapu iti daton nga adda iti rabawna macautang.

¹⁹ Dacayo a bulbulsec. Ta ania ti nangnangrona, ti daton wenno ti altar a mangsantificar iti daton?

²⁰ Dayta ngarud agsapata gapu iti altar, isapatana ti Altar ken dagiti isu-amin nga adda iti rabawna.

²¹ Ket dayta agsapata gapu iti Templo, isapatana ti Templo ken daydiay agnaed kencuana.

²² Ket dayta agsapata gapu iti langit, isapatana ti trono ti Dios, ken daydiay adda nga agtutugaw kencuana.

²³ Asicayo pay, escriba ken Fariseo, a managinsisingpet! ta agbayadcayo ti pagcapul-lo ti yerbabuena, ti anis ken ti comino, ket dicay incancano dagiti banag a napatpateg iti linteg nga isuda, ti kinalinteg, ti panangngaasi ken ti pammati. Dagitoy rebbengyo coma nga aramiden, ket dicay met bay-an dagiti dadduma.

²⁴ Manangidaldalan a bulbulsec, a mangsagat iti lamoc ket mangalun-un iti camello!

²⁵ Asicayo pay, escriba ken Fariseo, a managinsisingpet! ta ugasanyo ti ruar ti copa ken ti pinggan, ngem ti uneg napno ti kinarawet ken panaglablabes.

²⁶ Sica Fariseo a bulsec, ugasam nga umuna ti uneg ti copa ken ti pinggan, tapno ti ruarna madalusan met.

²⁷ Asicayo pay, escriba ken Fariseo, a managinsisingpet! Ta umaspingcayo cadagiti tanem a napapudaw, nga iti ruar pudno a nalibnosda, ngem iti uneg napno cadagiti tultulang dagiti natay ken isu-amin a rugit.

²⁸ Casta met dacayo, pudno nga iti ruar agparangcayo a nalinteg cadagiti tao; ngem iti uneg addacayo a napno iti panaginsisingpet ken iti kinadakes.

²⁹ Asicayo pay, escriba ken Fariseo, a managinsisingpet! ta bangonenyo dagiti tanem dagiti mammadto ket arcosanyo dagiti nacaicalian dagiti nalinteg,

³⁰ Ket cunayo: No nagbiagcami coma cadagiti aldaw dagiti ammami, saancami coma a rimmamraman cadacuada iti dara dagiti mammadto.

³¹ Ket iti casta panecnecanyo ti maibusor cadacayo met laeng, a dacayo dagiti annac dagidi namapatay cadagiti mammadto.

³² Punnoenyo ngarud ti pagsucatan dagiti ammayo.

³³ Dacayo nga ul-uleg, caputotan dagiti carasaen! Casanonto ti panaglisiyo iti pannacadusa idiay infierno?

³⁴ Gapuna, adtoy ibaonco cadacayo dagiti mammadto, ken mamasirib, ken escriba; ket cadacuada adda papatayenyonto ken ilansayo iti cruz, ket adda saplitenyonto cadagiti sinagogayo, ken irurumenyo iti ili ken ili.

³⁵ Tapno umay cadacayo ti amin a dara dagiti nalinteg a naiparucpoc itoy daga, manipud idi dara ni Abel a nalinteg agingga iti dara ni Zacarias nga anac ni Baraquias, isu a pinapatayyo iti nagbaetan ti santuario ken ti altar.

³⁶ Pudno cunac cadacayo, nga amin daytoy umayto iti daytoy a caputotan.

³⁷ O Jerusalem, Jerusalem a mamapatay cadagiti mammadto, ken mangubor cadagiti maibaon kenca! Naminano a kinayatco nga urnongen coma dagiti annacmo, a cas iti maysa nga upa urnongenna dagiti piecna iti siroc dagiti payacna, ket dica kinayat!

³⁸ Adtoy, ti balayyo mapanawan cadacayo nga awan naggian.

³⁹ Ta cunnac cadacayo a manipud ita didacto makita agingga iti panagcunayonto: Bendito dayta umay iti nagan ti Apo.