San Mateo 21 - Ti Biblia (1973)

Iseserrec a sibabal-ligi ni Jesus idiay Jerusalem.

¹ Ket idi immasidegda idiay Jerusalem ken dimtengda idiay Betfage, iti Bantay dagiti Olivo, ni Jesus imbaonna dagiti dua nga adalan,

² A kinunana cadacuada: Incayo iti puroc a masangoananyo, ket macasaraccayto a dagus ti maysa nga asna a naigalut, ken maysa nga urbon a naicuyog kencuana: warwaranyo ket yegyo ida caniac.

³ Ket no adda agsao cadacayo iti aniaman, cunaenyonto: Ti Apo masapulna ida; ket dagus nga itednanto ida.

⁴ Daytoy maaramid tapno matungpal ti sinao ti mammadto a cuncunana:

⁵ Ibagayo iti anac a babai ni Sion: Adtoy ti arim umay kenca, Naemma ket sisasacay iti maysa nga asna, Ken iti maysa nga urbon, nga anac ti asna.

⁶ Ket dagiti adalan napanda, ket inaramidda cas imbilin ni Jesus cadacuada.

⁷ Ket inyegda ti asna ken di urbon; ket incabilda cadacuada dagiti pagananayda, ket isu nagtugaw cadagitoy.

⁸ Ket caaduanna cadagiti umariwecwec a tattao inyaplagda dagiti pagananayda iti dalan; ket dagiti dadduma nangputedda cadagiti sangsanga dagiti caycayo ket inyaplagda ida iti dalan.

⁹ Ket dagiti adu a tattao a magmagna iti masangoananna, ken dagiti simmurot impuccawda a cuncunada: Hosanna iti Anac ni David! Bendito ti umay iti nagan ti Apo! Hosanna idiay cangatoan!

¹⁰ Ket idi simrec ni Jesus idiay Jerusalem, amin ti ili maririboc, a cuncunada: Siasino daytoy?

¹¹ Ket dagiti adu a tattao kinunada: Daytoy isu ni Jesus, ti mammadto, a taga Nazaret sadi Galilea.

Pannacagugor ti Templo.

¹² Ket simrec ni Jesus iti Templo ti Dios, ket pinaruarna dagiti isu-amin nga aglaclaco ken aggatgatang idiay Templo; ket tinuangna dagiti lamisaan dagiti agsucsucat ti pirac, ken dagiti tugaw dagiti aglaclaco cadagiti calapati;

¹³ Ket cunana cadacuada: Adda a naisurat: Ti balayco managanto, balay ti cararag; Ngem dacayo aramidenyo nga rukib dagiti mannanacaw.

¹⁴ Ket napanda kencuana dagiti bulbulsec ken pilpilay idiay Templo; ket pinaimbagna ida.

¹⁵ Ket idi nakita dagiti panguloen dagiti papadi ken dagiti escriba dagiti datdatlag nga inaramidna ken dagiti ubbing a mangipucpuccaw idiay Templo a cuncunada: Hosanna iti Anac ni David, napalucsawda unay.

¹⁶ Ket kinunada kencuana: Mangngegmo ti sasaoen dagitoy? Cuna cadacuada ni Jesus: Wen, uray caano saanyo aya a nabasa daytoy: Iti ngiwat dagiti maladaga ken dagiti agsussuso, inananaymo ti pannacaidayaw?

¹⁷ Ket pinanawanna ida, ket napan iti ruar ti ciudad agingga idiay Betania, ket nagsardeng sadiay.

Ti cayo ti higos a nagango.

¹⁸ Ket iti bigat, idi agsubsubli iti ciudad, nagbisin.

¹⁹ Ket idi makitana ti maysa a cayo ti higos iti asideg ti dalan, napan kencuana, ngem awan nasaracanna kencuana no di laeng bulbulong: ket kinunana kencuana: Uray caano man saancanto coma nga agbungan. Ket naigiddato a daydi cayo ti higos nagango.

²⁰ Ket idi makita daytoy dagiti adalan, nagsiddaawda, a cuncunada: Casano ket ti pannacaigiddatona a nagangon ti cayo ti higos?

²¹ Ket ni Jesus simmungbat, ket kinunana cadacuada: Pudno cunac cadacayo a no addanto pammatiyo, ket dicayto agduadua, saan la nga aramidenyonto ti castoy iti cayo ti higos, no di uray pay itoy bantay no cunaenyonto: Pumanawca ket agtappuacca iti taaw; maaramidto.

²² Ket amin a dawatenyonto iti panagcararag, no sipapaticayo, awatenyonto.

Ti pammautizar ni Juan.

²³ Ket idi dimteng idiay Templo dagiti panguloen dagiti papadi ken dagiti panglacayen dagiti umili, immasidegda kencuana idi madama a mangisursuro cadagiti umili ket kinunada: Ania a pannacabalin ti pangaramidmo cadagitoy? ket siasino ti nangted kenca itoy a pannacabalin?

²⁴ Ket ni Jesus simmungbat, ket kinunana cadacuada: Siac imtuudecto met cadacayo ti maysa a banag, isu a no masungbatanyo caniac, ibagacto met cadacayo no ania a pannacabalin ti pangaramidco cadagitoy a banag.

²⁵ Ti pammautizar ni Juan, Adino ti naggapuanna? Iti langit, wenno cadagiti tao? ket panpanunutenda iti nakemda, a cuncunada: No cunaenminto: Iti langit; cunaennanto cadacami: Apayapay, ngarud nga dicay pinati?

²⁶ Ngem no cunaenminto: Cadagiti tao; cabutengmi dagiti umili, ta isuda amin imbilangda a ni Juan mammadto.

²⁷ Ket simmungbatda ken Jesus, ket kinunada: Dicam ammo. Isu kinunana met cadacuada: Uray siac diac met ibaga cadacayo no ania a pannacabalin ti pangaramidco cadagitoy a banag.

Pangngarig dagiti dua nga annac.

²⁸ Ngem ania ti panangipapanyo? Maysa a tao adda dua nga annacna; ket idi immasideg iti immuna, kinunana kencuana: Anac, inca, agtrabajo ita idiay cauvasan.

²⁹ Isu simmungbat, ket kinunana: Diac cayat; ngem idi cuan nagbabawi, ket napan.

³⁰ Ket immasideg idi maicadua ket kinunana met kencuana ti casta. Ket isu simmungbat, ket kinunana: Wen Apo; ngem saan a napan.

³¹ Asino cadagiti dua ti nangaramid iti pagayatan ni amana? Cunada: Ti immuna. Ni Jesus cunana cadacuada: Pudno cunac cadacayo a dagiti agsingsingir ti buis ken dagiti balangcantis mapanda nga umununa ngem dacayo iti pagarian ti Dios,

³² Ta immay ni Juan cadacayo iti dalan ti kinalinteg ket dicay namati kencuana; ngem dagiti agsingsingir ti buis ken dagiti balangcantis namatida kencuana: ket dacayo, idi nakitayo daytoy, dicay met nagbabawi iti calpasanna, nga namaticayo coma kencuana.

Pangngarig dagiti agtaltalon a nadangcuc.

³³ Denggenyo ti sabali a pangngarig: adda idi maysa a tao nga ama ti sangacabbalayan a nagmula ti maysa a cauvasan, ket linawlawna iti alad, ket nangcali kencuana ti maysa a pagaramidan ti arac, ket nangbangon ti maysa a pagbantayan, ket intedna a pinaupaan cadagiti agtaltalon, ket napan iti sabali a daga.

³⁴ Ket idi umasideg ti tiempo ti panagapit imbaonna dagiti adipenna cadagiti mannalon, tapno awatenda ti abangna.

³⁵ Ket dagiti tumatalon, innalada dagiti adipenna ket minalmaloda ti maysa, ket pinatayda ti sabali, ket ti sabali binatoda.

³⁶ Nangibaon manen cadagiti sabali nga adipen nga adadu ngem cadagidi immuna; ket inaramidda cadacuada ti casdi met laeng.

³⁷ Ngem iti camaudianan imbaonna cadacuada ti anacna, a cuncunana: Padayawandanto ti annacco.

³⁸ Ngem idi dagiti agtaltalon nakitada daydi anac, kinuna ti maysa ken maysa cadacuada: Daytoy ti agtawid; umaycayo, papatayentayo ket alaentayo ti tawidna.

³⁹ Ket isu tiniliwda, ket induronda iti ruar ti cauvasan, ket pinatayda.

⁴⁰ Ngem intono umay ti apo ti cauvasan, anianto ti aramidenna cadagidiay nga agtaltalon?

⁴¹ Cunada kencuana: Pucawennanto ida nga awanan asi dagidiay managdacdakes a tattao ket itednanto nga ipaabang ti cauvasan cadagiti sabali a mannalon nga agbayad kencuana cadagiti apit cadagiti tiempoda.

⁴² Ni Jesus cunana cadacuada: Uray caano dicay aya nabasa cadagiti Sursurat: Ti bato nga imbel-leng dagiti managaramid ti balay, Isu met laeng ti maaramid nga bato a pasuli. Ti Apo ti nangaramid iti daytoy Ket nacascasdaaw ngamin cadagiti matatayo?

⁴³ Gapuna cunac cadacayo a ti pagarian ti Dios maiccatto cadacayo, ket maitedto iti maysa a nacion, a mangpataud cadagiti bungbungana.

⁴⁴ Ket ti matnag iti daytoy a bato maburacto; ngem iti siasinoman a pagtinnaganna, matumecto a casla tapoc.

⁴⁵ Ket idi nangngeg dagiti panguloen dagiti papadi ken dagiti Fariseo dagiti pangngarigna, naawatanda nga isuda ti sasaoenna idi.

⁴⁶ Ket isu agawaanda idi a tiliwen; ngem kinabutengda dagiti adu a tao; ta imbilangda a maysa a mammadto.