San Mateo 20 - Ti Biblia (1973)

Pangngarig dagiti mangmangged a mabayadan iti nadumaduma nga horas.

¹ Ta ti pagarian ti langit maipadis iti maysa a tao nga ama ti sangcacabbalayan a rimmuar iti agsapa a makitulag cadagiti mangtalon iti cauvasanna.

² Ket idinto a nakitulag cadagiti mangmangged iti maysa a denario ti inaldaw, imbaonna ida iti cauvasanna.

³ Ket rimmuar iti asideg ti horas a maicatlo, ket nakitana dagiti sabsabali nga addada iti plaza nga awan aramidda;

⁴ Ket kinunana cadacuada: Incayo met iti cauvasan, ket ti maitutop itdecto cadacayo. Ket napanda.

⁵ Rimmuar manen iti asideg ti horas a maicanem, ken iti horas a maicasiam, ket casta met ti inaramidna.

⁶ Ket rimmuar iti horas a maicasangapulo ket maysa ket nasaracanna dagiti sabsabali nga agtatacder sadiay nga awan aramidda, ket kinunana cadacuada: Apayapay addacay ditoy a nagmalmalem nga awan ti maararamidyo?

⁷ Cunada kencuana: Agsipud ta awan ti nakitulag cadacami. Cunana cadacuada: Incayo met iti cauvasan.

⁸ Ket idi sumipngeten, ti apo ti cauvasan kinunana idi pagtaltalcanna: Ayabam dagiti mangmangged, ket tangdanam ida iti sangsangcapada, manipud cadagiti naudi agingga cadagiti immun-una.

⁹ Idi ngarud simmangpet dagidi simrec iti asideg ti horas a maicasangapulo ket maysa, immawat ti tunggal maysa cadacuada iti maysa a denario.

¹⁰ Ket idi immay dagiti immun-una, impagarupda nga umawatdanto iti nawadwadwad; ngem casta met nga immawat ti tunggal maysa a tao iti maysa a denario.

¹¹ Ket idi nacaawatdan nagtanabutobda iti maisalungasing iti ama ti sangacabbalayan.

¹² A cuncunada. Dagitoy naudi, nagtrabajoda iti maymaysa nga horas laeng, ket intuladmo ida cadacami, a nagtrabajo a nagmalmalem iti cainitan.

¹³ Ngem isu simmungbat, ket kinunana iti maysa cadacuada: Gayyem, diac agaramid kenca ti ranggas. Dica aya nakitulag caniac iti maysa a denario?

¹⁴ Alaem ti cucuam ket incan; isu ti cayatco nga iccan daytoy naudi iti capadpada ti naited kenca

¹⁵ Saan aya a maipalubos caniac nga aramidec ti cayatco iti cucuac? wenno dakes aya ta matam agsipud ta naimbagac?

¹⁶ Iti casta dagiti maudi isudanto dagiti umuna, ket dagiti umuna isudanto dagiti maudi.

Ti dawat dagiti annac ti Zebedeo.

¹⁷ Ket idi a sumangsang-at ni Jesus idiay Jerusalem, inayabanna nga inlasin dagiti sangapulo ket dua nga adalan, ket iti dalan kinunana cadacuada:

¹⁸ Adtoy sumang-attayo idiay Jerusalem, ket ti Anac ti tao mayawatto cadagiti panguloen dagiti papadi ken cadagiti escriba; ket ipataydanto kencuana ti ipapatay.

¹⁹ Ket isu iyawatdanto cadagiti Gentil, tapno rabrabngisen ken bauten, ken, ilansada iti cruz; ngem intono maicatlo nga aldaw agungarto.

²⁰ Idin immay kencuana ti ina dagiti annac ni Zebedeo, agraman dagiti annacna, a nagdaydayaw ket adda dinawatna kencuana.

²¹ Ket kinuna ni Jesus kencuana: Ania ti cayatmo? Cuna di babai kencuana: Ibilinmo a dagitoy dua nga annacco agtugawda coma, ti maysa iti macanawanmo, ket ti maysa iti macatigidmo idiay pagariam.

²² Ngem ni Jesus simmungbat, ket kinunana: Dicay ammo ti dawdawatenyo. Mabalinyo aya ti uminum iti copa a dandani inumac? Cunada kencuana: Wen: mabalinmi.

²³ Cunana cadacuada: Pudno nga uminumcayto iti copac; ngem ti panagtugawyo iti macanawanco ken ti macatigidco saan a siac ti akinrebbeng a mangted, no di ket ni Amac, cadagidiay nacaisaganaanna.

²⁴ Ket idi dagiti sangapulo, nangngegda daytoy nagrurodda cadagiti dua nga agcabsat.

²⁵ Ngem ni Jesus inayabanna ida iti dinnana, ket kinunana: Ammoyo a dagiti panguloen dagiti Gentil agturayda cadacuada ket dagiti natanoc agbilinda a situturay cadacuada.

²⁶ Ngem cadacayo saanto a casta; no di ket ti siasinoman nga agtarigagayto nga isu ti cadackelan cadacayo, isunto ti agservi cadacayo;

²⁷ Ket ti siasinoman nga agayatto nga isu ti umuna cadacayo, isunto ti adipenyo:

²⁸ A cas met ti Anac ti tao saan nga immay tapno parservian, no di ket tapno agservi ken itedna ti biagna, a maysa a subbot cadagiti adu.

Dagiti dua a bulsec idiay Jerico.

²⁹ Ket idi rimmuarda idiay Jerico umariwecwec a tattao simmurotda kencuana.

³⁰ Ket adtoy dagiti dua a bulsec, a situtugawda iti igid ti dalan, idi nangngegda a ni Jesus lumablabas, nagickisda a cuncunada: Caasiannacami, Apo, Anac ni David.

³¹ Ket dagidi adu a tattao inungtanda ida tapno agulimecda. Ngem adadda ti panangyickisda: Caasiannacami, Apo, Anac ni David.

³² Ket simmardeng ni Jesus, ket inayabanna ida, ket kinunana: Ania ti cayatyo nga aramidec cadacayo?

³³ Cunada kencuana: Apo, maluctan coma dagiti matami.

³⁴ Ket ni Jesus, simnec ti asina, inaprusanna dagiti matada ket naigiddato nga nacakitada; ket simmurotda kencuana: