San Mateo 18 - Ti Biblia (1973)

Ti cadackelan idiay pagarian ti langit.

¹ Iti daydi nga horas dagiti adalan immasidegda ken Jesus, a cuncunada: Asino ti cadackelan idiay pagarian ti langit?

² Ket ni Jesus immayab ti maysa nga ubing a bassit, ket isu incabilna iti nagtengngaanda,

³ Ket kinunana: Pudno cunac cadacayo, a no dicayto agsubli ken agbalin a cas la ububbing, dicayto sumrec iti pagarian ti langit.

⁴ Iti casta, uray siasino nga agemmanto a cas itoy ubing, daytoy isu ti cadackelan idiay pagarian ti langit.

⁵ Ket uray siasino nga umawatto iti maysa a casta nga ubing iti naganco, awatennac:

⁶ Ngem uray siasino a mangitibcalto iti maysa cadagitoy babassit nga ubbing a mamati caniac, nasaysayaat pay kencuana a maibattoon coma iti tengngedna ti maysa a bato ti gilingan a dackel, ket, isu maipalned coma iti caadalman ti baybay.

⁷ Ay-ay pay ti lubong gapu cadagiti pacasairoan! Ta masapul nga umay dagiti pacasairoan: ngem asi pay dayta tao, a paggapuan ti pacasairoan!

⁸ Ket, no ti imam wenno ti sacam isudanto ti pacaitibcolam putdem, kenca ket ibel-lengmo ida: nasaysayaat kenca ti sumrec a pilay wenno pawad iti biag, ngem iti addaanca ti dua nga ima wenno dua a saca ket maitapuacca iti apuy nga agnanayon,

⁹ Ket no ti matam isunto ti pacaitibcolam, suatem kenca ket ibel-lengmo: nasaysayaat kenca ti sumrec iti biag, a maymaysa ti matam ngem iti addaanca ti dua a mata ket maitapuacca iti infierno nga apuy.

¹⁰ Kitaenyo ta dicay umsien ti maysa cadagitoy babassit nga ubbing, ta cunac cadacayo a dagiti angelda sadi langit agnanayon a makitada ti langa ni Amac nga adda sadi langit.

¹¹ Ta ti Anac ti tao immay tapno isalacanna ti napucawen.

¹² Ania ti panagcunayo? No ti maysa a tao adda sangagasut a carnerona ket mayaoawan ti maysa cadacuada, dinto ngata mapan cadagiti banbantay, a panawanna dagiti siam a pulo ket siam, tapno sapulenna ti nayaoawan?

¹³ Ket no maaramid nga isu masaracanna, pudno cunac cadacayo, nga adadda a pagragsacanna daydiay, ngem dagiti siam a pulo ket siam a di nayaoawan.

¹⁴ Casta met saan a pagayatan ni Amayo nga adda sadi langit, a mapucaw ti maysa cadagitoy babassit nga ubbing.

¹⁵ Ket no ni cabsatmo macabasol kenca, inca, ibaga kencuana ti basolna a dacdacayo; no denggenna, naalam ni cabsatmo.

¹⁶ Ngem no dinaca denggen, mangicuyugca ti maysa wenno dua pay, tapno gapu cadagiti dua wenno tallo a sacsi mapatalgedan ti amin a sasao.

¹⁷ Ket no dina denggen ida, ipulongmo iti Iglesia: ket no dina ipangag met ti Iglesia, ibilangmo a Gentil ken agsingsingir ti buis.

¹⁸ Pudno cunac cadacayo, ti aniaman a banag a gulatanyonto ditoy daga, magalutanto idiay langit; ket ti aniaman a banag a warwaranyonto ditoy daga mawarwaranto idiay langit.

¹⁹ Cunac man cadacayon, a no dagiti dua cadacayo pagnummuandanto ditoy daga ti maipapan iti aniaman a banag a dawatendanto, ni Amac nga adda sadi langit, aramidennanto cadacuada.

²⁰ Ta no adino ti naguurnongan ti dua wenno tal-lo gapu iti naganco, addaac idiay iti nagtengngaanda.

²¹ Idin ni Pedro immasideg ket kinunana kencuana: Apo, Maminanonto a pacawanec ni cabsatco no macabasol caniac? Agingga ti maminpito?

²² Ni Jesus cunana kencuana: Saanco a cuna nga agingat iti maminpito; no di ket, agingga iti maminpito pulo a pito.

²³ Gapuna ti pagarian ti langit maipadis iti maysa nga ari, a kinayatna ti makicuenta cadagiti adipenna.

²⁴ Ket idi a nangrugi a nagcuenta, naidatag ti maysa a nacautang kencuana ti sangapulo a ribo a talento.

²⁵ Ngem gapu iti awan ti mabalinna a pagbayad, ni apona imbilinna nga isu malaco, agraman asawana ken annacna, ken amin nga adda kencuana, ket iti casta macabayad coma.

²⁶ Idin daydi adipen, nagparintumeng a nagpacpacaasi kencuana, a cuncunana: Apo, anusannac cadi bassit ket bayadacto amin kenca.

²⁷ Ket daydi apo ti adipen, idi natignay ti asina kencuana, pinalubusanna ket pinacawanna ti utang.

²⁸ Ngem idi nacaruar daydi adipen, nasaracanna ti maysa cadagiti padana nga adipen a nacautang kencuana ti sangagasut a denario; ket tiniliwna ket bineckebeckelna a cuncunana: Bayadam ti utangmo caniac.

²⁹ Gapuna a daydi padana nga adipen, nagparintumeng ket nagpacpacaasi kencuana a cuncunana: Apo anusannac cadi ket bayadacto amin kenca.

³⁰ Ngem isu dina impangag; no di ket napan ket impisocna iti pagbaludan agingga iti mabayadanna ti utang.

³¹ Gapuna idi nga dagiti padana a paadadipen nakitada ti napasamac, naglidayda unay ket napanda, ket impolongda iti apoda amin a napasamac.

³² Ket iti casta daydi apoda isu inayabanna, ket cunana kencuana: Adipen a dakes, pinacawanco ti amin nga utangmo, ta nagpacpacaasica caniac:

³³ Saan aya a rebbengmo met coma a caasian ti padam nga adipen, a cas met iti panangngaasic kenca?

³⁴ Ket ni apona nagpungtot ket isu inyawatna cadagiti mangsaplit agingga iti mabayadanna amin ni inutangna kencuana.

³⁵ Castanto met ti aramiden ni Amac a nailangitan, no ti tunggal maysa cadacayo dina pacawanen iti pusona ni cabsatna.