San Mateo 22 - Ti Biblia (1973)

Pangngarig ti boda.

¹ Ket ni Jesus simmungbat, ket kinasaona manen ida, cadagiti pangarig, a cuncunana:

² Ti pagarian ti langit maipadis iti maysa nga ari, a rinambacanna ti boda ti anacna.

³ Ket imbaonna dagiti adipenna tapno ayabanda dagiti naawis iti boda; ngem dida kinayat ti immay,

⁴ Nangibaon manen cadagiti sabsabali nga adipen, a cuncunana: Ibagayo cadagiti naawis: Adtoy, insaganac ti dayac: dagiti vacvaca ken dagiti animalco a pinalucmeg napartidan, ket naisaganada aminen: umaycayo iti pagbodaan.

⁵ Ngem saanda nga incancano; ket napanda, ti maysa idiay pagtalonanna, ket ti sabali cadagiti pagsapulanna.

⁶ Ket dagiti dadduma, tiniliwda dagiti adipenna, ket nagsasaoanda ket pinapatayda ida.

⁷ Iti casta daydi ari nacaunget, ket imbaonna dagiti buyotna ket pinucawna dagiti nangpapatay ket pinuuranda ti ciudadda.

⁸ Idin cunana cadagiti adipenna: Ti boda naisagana; ngem dagiti naawis isuda ti saan a maicari.

⁹ Incay ngarud cadagiti pagsisinaan dagiti daldalan; ket cadagiti isu-amin a masaracanyonto, awisenyo ida iti pagbodaan.

¹⁰ Ket rimmuar dagiti adipen cadagiti daldalan, ket inurnongda dagiti isu-amin a nasaracanda, dakes man, ken naimbag; ket ti pagbodaan napno cadagiti sangaili.

¹¹ Ngem idi simrec ti ari tapno kitaenna dagiti sangaili, nabigbigna idiay ti maysa a tao a di nagpagananay ti cawes ti makiboda:

¹² Ket kinunana kencuana: Gayyem, Apayapay simrecca ditoy nga awan pagananaymo a maipaay iti boda? Ket isu saan a naguni.

¹³ Idin ti ari kinunana cadagiti babaonenna: Isu pungoenyo dagiti sacsaca ken dagiti imimana, ket iduronyo iti sipnget iti ruar; idiay addanto panagsangit ken panagngaretnget dagiti ngipen.

¹⁴ Ta adu dagiti maayaban, ngem bassit dagiti mapili.

Ti riri a maipapan iti buis.

¹⁵ Idin, napan dagiti Fariseo, ket ninumoda no casano ti pannacabalinda coma a mangtiliw kencuana iti panagsaona.

¹⁶ Ket imbaonda kencuana dagiti adalanda agraman dagiti Herodianos a nagsao kencuana: Mannursuro, ammomi a sica napudnoca, ken isursurom a sipupudno ti dalan ti Dios; ket dica met agamac iti uray siasino, ta dica bigbigen ti casasaad dagiti tao.

¹⁷ Ibagam ngarud cadacami no ania ti panangipagarupmo: Maipalubos ti agbayad ti buis ken Cesar wenno saan?

¹⁸ Ngem ni Jesus, nadlawna ti kinadakesda ket kinunana: Apayapay suutendac, managinsisingpet?

¹⁹ Ipakitayo caniac ti pirac ti buis. Ket inyegda kencuana ti maysa a denario.

²⁰ Ket cunana cadacuada: Asino ti akinladawan ken ti naisurat itoy?

²¹ Cunada kencuana: Ni Cesar. Idin cunana cadacuada: Itedyo ngarud ken Cesar ti cucua ni Cesar; ket iti Dios, ti cucua ti Dios.

²² Idi nangngegda daytoy, nagsiddaawda, ket pinanawanda, ket nagawidda.

Dagiti Saduceo ken ti panagungar.

²³ Idi met laeng nga aldaw immayda kencuana dagiti Saduceo, nga agcuncuna nga awan ti panagungar ket nagsaludsudda kencuana,

²⁴ A cuncunada: Mannursuro, ni Moises kinunana: No ti maysa a lalaki matay nga awan putotna, asawaento ti cabsatna ti asawa a babai daydi, ket iputotanna ni cabsatna iti sunona.

²⁵ Adda ngarud cadacami idi pito nga agcacabsat a lallaki: ket ti immuna, nangasawa ket natay; ket idinto nga awan ti putotna imbatina ti asawana iti cabsatna:

²⁶ Casta met daydi maicadua, ken daydi maicatlo agingga iti maicapito.

²⁷ Ket idi nalpasda aminen, natay met di babai.

²⁸ Inton panagungar ngarud, Asinonto cadagiti pito ti akin-asawa iti babai? ta isuda amin kinupicupanda.

²⁹ Ngem ni Jesus simmungbat, ket kinunana cadacuada: Maal-lilawcayo, agsipud ta dicay ammo dagiti Sursurat wenno ti pannacabalin ti Dios.

³⁰ Ta inton panagungar, saandanto a mangasawa wenno makiasawa; ngem casdanto la cadagiti angel idiay langit.

³¹ Ngem ti maipapan iti panagungar dagiti natay, Dicay aya nabasa ti sinao ti Dios cadacayo, a cuncunana:

³² Siac ti Dios ni Abraham, ken ti Dios ni Isaac, ken ti Dios ni Jacob? Ti Dios saan a Dios dagiti natay, no di dagiti sibibiag.

³³ Ket idi nangngeg daytoy dagiti adu a tattao, nagsidsiddaawanda ti sursurona.

Ti dackel a bilin.

³⁴ Ngem idi dagiti Fariseo nangngegda, a pinagulimecna dagiti Saduceo, naguurnongda.

³⁵ Ket ti maysa cadacuada, a manangipalawag iti linteg, nagimtuud ti maysa a saludsud a pangsusuutna kencuana.

³⁶ Mannursuro. Ania ti dackel a bilin iti linteg?

³⁷ Ni Jesus kinunana kencuana: Ayatem ti Apo a Diosmo iti amin a pusom, ken iti amin a cararuam, ken iti amin nga isipmo.

³⁸ Daytoy isu ti umuna ken ti dackel a bilin.

³⁹ Ket ti maicaddua isu umasping kencuana: Ayatem ti padam a tao a cas iti bagim.

⁴⁰ Cadagitoy dua a bilin mapucpoc amin a linteg ken ti sinao dagiti mammadto.

Ni Cristo, anac ni David.

⁴¹ Ket idi adda pay laeng a naurnong dagiti Fariseo, ni Jesus nagintuud cadacuada,

⁴² A cuncunana: Ania ti panangipagarupyo ti maipapan ken Cristo? Siasino ti akin-anac kencuana? kinunada kencuana: Ni David.

⁴³ Cunana cadacuada: Casano ngarud, a ni David, idi adda iti Espiritu, isu ti awaganna ti Apo a cuncunana:

⁴⁴ Kinuna ti Apo iti Apoc; Agtugawca iti macanawanco, Agingga iti panangicabilco cadagiti cabusormo a pagbatayan dagiti sacsacam?

⁴⁵ No ni David ngarud, awaganna ti Apo, casano nga isu ti Anacna?

⁴⁶ Ket awan ti nacabalin a sumungbat kencuana ti maysa a sao; ket awan met nanipud idi nga aldaw ti macaitured nga aginintuud kencuana.