San Mateo 2 - Ti Biblia (1973)

Dagiti mamasirib iti daya.

¹ Idi ta nayanac ngaruden ni Jesus idiay Bethlehem sadi Judea, cadagidi aldaw ni Ari Herodes, adtoy, dagiti Mamasirib cadagiti luglugar iti daya immayda sadi Jerusalem, a cuncunada,

² Sadino ti yan ti nayanac nga Ari dagiti Judio? Ta nakitami ti bituenna idiay daya, ket immaycam nga agdayaw kencuana.

³ Idi mangngeg daytoy ni Ari Herodes, naglagaw ket ti amin a taga Jerusalem nakipaglagawda met.

⁴ Ket idi nga inurnongna amin a panguloen dagiti sacerdote ken dagiti escriba ti umili, inintuudna no sadino ngata ti pacayanacan ti Cristo.

⁵ Ket kinunada kencuana: Sadi Bethlehem sadi Judea: ta casta ti adda nga insurat di mammadto:

⁶ Ket sica, Bethlehem, daga ni Juda, Saan a sica ti cababassitan cadagiti principes ti Juda; Ta sica ti pagtaudanto ti maysa a pangulo A mangpastor iti ilic nga Israel.

⁷ Iti casta ni Herodes inayabanna dagidi mamasirib iti nalimid, ket inammucodna cadacuada a naimbag ti tiempo a pinagparang ti bituen.

⁸ Ket imbaonna ida sadi Bethlehem, a cuncunana: Incayo ket damagenyo a naimbag ti maipapan iti ubing ket no masapulanyonto, yammoyo caniac, tapno siac mapanacto met agdayaw kencuana.

⁹ Ket idi calpasan ti pannacatimudda iti Ari, napandan ket adtoy, ti bituen a nakitada idiay daya, agturturong iti masangoananda, agingga ti nacagteng, ket nagsardeng iti ngatoen ti yan ti ubing.

¹⁰ Ket idi a nakitada ti bituen nagragsacda iti napalalo.

¹¹ Ket idi simrecda iti balay, nasaracanda ti ubing ken ni Maria nga inana; ket nagrucbabda, nagdaydayawda kencuana; ket linucatanda dagiti gupgupitda, indatonda kencuana dagiti sagsagutda a balitoc ken incienso ken mirra.

¹² Ket idinto a napacdaaranda gapu iti maysa a tagtagainep a saanda nga asublin ken Herodes, nagawidda iti dagada iti sabali a dalan.

Panaglemmengda idiay Egipto:—Panagpapatay cadagiti awan basolda.

¹³ Ket idi nacapanawdan, adtoy, ti maysa nga angel ti Apo nagparang iti maysa a tagtagainep ken Jose a cuncunana: Bumangonca, ket alaem ti ubing ken ni inana, ket aglemmengca idiay Egipto, ket agianca sadiay aginga ti panangibagacto kenca, ta ni Herodes sapulennanto ti ubing tapno pucawenna.

¹⁴ Ket bimmangon, innalana di ubing ken ni inana iti rabii, ket napan idiay Egipto;

¹⁵ Ket nagian sadiay aginga ti ipapatay ni Herodes: tapno matungpal ti sinao ti Apo gapu iti pannacaaramat ti mammadto a cuncunana: Nanipud Egipto inayabac ti Anacco.

¹⁶ Iti casta ni Herodes idi nakitana mga inuy-uyungan dagiti mamasirib, nagpungtot unay: nagbaon ket pinapapatayna dagiti amin nga ubbing a lallaki nga adda idi sadi Bethlehem ken amin a beddengna, manipud cadagiti agtawen ti dua nga agpababa, cas ti tiempo a pannacaawatna a naan-anay cadagiti mamasirib.

¹⁷ Natungpal ngarud ti naisao iti pannacaaramat ni mammadto a Jeremias a cuncunana:

¹⁸ Nangngeg ti timec idiay Rama, Sangit ken dungaw a dackel:— Ni Raquel a sangitanna dagiti annacna; Ket dina kinayat ti maliuliwa, ta awandan.

Ti panagsublida manipud idiay Egipto.

¹⁹ Ngem idi natayen ni Herodes, adtoy, maysa nga angel ti Apo agparang iti maysa a tagtaginep ken Jose sadi Egipto, a cuncunana:

²⁰ Bumangonca ket alaem ta ubing ken ni inana, ket inca idiay daga ti Israel: ta nataydan dagidi mangsapul ti biag ti ubing.

²¹ Bimmangon ngarud ket innalana di ubing ken ni inana, ket immay iti daga ti Israel.

²² Ket idi mangngegna a ni Arquelao agari idi sadi Judea a maisucat ken Herodes nga amana, nagbuteng a mapan sadiay; ket gapu ta napacdaaran gapu iti maysa a tagtagainep, napan cadagiti disso ti Galilea;

²³ Ket immay, ket nagnaed idiay ili a managan Nazaret: tapno matungpal ti sinao dagiti mammadto, a managanto ti Nazareno.